ଅନଲକ୍ ପାଇଁ ସରକାରଙ୍କ ବିଚାର! ରଜ ପରେ ଅଧା ଓଡ଼ିଶାରୁ ପର୍ଯ୍ୟାୟକ୍ରମେ ହଟିପାରେ କଟକଣା, ଜାଣନ୍ତୁ ତାଲିକାରେ କେଉଁ କେଉଁ ଜିଲ୍ଲାକୁ ମିଳିପାରେ ଅଗ୍ରାଧିକାର ।
କନକ ବ୍ୟୁରୋ : ରାଜ୍ୟରେ କରୋନା ସ୍ଥିତିର ସମୀକ୍ଷା ପରେ ସଂକ୍ରମଣ ହାର କମ ଥିବା ଜିଲ୍ଲା ଗୁଡିକରେ ପର୍ଯ୍ୟାୟକ୍ରମେ ଅନଲକ କରିବା ନେଇ ସରକାର ବିଚାର କରୁଥିବା କହିଛନ୍ତି ମୁଖ୍ୟମନ୍ତ୍ରୀ । ଏଭଳି ସ୍ଥିତିରେ ରାଜ୍ୟରେ ଏବେ ୧୨ଟି ଜିଲ୍ଲାରେ ସଂକ୍ରମଣ ହାର ୫ ପ୍ରତିଶତରୁ କମ ରହିଛି । ଆଉ ଯଦି କେନ୍ଦ୍ର ସରକାରଙ୍କ ଗାଇଡଲାଇନକୁ ଦେଖିବା ତେବେ ୫ ପ୍ରତିଶତରୁ କମ ସଂକ୍ରମଣ ହାର ରହୁଥିବା ଜିଲ୍ଲା ଗୁଡିକରେ ପର୍ଯ୍ୟାୟକ୍ରମେ ଅନଲକ କରାଯାଇପାରିବ । ଆଉ କେନ୍ଦ୍ର ସରକାରଙ୍କ ଏହି ଗାଇଡଲାଇନରେ ଏବେ ସୁଦ୍ଧା ରାଜ୍ୟର ୧୨ ଜିଲ୍ଲା ଆସୁଛି ।
Kanak News is now on WhatsApp
Join and get latest news updates delivered to you via WhatsApp
ଏହାବାଦ୍ ଲକଡାଉନ କଟକଣା ଆସନ୍ତ ୧୭ ତାରିଖ ପର୍ଯ୍ୟନ୍ତ ରହିଥିବାରୁ ଅନ୍ୟ ଜିଲ୍ଲା ଗୁଡିକରେ ସଂକ୍ରମଣ ହାର ମଧ୍ୟ ଯଥେଷ୍ଟ କମିବାର ସମ୍ଭାବନା ରହିଛି । ଖାସକରି ବୌଦ୍ଧ ଓ ଅନୁଗୁଳରେ ମଧ୍ୟ ସଂକ୍ରମଣ ଦ୍ରୁତ ହ୍ରାସ ପାଉଥିବାରୁ ଆସନ୍ତା ଗୋଟିଏ ସପ୍ତାହ ମଧ୍ୟରେ ଏହି ଦୁଇ ଜିଲ୍ଲାରେ ସଂକ୍ରମଣ ହାର ମଧ୍ୟ ୫ ପ୍ରତିଶତରୁ ତଳକୁ ଆସିପାରେ । କେବଳ ଏହି ଦୁଇ ଜିଲ୍ଲା ନୁହେଁ ବରଂ କେଉଁଝର ଓ ମୟୂରଭଞ୍ଜରେ ମଧ୍ୟ ଗୋଟିଏ ସପ୍ତାହ ମଧ୍ୟରେ ସ୍ଥିତିରେ ସୁଧାର ଆସିପାରେ । କାରଣ ରାଜ୍ୟରେ ଲଗାତାର ସଂକ୍ରମଣ ହାର କମୁଥିବା ବେଳେ ଉଭୟ ଜିଲ୍ଲାରେ ମଧ୍ୟ ସଂକ୍ରମଣ ଦ୍ରୁତ ହ୍ରାସ ପାଉଛି ।
