ହମାସ ସଂଗଠନ କଣ , କେବେ ହେଇଥିଲା ସ୍ଥାପନା ?

ଏବେ ଇସ୍ରାଏଲ ଓ ହମାସ ମଧ୍ୟରେ ଚାଲିଥିବା ଭୟଙ୍କର ଯୁଦ୍ଧ ବିଷୟରେ ସମସ୍ତେ ଅବଗତ ଅଛନ୍ତି ।

ଗତ ଶନିବାର ଦିନ  ଜଳ, ସ୍ଥଳ ଓ ଆକାଶମାର୍ଗ ତିନି ଦିଗରୁ ଅତର୍କିତ ଭାବେ ଆକ୍ରମଣ କରି ଇସ୍ରାଏଲର ଶତାଧିକ ନିରୀହ ଜନସାଧାରଣଙ୍କୁ ହତ୍ୟା କରିଛି ଓ ଅନେକଙ୍କୁ ପଣବନ୍ଦୀ କରିରଖିଛି ହମାସ ।

ହମାସ ଓ ଇସ୍ରାଏଲ ମଧ୍ୟରେ ଏ ଯୁଦ୍ଧ ନୂଆ ନୁହେଁ । ଗତ କେଇ ଦଶନ୍ଧିରୁ ଏପରି ଚାଲିଆସିଛି । କିନ୍ତୁ ଏଥରର ଆକ୍ରମଣ ପୂର୍ବରୁ ଯେତେ ଆକ୍ରମଣ ହେଇଥିଲା ସବୁଠାରୁ ଘାତକ ଓ ଭୟଙ୍କର । ହମାସ ସୁନିୟୋଜିତ ଢଙ୍ଗରେ ଏପରି ଆକ୍ରମଣ  କରିଛି ଯେ ପୃଥିବୀର ସବୁଠୁ ଭଲ ଗୁଇନ୍ଦା ସଂସ୍ଥା କୁହାଯାଉଥିବା ‘ମୋସାଦ’ ଏହାର ଟିକେ ବି ଟେର ପାଇଲାନି ।

ଏ ହମାସ କଣ ?

କେବେ ଏହାର ସ୍ଥାପନ ହୋଇଥିଲା ?

ଏହାର ଉଦ୍ଦେଶ୍ୟ କଣ ?

ଆସନ୍ତୁ ଆଜିର ଷ୍ଟୋରିରେ ଜାଣିବା ହମାସ ବିଷୟରେ

ହମାସ ୨୦୦୭ ରୁ ଗାଜାପଟିକୁ କବଜା କରି ରଖିଛି ।

ପାଲେଷ୍ଟାଇନର ଉଗ୍ରବାଦୀ ସଂଗଠନ ‘ହାମାସ’ର ଇତିହାସ ବେଶି ନହେଲେ ବି ୫୦ ବର୍ଷରୁ ଅଧିକ ଅଟେ । ୧୯୮୦ ରେ ଏହା ଆରମ୍ଭ ହୋଇଥିଲା ।  ଶେଖ ଅହମ୍ମଦ ୟାସିନ ନାମକ ଜଣେ ବ୍ୟକ୍ତି ଏହାକୁ ପ୍ରତିଷ୍ଠା କରିଥିଲେ । ସେ ଜଣେ ଦିବ୍ୟାଙ୍ଗ ବ୍ୟକ୍ତି ଥିଲେ । ସେ ଛୋଟବେଳୁ ଚାଲିବୁଲି ପାରୁନଥିଲେ । ୧୨ ବର୍ଷ ବୟସରୁ ହୁଇଲ ଚେୟାରରେ ବସି ଚଲାବୁଲା କରନ୍ତି । ୧୯୮୭ ମସିହାରେ ଇସ୍ରାଏଲ ବିରୁଦ୍ଧରେ ପ୍ରଥମ ‘ଇନ୍ତିଫାଦା’ ଘୋଷଣା ହୋଇଥିଲା ।  ‘ଇନ୍ତିଫାଦା’ର ଅର୍ଥ  ସାଧାରଣତ ବିଦ୍ରୋହ ବୋଲି ବିବେଚନା କରାଯାଏ ।  ୧୯ ୮୮ ରେ, ହମାସା ଘୋଷଣା କରିଥିଲା ଯେ ଏହାର ଏକମାତ୍ର ଲକ୍ଷ୍ୟ ହେଉଛି ପାଲେଷ୍ଟାଇନକୁ ମୁକ୍ତ କରିବା । ୧୯୯୨ ରେ ଏହାର ସଶସ୍ତ୍ର ବିଭାଗ ଗଠନ କରାଯାଇଥିଲା । ୧୯୯୩ ରୁ ୨୦୦୫ ପର୍ଯ୍ୟନ୍ତ ହମାସ ଇସ୍ରାଏଲ ଉପରେ ଅନେକ ଆତ୍ମଘାତୀ ଆକ୍ରମଣ କରିଥିଲା ।

