କରୋନା ସମୟରେ କେମିତି ହେବ ପରୀକ୍ଷା ? ଅଫଲାଇନ ବଦଳରେ, ଅନଲାଇନରେ ପରୀକ୍ଷା କରିବାକୁ ବିଭିନ୍ନ ଇଂଜିନିୟରିଂ ସ୍କୁଲ ଛାତ୍ରଛାତ୍ରୀଙ୍କ ଦାବି ।
କନକ ବ୍ୟୁରୋ: ଦେଶର କରୋନା ଗ୍ରାଫ ଉପରମୁହାଁ । ସେହିପରି ରାଜ୍ୟରେ ମଧ୍ୟ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ଦେଶର କରୋନା ସ୍ଥିତିକୁ ନେଇ ଆଜି କେନ୍ଦ୍ର ସରକାରଙ୍କ ତରଫରୁ ନୀତି ଆୟୋଗର ସଦସ୍ୟ ଭି.କେ ପଲ୍ ସତର୍କବାଣୀ ଶୁଣାଇଛନ୍ତି । ସେ କହିଛନ୍ତି, ଏପରିକି କରୋନା ମୁକାବିଲା ପାଇଁ ଦେଶରେ ତିଆରି ହୋଇଥିବା ସୁରକ୍ଷା ବ୍ୟବସ୍ଥାକୁ ଭାଇରସ ଭେଦ କରିଯାଇପାରେ ବୋଲି ଆଶଙ୍କା କରୁଛନ୍ତି । ଏହାରି ଭିତରେ ରାଜ୍ୟରେ ଏବେ କରୋନାର ନୂଆ ଠିକଣା ପାଲଟିଛି କଲେଜ କ୍ୟାମ୍ପସ । ପ୍ରତିିଦିନ ଶିକ୍ଷାନୁଷ୍ଠାନରେ କରୋନା ସଂକ୍ରମିତ ଚିହ୍ନଟ ହେଉଥିବା ଖବର ଆସିବାରେ ଲାଗିଛି । ସବୁଠୁ ଉଦବେଗଜନକ ହୋଇଛି ବିଭିନ୍ନ ଶିକ୍ଷାନୁଷ୍ଠାନରେ କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱର ଆଇଆଇଟି, ରାଉରକେଲାର ଏନଆଇଟି ଠାରୁ ଆରମ୍ଭ କରି କଟକ, ସମ୍ବଲପୁର, ଝାରସୁଗୁଡାର କିଛି କଲେଜରେ ମଧ୍ୟ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆଇଆଇଟି ଭୁବନେଶ୍ୱରରେ ମୋଟ ୧୦ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ସମସ୍ତ ସଂକ୍ରମିିତ କ୍ୟାମ୍ପସରେ ଆଇସୋଲେସନରେ ଅଛନ୍ତି । ଏନଆଇଟି ରାଉରକେଲାରେ ମୋଟ ସଂକ୍ରମିତଙ୍କ ସଂଖ୍ୟା ୧୪ ରହିଛି । ଏନଆଇଟିର ସବୁ ପରୀକ୍ଷା ଅନଲାଇନରେ ହେବ ବୋଲି କଲେଜ କତ୍ରୁପକ୍ଷ ସୂଚନା ଦେଇଥିଲେ । ଭବାନିପାଟଣାରେ ପ୍ରଗତି କଲେଜରେ ୩୨ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ରେଭେନ୍ସା ବିଶ୍ୱବିଦ୍ୟାଳୟରେ ୩ ଜଣ କରୋନା ପଜିଟିଭ ଚିହ୍ନଟ ହୋଇଥିଲେ ।
