କଳାହାଣ୍ଡି ପଞ୍ଚାୟତ ଭୋଟରେ କ’ଣ ରହିବ ମମିତା ପ୍ରସଙ୍ଗର ପ୍ରଭାବ? ବିଜେଡି ଓ ଦିବ୍ୟଶଙ୍କରଙ୍କ ପାଇଁ ନିର୍ବାଚନ ହେବ ଏସିଡ୍ ଟେଷ୍ଟ ।
ପ୍ରଦୀପ୍ତ ନାୟକଙ୍କ ଅନୁପସ୍ଥିତିରେ, ବସନ୍ତଙ୍କ ଉପରେ ଗୁରୁ ଭାର । ଭକ୍ତ ଦାସଙ୍କ ପତିଆରାର ମିଳିବ ଉତ୍ତର
କନକ ବ୍ୟୁରୋ: ଶିକ୍ଷୟତ୍ରୀ ମମିତା ମେହେର ହତ୍ୟାକାଣ୍ଡ ମାମଲା ସାରା ରାଜ୍ୟରେ ଚହଳ ପକାଇଥିଲା । ହେଲେ ଏହି ହତ୍ୟାକାଣ୍ଡ କଳାହାଣ୍ଡିରେ ଘଟିଥିବାରୁ ପଞ୍ଚାୟତ ନିର୍ବାଚନକୁ ଏହି ଘଟଣା କେମିତି ପ୍ରଭାବିତ କରିବ ତା ଉପରେ ଏବେ ରହିଛି ସମସ୍ତଙ୍କ ନଜର । ସେହିପରି ପଞ୍ଚାୟତ ନିର୍ବାଚନରେ କଳାହାଣ୍ଡିରେ କେଉଁ ଦଳର କେଉଁ ନେତାଙ୍କର ପତିଆରା ରହୁଛି ତା ସମସ୍ତଙ୍କ ଫୋକସରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ରାଜନୀତିକୁ ଦୋହଲାଇ ରଖିଥିବା ମମିତା ମେହେର ହତ୍ୟା ପ୍ରସଙ୍ଗ ପଞ୍ଚାୟତ ଭୋଟକୁ ପ୍ରଭାବିତ କରିବ କି? ସେନେଇ ଏବେ ନିର୍ବାଚନରେ ବାର୍ତ୍ତା ଦେବେ କଳାହାଣ୍ଡି ବାସୀ । ନିଜ ନିର୍ବାଚନ ମଣ୍ଡଳୀରେ ମନ୍ତ୍ରୀ ଆହ୍ୱାନର ସାମ୍ନା କରିବେ କି? ପୁରା ଜିଲ୍ଲାରେ ବିଜେଡିର ପ୍ରଦର୍ଶନ ପ୍ରଭାବିତ ହେବ କି? ସେ ନେଇ ଭୋଟର ଶୁଣାଇବେ ରାୟ ।
କଳାହାଣ୍ଡି ବିଜେଡି ରାଜନୀତିର ୪ ବଡ ଚେହେରା ହେଉଛନ୍ତି ଦିବ୍ୟଶଙ୍କର ମିଶ୍ର, ପୁଷ୍ପେନ୍ଦ୍ର ସିଂଦେଓ, ସୁଜିତ କୁମାର ଏବଂ ଭୂପିନ୍ଦର ସିଂ । ଏହି ଚାରି ଜଣେ ନେତା ଏବେ ଜିଲ୍ଲା ରାଜନୀତିରେ ପ୍ରଭାବ ବିସ୍ତାର ପାଇଁ ଉଦ୍ୟମରତ । ହେଲେ ଦିବ୍ୟଶଙ୍କରଙ୍କ ପଛରେ ଦଳ ଯେଉଁଭଳି ଦୃଢ ଭାବେ ଠିଆ ହେଲା, ତାହା ତାଙ୍କ ଗୁରୁତ୍ୱ ବଢାଇଦେଲା । ହେଲେ ଏହା ଦଳ ପାଇଁ ବୁମେରାଂ ବି ହୋଇପାରେ । ଅସନ୍ତୁଷ୍ଟ ଓ ଦଳୀୟ କନ୍ଦଳକୁ ଦଳ କିଭଳି ପ୍ରଶମିତ କରୁଛି, ତା ଉପରେ ନିର୍ଭର କରୁଛି ଭୋଟବ୍ୟାଙ୍କ ।