୨୦୦୫ ରେ ହମାସ ହିଂସା ଠାରୁ ନିଜକୁ ଦୂରେଇ ରଖିଥିଲା  କିନ୍ତୁ ମାତ୍ର ବର୍ଷକ ପରେ ୨୦୦୬ରେ ଏହା ପୁଣି  ଗାଜାରୁ ଇସ୍ରାଏଲ ଉପରେ ଅନେକ ଥର ରକେଟ୍ ଆକ୍ରମଣ କରିଥିଲା । ୨୦୦୬ ରେ ଗାଜାରେ ବଳପୂର୍ବକ କ୍ଷମତା ହାସଲ କରିଥିଲା । ୨୦୦୭ ରୁ ଗାଜା ଷ୍ଟ୍ରିପ୍ ସଂପୂର୍ଣ୍ଣ ଭାବେ ହମାସ କବଜାରେ ଅଛି । ବର୍ତ୍ତମାନ ଗାଜା ଷ୍ଟ୍ରିପରେ ଏକ ହମାସ ନିଜର ସରକାର ଗଠନ କରିଛି । କାନାଡା, ୟୁରୋପୀୟ ୟୁନିଅନ୍, ଇସ୍ରାଏଲ୍, ଜାପାନ ଏବଂ ଆମେରିକା ହାମାସକୁ ଆତଙ୍କବାଦୀ ସଂଗଠନ ବୋଲି ଘୋଷଣା କରିଛନ୍ତି । ସେହିପରି ବ୍ରାଜିଲ, ଚୀନ୍, ଇଜିପ୍ଟ, ଇରାନ, ନରୱେ, କାତାର, ରୁଷ, ସିରିଆ ଏବଂ ତୁର୍କୀ ଏହାକୁ ଆତଙ୍କବାଦୀ ସଂଗଠନ ଭାବରେ ବିବେଚନା କରନ୍ତି ନାହିଁ ।

ଇସ୍ରାଏଲକୁ ଧ୍ଵଂସ କରିବାର ସ୍ବପ୍ନ ଦେଖେ ହମାସ 

୧୯୮୮ ରେ ହମାସ ଏହାର ସଂସ୍ଥାପକ  ଚାର୍ଟରେ ଇସ୍ରାଏଲ୍ ଧ୍ୱଂସ କରିବାକୁ ଆହ୍ଵାନ କରିଥିଲା । ଏହାର ଯୋଦ୍ଧାମାନେ ଇସ୍ରାଏଲକୁ ଧ୍ୱଂସ କରିବାକୁ ଶପଥ ନିଅନ୍ତି । ତଥାପି ୧୯୬୭ ଯୁଦ୍ଧରେ ଇସ୍ରାଏଲ ଦ୍ୱାରା କବଜା କରିଥିବା ସମସ୍ତ ପାଲେଷ୍ଟାଇନ ଅଞ୍ଚଳରେ ଏକ କାର୍ଯ୍ୟକ୍ଷମ ପାଲେଷ୍ଟାଇନ ରାଜ୍ୟ ବଦଳରେ ହମାସ ନେତାମାନେ ବାରମ୍ବାର ଇସ୍ରାଏଲ ସହିତ ଦୀର୍ଘ ମିଆଦି ଅସ୍ତ୍ରବିରତିର ସର୍ତ୍ତ ରଖନ୍ତି ।  ଅନ୍ୟପକ୍ଷରେ, ଇସ୍ରାଏଲ୍ ଏହାକୁ ଏକ ପ୍ରତାରଣା ବୋଲି ବିଚାର କରେ ।

ହାମାସର ନେତାମାନେ ମଧ୍ୟ ପୂର୍ବର ଅନେକ ଦେଶରେ ଅଛନ୍ତି

ହାମାସ୍ ସେହି ମିଳିତ ମଞ୍ଚର ଏକ ଅଂଶ ଯେଉଁଥିରେ ଇରାନ, ସିରିଆ ଏବଂ ଲେବାନନ୍ ଭିତ୍ତିକ ସିଆ ଇସଲାମବାଦୀ ଗୋଷ୍ଠୀ ହିଜବୁଲ୍ଲା  ଅନ୍ତର୍ଭୁକ୍ତ। ଏହି ସଂଗଠନ ମଧ୍ୟପ୍ରାଚ୍ୟ ଏବଂ ଇସ୍ରାଏଲରେ ଆମେରିକାର ନୀତିକୁ ବ୍ୟାପକ ବିରୋଧ କରେ । ଯଦିଓ ହାମାସର ଆଧାର ଏବଂ ଶକ୍ତି ଗାଜା ଅଞ୍ଚଳରେ ହିଁ ଅଛି ତେବେ ପାଲେଷ୍ଟାଇନ ଅଞ୍ଚଳରେ ଏହାର ସମର୍ଥକ ମଧ୍ୟ ଅଛନ୍ତି । ଏହାର ନେତାମାନେ କତାର ସମେତ ମଧ୍ୟ ପୂର୍ବର ଅନେକ ଦେଶରେ ଅଛନ୍ତି । ଇରାନ ଏହାକୁ ପ୍ରଥମରୁ ସମର୍ଥନ ଦେଇଆସୁଛି । ଏହାର ଆଦର୍ଶ ମୁସଲିମ ଚରମପନ୍ଥୀ ସଂଗଠନ ‘ମୁସଲିମ ବ୍ରଦର ହୁଡ’ର ଆଦର୍ଶ ସହିତ ମେଳ ଖାଉଛି । ‘ମୁସଲିମ ବ୍ରଦର ହୁଡ’ର ସ୍ଥାପନା ୧୯୨୦ ଦଶକରେ ଇଜିପ୍ଟ ରେ ହେଇଥିଲା ।