କଟକର ଘରୋଇ ସ୍କୁଲରେ ୧୭ ପଜିଟିଭ ଚିହ୍ନଟ ହୋଇଛନ୍ତି । ଅଫଲାଇନ ବଦଳରେ ଅନଲାଇନରେ ପରୀକ୍ଷା କରିବାକୁ ବଢ଼ୁଛି ବିଭିନ୍ନ ଇଞ୍ଜିନିୟରିଂ କଲେଜ ଛାତ୍ରଛାତ୍ରୀଙ୍କ ଦାବି । କଟକ ସ୍ଥିତ ବୋଷ ଇଞ୍ଜିନିୟରିଂ ସ୍କୁଲ, ବ୍ରହ୍ମପୁର ଉମାଚରଣ ପଟ୍ଟନାୟକ ଇଞ୍ଜିନିୟରିଂ ସ୍କୁଲ ଓ ରାଉରକେଲା ୟୁଜିଆଇଇ ଏବଂ ଡ଼ିଏଭି ପଲିଟେକ୍ନିକର ଛାତ୍ରଛାତ୍ରୀ ବିକ୍ଷୋଭ ପ୍ରଦର୍ଶନ କରିଛନ୍ତି । ଛାତ୍ରଛାତ୍ରୀ କଲେଜ ଗେଟରେ ତାଲା ପକାଇ, ବିକ୍ଷୋଭ ପ୍ରଦର୍ଶନ କରିଛନ୍ତି । ବୋଷର ଛାତ୍ରଛାତ୍ରୀମାନେ ହାତରେ ପ୍ଲାକାର୍ଡ ଧରି, କଲେଜ ଗେଟ ଆଗରେ ଟାୟାର ଜାଳି ବିରୋଧ କରିଛନ୍ତି । ବୋଷ କଲେଜରୁ ୩ ଜଣ କରୋନା ଆକ୍ରାନ୍ତ ଚିହ୍ନଟ ହେବା ପରେ ମଧ୍ୟ କଲେଜ କର୍ତୃପକ୍ଷ ଘଟଣାକୁ ଚପେଇ ଦେବାକୁ ଉଦ୍ୟମ କରୁଥିବା ଅଭିଯୋଗ କରିଛନ୍ତି ଆନ୍ଦୋଳନକାରୀ ଛାତ୍ର । ଆସନ୍ତାକାଲିଠାରୁ ହେବାକୁ ଥିବା ତୃତୀୟ ଓ ଷଷ୍ଠ ସେମିଷ୍ଟାରକୁ ଅନଲାଇନ ମାଧ୍ୟମରେ କରିବାକୁ ଦାବି କରି ଆନ୍ଦୋଳନକୁ ଓହ୍ଲାଇଛନ୍ତି ଛାତ୍ରଛାତ୍ରୀ ।
ଅଫ ଲାଇନ ପରୀକ୍ଷା ନିଷ୍ପତିରୁ ଇଂଜିନିୟରିଂ ସ୍କୁଲ କର୍ତୃପକ୍ଷ ନ ଓହରିଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି କହିଛନ୍ତି ବିକ୍ଷୋଭକାରୀ । କିନ୍ତୁ ଏଠାରେ ପ୍ରଶ୍ନ ଉଠୁଛି କାହିଁକି ଶିକ୍ଷାନୁଷ୍ଠାନରେ ମାଡୁଛି କରୋନା । ଆଗକୁ ମାଟ୍ରିକ ପରୀକ୍ଷା ଅଛି, ପରିସ୍ଥିତି ନିୟନ୍ତ୍ରଣକୁ ନଆସିଲେ କିପରି ପରୀକ୍ଷା କରାଯିବ, ଏ ନେଇ ଆଶଙ୍କା ବଢୁଛି । କ୍ୟାମ୍ପସରେ କରୋନା ବଢୁଥିବାବେଳେ କେମିତି ହେବ ଆଗକୁ ଥିବା ପରୀକ୍ଷା ? ଅନଲାଇନ ପରୀକ୍ଷା ହୋଇପାରିବ କି ବିକଲ୍ପ ? ଅଫଲାଇନ ପରୀକ୍ଷା ହେଲେ ବଢିବନି ତ ସଂକ୍ରମଣ ? ଯଦି ଅଫଲାଇନ ପରୀକ୍ଷା ହୁଏ ତେବେ ପାଳନ ହୋଇପାରିବ କି ଏସଓପି ? ପିଲାଙ୍କ ଭବିଷ୍ୟତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇ୍ଛି ।