କୁଆଡେ ଲମ୍ବିଛି ଭେଜାଲ ମେଡିସିନର ଚେର? ନକଲି ମେଡିସିନ ଖଳନାୟକକୁ ଖୋଜିପାଇବ ତ ପୋଲିସ୍ ?
କନକ ବ୍ୟୁରୋ: ରୋଗୀଙ୍କ ଜୀବନ ସହ ସାଂଘାତିକ ଖେଳ, ଜବତ ହେଲା ୭୦ ଲକ୍ଷରୁ ଅଧିକ ଟଙ୍କାର ନକଲି ମେଡିସିନ୍ । କଟକର ନକଲି କାରବାରରେ ଏଥର ଯୋଡ଼ିହୋଇଛି ମେଡିସିନ୍ର ନାଁ । ପୂର୍ବରୁ ସିମେଣ୍ଟ, ଘିଅ, ପନିର, ତେଲ, ମସଲା ଆଦି ସବୁକିଛିର ଭେଜାଲ କାରଖାନା ଠାବ ହୋଇଥିବାବେଳେ ଏବେ ପେଟି ପେଟି ନକଲି ଔଷଧକୁ ଠାବ କରିଛି ଡ୍ରଗ୍ସ କଂଟ୍ରୋଲର ସ୍କ୍ୱାର୍ଡ । ଏହି ମେଡିସିନ୍ ମଧ୍ୟରେ କରୋନା ରୋଗୀଙ୍କ ପାଇଁ ଆବଶ୍ୟକୀୟ ଫାଭିଫିରାଭିରର ନକଲି ଟାବଲେଟ୍ ବିକ୍ରି ହେଉଥିଲା । ଯହାକୁ ନେଇ ଏବେ ଛାନବିଭିନ୍ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଦିନକ ପୂର୍ବରୁ କଟକ କନିକା ଛକ ନିକଟ ଏକ ଔଷଧ ଗୋଦାମ ଉପରେ ଡ୍ରଗ୍ସ କଂଟ୍ରୋଲର ସ୍କ୍ୱାର୍ଡ ଚଢାଉ କରି ବିପୁଳ ପରିମାଣର ନକଲି ଔଷଧ ଜବତ କରିଥିଲା । ଚଢ଼ାଉ ବେଳେ ଫାଭିଫିରାଭିର ବା ଫାବିମେକ୍ସ-୪୦୦ର ୧୭ଶହ ଷ୍ଟ୍ରିପ୍, ମେଡିଅକ୍ସି-୩୦୦ର ୨୩ଶହ ଷ୍ଟ୍ରିପ୍, କାଶ ପାଇଁ ମେଡ୍ ଟିବିଆର ୨୦୫୪ଟି ଷ୍ଟ୍ରିପ୍, ମେଡଗୋଜ୍-୨୦୦ର ୨୫ଶହ ଷ୍ଟ୍ରିପ୍, ସିନିଜ୍ର ୬ ହାଜର ଷ୍ଟ୍ରିପ୍, ଟିବିଆର-୯୬ର ୪୪ଶହ ଷ୍ଟ୍ରିପ୍, ଟ୍ରିଟ୍-୨୦୦ ଏସବିର ୩୩ଶହ ଷ୍ଟ୍ରିପ୍ ଭଳି ୭ ପ୍ରକାର ନକଲି ଔଷଧ ଜବତ କରାଯାଇଛି । ତେବେ ଏତେ ପରିମାଣର ନକଲି ମେଡିସିନ୍ ଭିତରୁ ନକଲି କରୋନା ମେଡିସିନ୍ ଫାବିଫିରାଭିର କେଉଁ କେଉଁ ଜିଲ୍ଲାକୁ ଯାଇଛି, କୋଉ ହସ୍ପିଟାଲ ନେଇଛି? କେଉଁ ଦୋକାନୀ ବା ରିଟେଲର ଏହାକୁ ନେଇଛନ୍ତି? ଏସବୁକୁ ଦିଗରେ ଛାନଭିନ୍ ଚଳାଇଛି ଡ୍ରଗ୍ସ କଂଟ୍ରୋଲର ଓ ପୋଲିସ ।
