କେମିତି ହୁଏ କିଡନୀ ପ୍ରତ୍ୟାରୋପଣ ? କ’ଣ ରହିଛି ଅଙ୍ଗ ପ୍ରତ୍ୟାରୋପଣ ନିୟମ ? ଜାଣନ୍ତୁ କିଡନୀ ଦଲାଲଙ୍କଠୁ ବର୍ତ୍ତିବେ କେମିତି…
କନକ ବ୍ୟୁରୋ: କିଡନୀ ରୋଗରେ ପୀଡିତ ବ୍ୟକ୍ତି ଯେତେବେଳେ ଜୀବନ ମୃତ୍ୟୁର ସଂଘର୍ଷ କରୁଥାନ୍ତି, ସେତେବେଳେ ଏହାର ସୁଯୋଗ ନେଇଥାନ୍ତି ଦଲାଲ । କିଡନୀ ଯୋଗାଇ ଦେବାର ମିଛ ପ୍ରତିଶ୍ରୁତି ଦେଇ ଲକ୍ଷ ଲକ୍ଷ ଟଙ୍କା ଠକି ନେଇଥାନ୍ତି । ଠକେଇ ଅଭିଯୋଗରେ ଗିରଫ ହୋଇଥିବା ହିମାଂଶୁ ଭୂଷଣ ନନ୍ଦକୁ ରିମାଣ୍ଡରେ ନେଇଛି କମିଶନରେଟ୍ ପୁଲିସ । କିଡନୀ ରାକେଟର ଚେର କେତେ ପର୍ଯ୍ୟନ୍ତ ଲମ୍ବିଛି, ଏନେଇ ପଚରାଉଚରା କରି କିଡନୀ ଠକ ଠାରୁ ସତ ଓଗାଳିବ ପୋଲିସ । ଏହି ରାକେଟରେ ଘରୋଇ ଡାକ୍ତରଖାନା ଓ କିଛି କର୍ମଚାରୀଙ୍କ ସଂପର୍କ ଥିବା ନେଇ ହେଉଥିବା ଅଭିଯୋଗ ଉପରେ ମଧ୍ୟ ଅଧିକ ତନାଘନା କରାଯିବ ।
Kanak News is now on WhatsApp
Join and get latest news updates delivered to you via WhatsApp
କେମିତି ହୁଏ କିଡନୀ ପ୍ରତ୍ୟାରୋପଣ? କ’ଣ ରହିଛି ଅଙ୍ଗ ପ୍ରତ୍ୟାରୋପଣ ନିୟମ? କୌଣସି ଅଙ୍ଗ ପ୍ରତ୍ୟାରୋପଣ ଏତେ ସହଜ ନୁହେଁ । ଏଥିରେ ରହିଛି ବହୁ କଟକଣା । କେନ୍ଦ୍ର ସରକାରଙ୍କ ନିୟମ ଅନୁସାରେ କେଉଁମାନେ ଦାନ କରିପାରିବେ କିଡ୍ନୀ ତାହା ଉପରେ ନଜର ପକାଇବା …
ରକ୍ତ ସଂପର୍କୀୟ – ବାପା, ମାଆ, ଭାଇ, ଭଉଣୀ, ପୁଅ, ଝିଅ, ନାତି, ନାତୁଣୀ, ଜେଜେବାପା, ଜେଜେମାଆ
ଅନ୍ୟ ଭାବଗତ ସମ୍ପର୍କୀୟ – ବନ୍ଧୁ, ସ୍ୱାମୀ/ସ୍ତ୍ରୀ, ଭଲ ପାଉଥିବା ବ୍ୟକ୍ତି
ଏହା ସହ ଦାତାଙ୍କ ତଥ୍ୟ ନେଇ ୨୭ ପ୍ରକାର କାଗଜପତ୍ର ଆବଶ୍ୟକ । ଏହି ସମସ୍ତ କାମ ଜଣେ ଡାକ୍ତରଙ୍କ ତତ୍ୱାବଧାନରେ ହୋଇଥାଏ । ସରକାରଙ୍କ ଅନୁମତି ମିଳିବା ପରେ କିଡ୍ନୀ ପ୍ରତ୍ୟାରୋପଣ ହେବା ସମ୍ଭବପର ବୋଲି କହିଛନ୍ତି ବିଶେଷଜ୍ଞ । ତେବେ ଭାବଗତ ସଂପର୍କର ନକଲି କାଗଜପତ୍ର ଦେଖାଇ ଦଲାଲ ମାନେ ଠକାମୀ କରୁଥିବା କୁହାଯାଉଛି । ତେବେ ଆଇନ୍ ଅନୁସାରେ ଏହି ପ୍ରକ୍ରିୟା ନକଲେ ପ୍ରତ୍ୟାରୋପଣ ସମ୍ଭବ ନୁହେଁ । ଲୋକଙ୍କ ଅସୁବିଧା ଓ ଅଜ୍ଞତାର ସୁଯୋଗ ନେଉଛନ୍ତି ଦଲାଲ ।
କିଡନୀ ପ୍ରତ୍ୟାରୋପ ଘଟଣାର ଅଧିକ ତଦନ୍ତ ପରେ ଏହା ପଛରେ ଥିବା ରାକେଟର ଗୁମର ଫିଟିବ ବୋଲି ଆଶା କରାଯାଉଛି । ସେପଟେ ଅଙ୍ଗ ପ୍ରତ୍ୟାରୋପଣ ନେଇ ଅଧିକ ସଚେତନତାର ଆବଶ୍ୟକତା ମଧ୍ୟ ରହିଛି ।