କନକ ବ୍ୟୁରୋ : ମମିତା ହତ୍ୟା ଘଟଣାର ପର୍ଦ୍ଦାଫାଶ ହେଲା, ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଧରାପଡିଲା । କିନ୍ତୁ ଏହି ପ୍ରସଙ୍ଗରେ ସବୁଠୁ ଅଧିକ ଚର୍ଚ୍ଚାକୁ ଆସଥିବା ମନ୍ତ୍ରୀ ପୂରା ମୌନ । ଗୋବିନ୍ଦ ସାହୁ ଫେରାର ହେବା ପରଠାରୁ ଏବେ ଯାଏଁ କୌଣସି ଘଟଣାରେ ପଦିଏ ପ୍ରତିକ୍ରିୟା ରଖିନାହାନ୍ତି ମନ୍ତ୍ରୀ ଦିବ୍ୟଶଙ୍କର । ପୋଲିସ ପରକୀୟା ପ୍ରୀତି ଥିଓରୀ ଆଣି ଗୋବିନ୍ଦ ସାହୁଙ୍କ କଲେଜ ଓ ମନ୍ତ୍ରୀ ଦିବ୍ୟଶଙ୍କରଙ୍କୁ ଏହି ଘଟଣାରୁ ଏକପ୍ରକାର ଦୂରେଇ ସାରିଥିଲେ ମଧ୍ୟ ମନ୍ତ୍ରୀ ଦିବ୍ୟଶଙ୍କର ଏଯାଏଁ ସାମ୍ନାକୁ ଆସିବାକୁ ପଛଘୁଞ୍ଚା ଦେଉଛନ୍ତି । ପ୍ରଶ୍ନବାଣକୁ ଭୟ କରି ସାମ୍ନାକୁ ଆସିବାକୁ ଦିବ୍ୟଶଙ୍କର ସାହସ ଜୁଟାଇ ପାରୁନଥିବା ଚର୍ଚ୍ଚା ହେଉଛି । ଏପରିକି ମମିତା ହତ୍ୟାକାଣ୍ଡ ଘଟଣାକୁ ନେଇ ରାଜନୀତି ତେଜିବା ପରେ ମନ୍ତ୍ରୀ ଏକପ୍ରକାର ଏକାନ୍ତବାସକୁ ଚାଲି ଯାଇଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
‘ଦିବ୍ୟଶଙ୍କର ହାଏ ହାଏ, ଦିବ୍ୟଶଙ୍କର ଇସ୍ତଫା ଦିଅ’, କଟକରୁ କଳାହାଣ୍ଡି ଯାଏଁ ବିରୋଧୀଙ୍କ ଏହି ନାରା ସହ କୁଶପୁତ୍ତଳିକା ପୋଡି, ବାସଭବନକୁ ଅଣ୍ଡାମାଡ ପରେ ବି ମନ୍ତ୍ରୀ ନିରବ । ଏପରିକି ଜାତୀୟ ମହିଳା କମିଶନ ମନ୍ତ୍ରୀଙ୍କୁ ବିଦା କରିବାକୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ମଧ୍ୟ ଦିବ୍ୟଶଙ୍କର ସାମ୍ନାକୁ ଆସି ନିଜ ନିର୍ଦ୍ଦୋଷତାର ପ୍ରମାଣ ଦେବାକୁ କାହିଁକି କୁନ୍ଥୁକୁନ୍ଥୁ ହେଉଛନ୍ତି । ମମିତା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କ ସହ ମନ୍ତ୍ରୀ ଦିବ୍ୟଶଙ୍କରର ଘନିଷ୍ଠ ସମ୍ପର୍କ ରହିଥିଲା । ଏପରିକି ଗୋବିନ୍ଦ ସାହୁଙ୍କ କଲେଜକୁ ମନ୍ତ୍ରୀ ବାରମ୍ବାର ଯାଉଥିଲେ, କଲେଜକୁ ନିଜର ଜୀବନ ଠାରୁ ଅଧିକ ବଡ ବୋଲି କହୁଥିଲେ । କିନ୍ତୁ ଏହି କଲେଜରେ ଅନୈତିକ କାର୍ଯ୍ୟ ଚାଲୁଥିଲା ବୋଲି ଚାରିଆଡେ ଚର୍ଚ୍ଚା । କଲେଜରେ ଥିବା ଗୁପ୍ତକୋଠରୀରେ ଅନୈତିକ କାର୍ଯ୍ୟ ଚାଲୁଥିଲା ବୋଲି କୁହାଯାଉଛି । ଆଉ ମନ୍ତ୍ରୀ ବାରମ୍ବାର କଲେଜକୁ ଯାଉଥିବାରୁ ଦିବ୍ୟଶଙ୍କରଙ୍କ ଉପରକୁ ସାଧାରଣରେ ଆଙ୍ଗୁଠି ମଧ୍ୟ ଉଠୁଛି । ତେଣୁ ନୈତିକତା ଦୃଷ୍ଟିରୁ ଦିବ୍ୟଶଙ୍କର ଏ ବାବଦରେ ସ୍ପଷ୍ଟୀକରଣ ରଖିବାର ଆବଶ୍ୟକତା ନାହିଁ କି? ହଜାର ହଜାର ଲୋକେ ମନ୍ତ୍ରୀଙ୍କ ମୁହଁରୁ ସ୍ପଷ୍ଟୀକରଣ ଜାଣିବାକୁ ଚାହୁଁଥିଲେ ମଧ୍ୟ ମନ୍ତ୍ରୀ ନୀରବ କାହିଁକି?
