କେବେ ଖୋଲିବ ଶ୍ରୀମନ୍ଦିର ? ଆସନ୍ତା ୧୨ ତାରିଖରେ ଛତିଶା ନିଯୋଗ ବୈଠକରେ ନିଆଯିବ ନିଷ୍ପତ୍ତି ।
କନକ ବ୍ୟୁରୋ: କେବେ ଖୋଲିବ ଶ୍ରୀମନ୍ଦିର । ଏ ପ୍ରଶ୍ନ ଭକ୍ତଙ୍କ ମନରେ ଅହରହ ଉଙ୍କି ମାରୁଥିବା ବେଳେ ଆସନ୍ତା ୧୨ ତାରିଖରେ ଏନେଇ ଛତିଶା ନିଯୋଗ ବୈଠକ ବସିବ । ବୈଠକରେ ଭକ୍ତଙ୍କ ପାଇଁ କେବେ ଶ୍ରୀମନ୍ଦିର ଖୋଲିବ ସେ ନେଇ ନିଷ୍ପତି ନିଆଯିବ । ଛତିଶା ନିଯୋଗ ବୈଠକର ନିଷ୍ପତି କ୍ରମେ ଶ୍ରୀମନ୍ଦିର ପ୍ରଶାସନ ରାଜ୍ୟ ସରକାରଙ୍କୁ ଜଣାଇବେ । ଏହା ପରେ ରାଜ୍ୟ ସରକାର ଶ୍ରୀମନ୍ଦିର ଖୋଲିବା ନେଇ ନିର୍ଦ୍ଦେଶ ଦେବା ପରେ ଭକ୍ତଙ୍କ ଦର୍ଶନ ପାଇଁ ବ୍ୟବସ୍ଥା କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଆଜି ବିଶ୍ୱ ମାନବାଧିକାର ଦିବସରେ ଶ୍ରୀମନ୍ଦିର ଖୋଲିବା ପାଇଁ ଶ୍ରୀମନ୍ଦିର ନିକଟରେ ମାନବାଧିକାର କର୍ମୀମାନେ ବିକ୍ଷୋଭ ପ୍ରଦର୍ଶନ କରିଛନ୍ତି । ପୁରୀ ବଡ଼ଦାଣ୍ଡରେ ଶତାୟୁ ବୃଦ୍ଧା କାଳିଆ ଦର୍ଶନ ପାଇଁ ବି ଅଡି ବସିଥିଲେ । ତାଙ୍କର ଗୋଟିଏ ଜିଦ , ଠାକୁରଙ୍କୁ ଦର୍ଶନ କଲେ ହିଁ ସେ ଘରକୁ ଯିବେ । ନୟାଗଡ ଶରଣକୂଳରୁ ପରିବାର ସହ ଆସିଥିଲେ ଏହି ବୃଦ୍ଧା ମହିଳା । ହେଲେ ଶ୍ରୀମନ୍ଦିର ବନ୍ଦ ରହିଥିବାରୁ ଠାକୁର ଦର୍ଶନ କରିପାରିନଥିଲେ । ତେଣୁ ଜଗା ଦର୍ଶନ କରିବାକୁ ଅତ୍ୟନ୍ତ ଭାବବିହ୍ୱଳ ହୋଇଯାଇଥିଲେ ବୃଦ୍ଧା । ଏମିତି କି ପତିତପାବନ ଦର୍ଶନ କରି ଫେରିଯିବାକୁ ସେ ରାଜି ହୋଇନଥିଲେ । ବଡ଼ଦାଣ୍ଡରେ ବସି ଅଭଡା ଖାଇଥିଲେ ବି ସେଠାରୁ ଉଠିନଥିଲେ । ଭକ୍ତ ଭଗବାନଙ୍କ ଠାରୁ ଆଉ ଦୂରେଇ ରହିପାରୁନି ଯାହା ଏହି ବୃଦ୍ଧାଙ୍କ ଘଟଣା ହିଁ ସୂଚାଇ ଦେଉଛି । ତେଣୁ ଖୁବଶୀଘ୍ର ଖୋଲାଯାଉ ଶ୍ରୀମନ୍ଦିର ।