ହେଲେ ଏସବୁ ଭିତରେ ଏହି ନକଲି ଔଷଧ ଜବତ ଘଟଣାରେ ସମ୍ପୃକ୍ତ ମେଡିସିନ୍ ହୋଲସେଲର ଏହାକୁ ଖଣ୍ଡନ କରିଛନ୍ତି । କହିଛନ୍ତି, ସବୁକିଛି ବିଲ୍ ମୋ ପାଖରେ ଅଛି, ମୁଁ କିଣିଥିବା ଫାବିଫିରାଭିର ଓଡ଼ିଶାର କୌଣସି ସ୍ଥାନରେ ସପ୍ଲାଇ କରାଯାଇ ନାହିଁ । କେବଳ ଗ୍ୱାଲିଅରକୁ ଯାଇଛି ଏବଂ ଅନ୍ୟାନ୍ୟ ୪ରୁ ୫ଟି ମେଡିସିନ୍ ରାଜ୍ୟର କିଛି ଜାଗାକୁ ଯାଇଛି ବୋଲି ସଫେଇ ରଖିଛନ୍ତି ହୋଲସେଲର ।
ସେପଟେ ନକଲି ଔଷଧ କାରବାର ନେଇ ଖବର ସାମ୍ନାକୁ ଆସିବା ପରେ ତଦନ୍ତ ନିର୍ଦ୍ଦେଶ ଦେଇଛନ୍ତି ସ୍ୱାସ୍ଥ୍ୟ ବିଭାଗ । ଔଷଧ ନିଗମ ଓ ପୋଲିସ ମିଳିତ ଭାବେ ଅନୁସନ୍ଧାନ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛି ସ୍ୱାସ୍ଥ୍ୟବିଭାଗ । ଔଷଧ କେଉଁଠୁ ଆସି କେଉଁଠିକୁ ଯାଉଥିଲା ସେନେଇ ତଦନ୍ତ କରାଯିବ । ରାଜ୍ୟ ସରକାର ପର୍ଯ୍ୟାପ୍ତ ପରିମାଣର ଔଷଧ ଯୋଗାଇ ଦେଉଛନ୍ତି । କୌଣସି ରୋଗୀ ମେଡିସିନରୁ ବଂଚିତ ହେଉନାହାନ୍ତି ବୋଲି ସ୍ୱାସ୍ଥ୍ୟ ବିଭାଗ ସ୍ପଷ୍ଟୀକରଣ ଦେଇଛି ।
ସବୁଠାରୁ ବଡ଼କଥା ହେଲା, କରୋନା କାଳରେ ପ୍ରଥମ କରି ଓଡ଼ିଶାରେ ଏହି ନକଲି ମେଡିସିନ୍ କାରବାର ଘଟଣା ସାମ୍ନାକୁ ଆସିଛି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି ଡାକ୍ତର, କାରଣ ଯେଉଁ ମେଡିସିନ୍ କେବଳ ଅତି ଜରୁରୀ ସମୟରେ ବ୍ୟବହାର କରାଯାଏ ତାହାର ନକଲି କାରବାର ଜୀବନ ପ୍ରତି ବିପଦକର ହେବ ।
ତେବେ କରୋନା ଭଳି ମହାମାରୀ ସମୟରେ ରୋଗୀଙ୍କ ଜୀବନ ସହ ଖେଳୁଥିବା ଏଭଳି ନକଲି ମେଡିସିନ୍ ର ନାୟକ ମାନଙ୍କ ବିରୋଧରେ କି ପ୍ରକାର ପଦକ୍ଷେପ ଗ୍ରହଣ କରାଯିବ, ଏଭଳି ଭେଜାଲ ମେଡିସିନର ରାକେଟ୍ର ପର୍ଦ୍ଦାଫାସରେ ସଫଳ ହେବତ ପୋଲିସ? ତଦନ୍ତ କେତେବାଟ ଆଗେଇବ? ତାହା ଉପରେ ଏବେ ନଜର ।