ପୂର୍ବରୁ ସଂକ୍ରମଣ ହାର କମ ଥିବା ୩ ଜିଲ୍ଲା ଗଜପତି, ନୂଆପଡା, ସୁନ୍ଦରଗଡରେ ଲକଡାଉନ କଟକଣାକୁ ଟିକିଏ କୋହଳ ସହ ବିଭିନ୍ନ ଦୋକାନ ଖୋଲିବାକୁ ସରକାର ଅନୁମତି ଦେଇଥିଲେ । ତେବେ ଏଭଳି ନିଷ୍ପତି ପରେ ଉକ୍ତ ୩ ଜିଲ୍ଲାରେ ସଂକ୍ରମଣ ସେଭଳି ବଢିନଥିଲା । ଏପରିକି ଏକଦା ରାଜ୍ୟର ସର୍ବାଧିକ ସଂକ୍ରମିତ ଚିହ୍ନଟ ହେଉଥିବା ସୁନ୍ଦରଗଡରେ ସ୍ଥିତିରେ ସୁଧାର ଆସିବା ସହ ସଂକ୍ରମଣ ହାର ଏବେ ମଧ୍ୟ ୫ ପ୍ରତିଶତ ତଳେ ରହୁଛି । ତେଣୁ ଏହା ଅନ୍ୟ ଜିଲ୍ଲା ଗୁଡିକ ପାଇଁ ଶୁଭସଂକେତ ଆଣିପାରେ । ଉକ୍ତ ୩ ଜିଲ୍ଲା ଭଳି, ୫ ପ୍ରତିଶତରୁ କମ ସଂକ୍ରମଣ ହାର ଥିବା ଜିଲ୍ଲା ଗୁଡିକରେ ମଧ୍ୟ ସରକାର କଟକଣାକୁ କୋହଳ ସହ ପର୍ଯ୍ୟାୟକ୍ରମେ ଅନଲକ କରିପାରନ୍ତି । ରାଜ୍ୟରେ ଲକଡାଉନ କଟକଣାର କଣ୍ଟ ପୂରା ହେବାକୁ ଆଉ ୯ ଦିନ ବାକି ରହିଛି । ତେଣୁ ଏହି ସମୟ ଭିତରେ ସଂକ୍ରମଣ ଲଗାତାର ହ୍ରାସ ପାଇଲେ ପୁଣିଥରେ ଦୋକାନ ବଜାର ଖୋଲିବା ପାଇଁ ବାଟ ଫିଟିପାରେ । ସବୁଠୁ ବଡ କଥା ହେଲା, ଯଦି ସଂକ୍ରମଣ ହାରକୁ ଦୃଷ୍ଟିରେ ରଖି ଅନଲକ୍ କରାଯାଏ ତେବେ ପଶ୍ଚିମ ଓଡ଼ିଶାର ଅଧିକାଂଶ ଜିଲ୍ଲା ଏହି ତାଲିକାରେ ରହିବେ । ତେବେ ଉପକୂଳ ଓ ଉତ୍ତର ଓଡ଼ିଶାର ଅଧିକାଂଶ ଜିଲ୍ଲାରେ ସଂକ୍ରମଣ ହାର ୧୦ ପ୍ରତିଶତରୁ ଅଧିକ ରହୁଥିବାରୁ ଏଠାରେ ଅନଲକ ହେବାର ସମ୍ଭାବନା ଯଥେଷ୍ଟ କମ ରହିଛି । କିନ୍ତୁ ଯେହେତୁ ଆଗକୁ ପର୍ବପର୍ବାଣୀ ରହିଛି ତେଣୁ ସରକାର କଣ ନିଷ୍ପତି ନେଉଛନ୍ତି ତାହା ଉପରେ ସମସ୍ତଙ୍କର ନଜର ରହିବ ।