ଆତ୍ମହତ୍ୟା ଉଦ୍ୟମ କରି ବର୍ତ୍ତି ଯାଇଥିବା ବ୍ୟକ୍ତିଙ୍କ ପ୍ରତି କି ପ୍ରକାର ବ୍ୟବହାର ହେବା ଉଚିତ୍ : ଦଣ୍ଡ ପାଇବେ ନା ଯତ୍ନ; ସ୍ପଷ୍ଟ କରିବାକୁ କେନ୍ଦ୍ରକୁ କହିଲେ ସୁପ୍ରିମକୋର୍ଟ
କନକ ବ୍ୟୁରୋ : ଆତ୍ମହତ୍ୟା ଉଦ୍ୟମ କରିଥିବା ବ୍ୟକ୍ତିଙ୍କ ପ୍ରତି କି ପ୍ରକାର ବ୍ୟବହାର ହେବା ଉଚିତ୍? ଆଇପିସିର ଧାରା ୩୦୯ ଆଧାରରେ ତାଙ୍କୁ ଦଣ୍ଡ ବିଧାନ କରିବା ଉଚିତ, ନା ମେଂଟାଲ ହେଲଥ ଆକ୍ଟ ୧୧୫ରେ ତାଙ୍କର ଯତ୍ନ ନିଆଯିବା କଥା । ଏନେଇ ସ୍ପଷ୍ଟ କରିବାକୁ କେନ୍ଦ୍ର ସରକାରଙ୍କୁ କହିଛନ୍ତି ସୁପ୍ରିମକୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଅର୍ଥାତ ଦୁଇଟାଯାକ ବ୍ୟବସ୍ଥା ଭିତରୁ କାହାର ସାମ୍ବିଧାନିକ ବୈଧତା ଅଧିକ ରହିଛି ତାହା ଜଣାଇବା ପାଇଁ କହିଛନ୍ତି କୋର୍ଟ । କେହି ଆତ୍ମହତ୍ୟା ପାଇଁ ଉଦ୍ୟମ କଲେ ତାଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନ ଅନୁଯାୟୀ ମାମଲା ହୋଇଥାଏ । ଦୋଷୀ ସାବ୍ୟସ୍ତ ହେଲେ ସର୍ବାଧିକ ୧ ବର୍ଷ ଯାଏଁ ଜେଲ ଦଣ୍ଡାଦେଶ ମଧ୍ୟ ହୋଇଥାଏ । କିନ୍ତୁ ଗଭୀର ମାନସିକ ଅବସାଦରୁ ଏଭଳି ଉଦ୍ୟମ କରିଥିବା ପ୍ରମାଣ ହେଲେ ମେଂଟାଲ ହେଲଥ ଆକ୍ଟର ଧାରା ୧୧୫ରେ ଦଣ୍ଡାଦେଶରୁ ରିହାତି ମିଳିଥାଏ ।
ଏପରିକି ଧାରା ୧୧୫ର ଅପଧାରା ୨ ଅନୁସାରେ ତାଙ୍କର ଉପଯୁକ୍ତ ଯତ୍ନ ନେବା ସହ ଚିକିତ୍ସା ଯୋଗାଇ ଦେଇ ମାନସିକ ଅବସାଦରୁ ମୁକ୍ତ କରିବା ପାଇଁ ସରକାର ବନ୍ଦୋବସ୍ତ କରିବେ । ଏବେ ଏହି ଦୁଇଟିଯାକ ବ୍ୟବସ୍ଥାକୁ ନେଇ ଦ୍ୱନ୍ଦ୍ୱ ଉପୁଜିଛି । ଏ ସଂପର୍କିତ ଏକ ମାମଲାର ଶୁଣାଣି କରି ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେ, ବିଚାରପତି ଜଷ୍ଟିସ ଏଏସ ବୋପନ୍ନା ଏବଂ ଜଷ୍ଟିସ ଭି ସୁବ୍ରମଣିଅନଙ୍କ ଖଣ୍ଡପୀଠ କେନ୍ଦ୍ର ସରକାରଙ୍କ ମତାମତ ଲୋଡିଛନ୍ତି ।