କନକ ବ୍ୟୁରୋ : ଖସି ପାରିବେନି ଆଇଏଫଏସ ଅଭୟ ପାଠକ ଓ ପୁଅ ଆକାଶ ପାଠକ । ବାପ-ପୁଅ କେଉଁଠୁ ଆଣିଲେ ଏତେ ଟଙ୍କା ? କୁବେର ଭଳି ଅମାପ ସମ୍ପତି ଠୁଳ କରିବା ସମସ୍ତଙ୍କୁ ଚକିତ କରିଥିବାବେଳେ କୋଟି କୋଟି ଟଙ୍କାର ବେନାମୀ କାରବାର ମାମଲାକୁ ଆହୁରି ରହସ୍ୟ ମୟ କରି ଦେଇଛି । ଏହି ରହସ୍ୟ ଉପରୁ ପରଦା ହଠାଇବା ପାଇଁ ଭିଜିଲାନ୍ସର ସୁପାରୀଶ ଆଧାରରେ ତଦନ୍ତ ଆରମ୍ଭ କରିଛି ପ୍ରବର୍ତନ ନିର୍ଦ୍ଦେଶାଳୟ ବା ଇଡି । ଆୟର କୌଣସି ବାଟ ନଥିବାବେଳେ ଆକାଶଙ୍କ ଆକାଉଁଣ୍ଟକୁ କେଉଁଠୁ ଏତେ ଟଙ୍କା ଆସିଲା ଓ କିଏ ଜମା କଲା ଏହାର ତଦନ୍ତ କରିବ ଇଡି ।
Kanak News is now on WhatsApp
Join and get latest news updates delivered to you via WhatsApp
ଆକାଶ ପାଠକଙ୍କ ତିନୋଟି ବ୍ୟାଙ୍କ ଆକାଉଁଂଟରେ ୧୪ କୋଟି ୭୭ ଲକ୍ଷ ଜମା ହୋଇଥିବା ପ୍ରମାଣ ମିଳିବା ପରେ ତଦନ୍ତ ପାଇଁ ଇଡି ଓ ଆଇଟି ବିଭାଗକୁ ସୁପାରୀଶ କରିଛି ରାଜ୍ୟ ଭିଜିଲାନ୍ସ ସେଲ୍ ।
ଆୟ ବର୍ହିଭୂତ ସମ୍ପତି ଠୁଳ ମାମଲାରେ କୋଟପତି ବାପା-ପୁଅଙ୍କୁ ଘନ ଘନ ଜେରା ଚାଲିଛି । ତିନି ଦିନିଆର ରିମାଣ୍ଡରେ ନେଇ ଭିଜିଲାନ୍ସ ବାପ ପୁଅଙ୍କୁ ଅଲଗା ଅଲଗା ପଚରାଉଚୁରା କରୁଛି । ସ୍ପେଶାଲ ଗ୍ରାଫିକ୍ସ.. ଆଇଏଫଏସ ଅଭୟ ପାଠକଙ୍କୁ ଗୋଟିଏ କୋଠରୀ ବସାଇ ଜେରା କରୁଛନ୍ତି ୪ ଭିଜିଲାନ୍ସ ଅଧିକାରୀ । ସେହିପରି ଆକାଶ ପାଠକଙ୍କୁ ଅନ୍ୟ ଏକ କୋଠରୀରେ ବସାଇ ଜେରା କରୁଛନ୍ତି ୩ ଜଣ ଅଧିକାରୀ । ତାଙ୍କ ଖାତାକୁ କେଉଁଠୁ ଏତେ ଟଙ୍କା ଆସିଲା? ଏଥିରେ ଆଉ କାହାର ସମ୍ପୃକ୍ତି ରହିଛି କି ନାହିଁ ସେ ନେଇ ଉଭୟଙ୍କୁ ଗୁଡେଇ ତୁଡେଇ ପ୍ରଶ୍ନ କରୁଛନ୍ତି ତଦନ୍ତକାରୀ ଅଧିକାରୀ ।
ସେପଟେ ବ୍ରହ୍ମପୁରରେ ପହଁଚି ତନାଘନା ଆରମ୍ଭ କରିଛି ଏସଆଇଟି ଟିମ । ପାଠକ ବାପା, ପୁଅଙ୍କ ଆର୍ଥିକ କାରବାର ପଛରେ ଆଉ କାହାର ସମ୍ପୃକ୍ତି ରହିଛି ସେ ନେଇ ୩ ଜଣିଆ ଏସଆଇଟି ଟିମ ଖୋଳତାଡ଼ କରୁଛି । ବ୍ରହ୍ମପୁରରେ ୩ଟି ବ୍ୟାଙ୍କରେ ଅଭୟ ଓ ତାଙ୍କ ପରିବାରର ୭ଟି ଆକାଉଂଟ ଥିବା ଜଣାପଡିଛି ।
କୁବେର ଭଳି ଅମାପ ସମ୍ପତି ଠୁଳ କରି ରାଜକୀୟ ଶୈଳୀରେ ବଂଚୁଥିବା ଆଇଏଫଏସ୍ ଅଭୟ ପାଠକଙ୍କ ତଦନ୍ତ ଯେତିକି ଆଗଉଛି କଳା ସମ୍ପତିର ଗୁମର ସେତିକି ଖୋଲି ଚାଲିଛି । ଆଉ ଏହି ମାମଲାରେ ଇଡି ଓ ଆୟକର ବିଭାଗର ଏଂଟ୍ରି ପରେ କଳା କାରବାରର ପୂରା ପୃଷ୍ଠା ଖୋଲିବ ବୋଲି ଆଶା କରାଯାଉଛି ।