ଜନତା କର୍ଫ୍ୟୁ ଓ ଲକ୍ ଡାଉନ୍ ମଧ୍ୟରେ ପାର୍ଥକ୍ୟ କ’ଣ? ସରଳ ଭାଷାରେ ବୁଝାଇଲେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ ।
କନକ ବ୍ୟୁରୋ: ‘କରୋନା’ର ସଫଳ ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ସରକାର ସଜାଗ । ଏହି ମର୍ମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତାକାଲି ଦେଶବାସୀଙ୍କୁ ଜନତା କର୍ଫ୍ୟୁ ପାଳନ କରିବାକୁ ଆହ୍ୱାନ ଦେଇଥିବାବେଳେ ଓଡ଼ିଶାରେ କରୋନା ମୁକାବିଲା ପାଇଁ କଡ଼ା ପଦକ୍ଷେପ ନେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜନତା କର୍ଫ୍ୟୁ ପାଳନ କରିବା ସହ ଆସନ୍ତାକାଲିଠୁ ପ୍ରଥମ ପର୍ଯ୍ୟାୟରେ ରାଜ୍ୟର ୫ଟି ଜିଲ୍ଲାସହ ୮ଟି ସହରରେ ଲକ୍ ଡଉନ୍ ବା ତାଲାବନ୍ଦ ପାଳନ କରିବାକୁ ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ । ତେବେ ପ୍ରଶ୍ନ ଉଠିବା ସ୍ୱାଭାବିକ ଯେ, ଜନତା କର୍ଫ୍ୟୁ ଏବଂ ଲକ୍ ଡାଉନ୍ ଭିତରେ ପାର୍ଥକ୍ୟ କ’ଣ ?
Kanak News is now on WhatsApp
Join and get latest news updates delivered to you via WhatsApp
ଜନତା କର୍ଫ୍ୟୁ ଏବଂ ଲକ୍ ଡାଉନ୍ ଭିତରେ ଥିବା ଦ୍ୱନ୍ଦକୁ ଦୂର କରି ଏହାକୁ ସରଳ ଭାଷାରେ ବୁଝାଇଛନ୍ତି ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ । ବାଗଚୀଙ୍କ କହିଛନ୍ତି କି, ଜନତା କର୍ଫ୍ୟୁ ଦିନିକିଆ ପାଳନ କରାଯାଏ ଯେଉଁଥିରେ ଟ୍ରେନ୍, ବିମାନ ଚଳାଚଳ ଠାରୁ ଆରମ୍ଭ କରି ସମସ୍ତ ଯାନବାହାନ ଚଳାଚଳ ବନ୍ଦ ରହିଥାଏ । ହେଲେ ଲକ୍ ଡାଉନ୍ ପର୍ଯ୍ୟାୟକ୍ରମେ କିଛି ଜିଲ୍ଲା ଏବଂ ସହରରେ ଲାଗୁ କରାଯାଇଥାଏ । ସବୁଠାରୁ ବଡ଼ କଥା ହେଲା କି, ଲକ୍ ଡାଉନ ବେଳେ ଟ୍ରେନ୍, ବସ୍ ଏବଂ ବିମାନ ଚଳାଚଳ ବ୍ୟବସ୍ଥା ସ୍ୱାଭାବିକ ରହିବ । ତେବେ କାଲିଠାରୁ ରାଜ୍ୟର ୫ଟି ଜିଲ୍ଲା ସହ ୮ ସହରରେ ଆସନ୍ତା ୨୯ ତାରିଖ ରାତି ୯ଟା ଯାଏଁ ଏହାକୁ ଲାଗୁ କରିବାକୁ ସରକାର ନିଷ୍ପତି ନେଇଛନ୍ତି ରାଜ୍ୟ ସରକାର ।
ସବୁଠାରୁ ବଡ଼କଥା ହେଲା , ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଅତି ଜରୁରୀ ନହେଲେ ଘରୁ ନବାହାରିବା ପାଇଁ ପରାମର୍ଶ ଦିଆଯାଇଛି । କାରଣ ଆଗାମୀ ସପ୍ତାହ ଆମ ପାଇଁ ଖୁବ୍ ଗୁରୁତ୍ୱପୂର୍ଣ୍ଣ । କେବଳ ସଚେତନତା ଦ୍ୱାରା ହିଁ ଏହାକୁ ରୋକାଯାଇପାରିବ । ଏପରିକି ଘରେ ରହିଲେ ହିଁ ଆପଣଙ୍କ ସହ ଆପଣଙ୍କ ପରିବାର ସୁରକ୍ଷିତ ରହିପାରିବ । ତେଣୁ ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ଏହାକୁ ସତର୍କତା ସହ ପାଳନ କରିବାକୁ ନିବେଦନ କରିଛନ୍ତି । କାରଣ ଘରୁ ନବାହାରିଲେ ଏହାର ସଂକ୍ରମଣତାକୁ ରୋଗାଯାଇ ପାରିବ ।