୨୦୧୭ରେ ଜିଲ୍ଲା ପରିଷଦରେ ଏକତରଫା ବିଜୟ ହାସଲ କରିଥିବା ବିଜେପି ସାମ୍ନାରେ ମଧ୍ୟ ଅନେକ ଆହ୍ୱାନ । ବିରୋଧୀଦଳ ନେତା ପ୍ରଦୀପ୍ତ ନାୟକ ଅସୁସ୍ଥ ହୋଇ ଚିକିତ୍ସିତ ହେଉଛନ୍ତି । ତେଣୁ ସାଂସଦ ବସନ୍ତ ପଣ୍ଡାଙ୍କ ଉପରେ ପୁରା ଦଳର ସଂଗଠନ ନିର୍ଭର କରୁଛି । ଜିଲ୍ଲା ରାଜନୀତିକୁ ସେ ନିଜ ନିୟନ୍ତ୍ରଣରେ ରଖିପାରୁଛନ୍ତି କି ନାହିଁ, ତାର ହେବ ଅଗ୍ନିପରୀକ୍ଷା । ଅନ୍ୟପଟେ ୨୦୧୭ ଓ ୨୦୨୨ ସ୍ଥିତି ମଧ୍ୟରେ ଅନେକ ପରିବର୍ତ୍ତନ ଆସିଛି । ଯଦିଓ ପଶ୍ଚିମ ଓଡିଶାରେ ବିଜେପିର ସଂଗଠନ ମଜଭୁତ ବୋଲି କୁହାଯାଏ ଓ ଦଳର ସମସ୍ତ ସାଂସଦ ଏହି ଅଞ୍ଚଳରୁ ନିର୍ବାଚିତ ହୋଇଛନ୍ତି, ତେଣୁ ଦଳ ସପକ୍ଷରେ ହାୱା ସୃଷ୍ଟି ହେବ ବୋଲି ଅନୁମାନ କରାଯାଉଛି । ସେହିଭଳି କଂଗ୍ରେସ ନେତା ଭକ୍ତ ଦାସଙ୍କ ପାଇଁ ମଧ୍ୟ ଏହି ନିର୍ବାଚନ ଚ୍ୟାଲେଞ୍ଜ ଆଣିବ । ସାଂଗଠନିକ ସ୍ତରରେ ନିଜ ଦବଦବା ଜାହିର କରିବାକୁ ଏହା ସେମାନଙ୍କ ପାଇଁ ଏକ ସୁଯୋଗ ।
ତେବେ ଓବିସି ପ୍ରସଙ୍ଗରେ ରାଜ୍ୟ ସରକାରଙ୍କ ଭୂମିକା ବିବାଦୀୟ ହୋଇଥିବାରୁ, ଏହି ବର୍ଗର ନେତା ବିଜେଡିକୁ ଭୋଟ ନଦେବାକୁ ଆହ୍ୱାନ ଦେବା, ଜିଲ୍ଲା ରାଜନୀତିକୁ ସରଗରମ କରିଛି । ସୂଚନାଯୋଗ୍ୟ ଯେ, ୨୦୧୭ରେ ଜିଲ୍ଲାର ୩୬ ଜିଲ୍ଲା ପରିଷଦ ଆସନରୁ ବିଜେପି ୩୩ ଆସନ ଦଖଲ କରି ଜିଲ୍ଲା ପରିଷଦ ନିଜ କବଜାକୁ ନେଇଥିଲା । ତେବେ ୨୦୨୨ରେ କାହା ଭାଗରେ କେତେ ଆସନ ପଡୁଛି, ପ୍ରସଙ୍ଗ ଭିତ୍ତିକ ନା ରାଜ୍ୟସ୍ତରୀୟ ମୁଦ୍ଦା ଉପରେ ଭୋଟ ହେବ ତା ଉପରେ ନଜର ।