ଅନ୍ୟପଟେ ଦିବ୍ୟଶଙ୍କର ହେଉଛନ୍ତି ଗୃହରାଷ୍ଟ୍ର ମନ୍ତ୍ରୀ । କିନ୍ତୁ ମମିତା ହତ୍ୟାକାଣ୍ଡକୁ ନେଇ ଯେତେବେଳେ ସାରା ରାଜ୍ୟରେ ତୁମ୍ବି ତୋଫାନ ଲାଗିରହିଛି, ଅସନ୍ତୋଷର ନିଆଁ ଜଳୁଛି, ସରକାରଙ୍କୁ ଏହି ପ୍ରସଙ୍ଗରେ ବିରୋଧୀ ଘେରୁଛନ୍ତି ସେତେବେଳେ ଦିବ୍ୟଶଙ୍କରଙ୍କ ସବୁଠୁ ବଡ ଦାୟିତ୍ୱ ହେଉଛି ଏହାର ପୂରା ସତ ଲୋକଙ୍କ ସାମ୍ନାରେ ରଖିବା । ଏପରିକି ଯୋଜନାବଦ୍ଧ ଭାବେ ଗୋବିନ୍ଦ ସାହୁଙ୍କୁ ଥାନାରୁ ଫେରାର କରାଯାଇଥିବା ଚର୍ଚ୍ଚା ହେଉଛି । ଆଉ ଗୋବିନ୍ଦ ଯେହେତୁ ଗୃହରାଷ୍ଟ୍ର ମନ୍ତ୍ରୀ ଦିବ୍ୟଶଙ୍କର ଘନିଷ୍ଠ ଥିଲେ ତେଣୁ ମନ୍ତ୍ରୀଙ୍କ ଆଡକୁ ଆଙ୍ଗୁଠି ଉଠାଉଛନ୍ତି ଲୋକେ । କିନ୍ତୁ ଏଭଳି ଏକ ସମ୍ବେଦନଶୀଳ ଘଟଣାରେ ମୁହଁ ଖୋଲିବା ତ ଦୂରର କଥା ବରଂ ଲାଗୁଛି ଯେପରି ଗମ୍ଭୀରା ଘରେ ପଶି ରହିଛନ୍ତି ଦିବ୍ୟଶଙ୍କର । ନା କାହାକୁ ଦେଖା ଦେଉଛନ୍ତି, ନା ମନ୍ତ୍ରୀଙ୍କ ପକ୍ଷରୁ କୌଣସି ପ୍ରତିକ୍ରିୟା ସାମ୍ନାକୁ ଆସୁଛି । ଏପରିକି ନିଜ ବିରୋଧରେ ଆସୁଥିବା ଅଭିଯୋଗ ବାବଦରେ ମଧ୍ୟ ଚୁପ୍ ରହିଛନ୍ତି ମନ୍ତ୍ରୀ । ଆଉ ଏଭଳି ନୀରବ ରହି କଣ ବାର୍ତ୍ତା ଦେବାକୁ ଚାହୁଁଛନ୍ତି ଦିବ୍ୟଶଙ୍କର? ନା ମାମଲା ଶାନ୍ତ ନ ପଡିବା ଯାଏଁ ଏଭଳି ଚୁପ୍ ରହିବାକୁ ଶ୍ରେୟସ୍କର ଭାବିଛନ୍ତି ଦିବ୍ୟଶଙ୍କର । ଯଦି ହତ୍ୟାକାଣ୍ଡ ଭଳି ମାମଲାରେ ଗୃହରାଷ୍ଟ୍ର ମନ୍ତ୍ରୀ ଚୁପ୍ ରହିବେ ତେବେ ଏହି ପ୍ରସଙ୍ଗରେ ଦେବ କିଏ? କାରଣ ବୁଧବାର ପୋଲିସ ପକ୍ଷରୁ ଯେଉଁ ପ୍ରେସମିଟ୍ କରାଯାଇଥିଲା ସେଥିରେ ଅନେକ ଅସମାହିତ ପ୍ରଶ୍ନକୁ ଏଡାଇ ଦିଆଯାଇଥିଲା । ଏପରିକି ଗୋବିନ୍ଦଙ୍କ କଲେଜ ଓ ଦିବ୍ୟଶଙ୍କରଙ୍କ ପ୍ରସଙ୍ଗରେ ପଚରାଯାଇଥିବା ପ୍ରଶ୍ନକୁ ଭିନ୍ନ ଢଙ୍ଗରେ ଏଡାଇ ଯାଇଥିଲେ ଉତ୍ତରାଞ୍ଚଳ ଡିଆଇଜି । କେବଳ ପରିବାରର ଅଭିଯୋଗ ଆଧାରରେ ତଦନ୍ତ ଆଗକୁ ବଢୁଛି ବୋଲି ଡିଆଇଜି କହିଥିଲେ । ତେଣୁ ଏଠି ପ୍ରଶ୍ନ ଉଠୁଛି, ଗୋବିନ୍ଦଙ୍କ କଲେଜ ଓ ଦିବ୍ୟଶଙ୍କରଙ୍କୁ ନେଇ ଲୋକଙ୍କ ମନରେ ଉଠୁଥିବା ପ୍ରଶ୍ନର ଉତ୍ତର କିଏ ଦେବ? ପୋଲିସ ନା ଦିବ୍ୟଶଙ୍କର ନିଜେ ।