୨୦ ପରେ କ’ଣ ହେବ କୋହଳ, କାହା ଉପରେ କଟକଣା ? ଇଙ୍ଗିତ ଦେଲା କେନ୍ଦ୍ର ଗୃହ ମନ୍ତ୍ରାଳୟ; ଅଣ ହଟସ୍ପଟ୍ ଅଂଚଳରେ ଗ୍ରାମୀଣ ଅର୍ଥନୀତିକୁ ସ୍ୱାଭାବିକ କରିବାକୁ ନିଆଯାଇପାରେ ପଦକ୍ଷେପ
କୃଷି ସଂପର୍କୀତ ସବୁ କ୍ଷେତ୍ର ହୋଇପାରେ କଟକଣା ମୁକ୍ତ
କନକ ବ୍ୟୁରୋ: ଏପ୍ରିଲ ୨୦ ତାରିଖ ପରେ କେଉଁଠି କଟକଣା କୋହଳ ହେବ ଏବଂ କେଉଁଠି କଟକଣା ବଳବତର ରହିବ ସେ ନେଇ କେନ୍ଦ୍ର ସରକାରୃଙ୍କ ଗୃହ ବିଭାଗ ସଙ୍କେତ ଦେଇଛି । ହଟସ୍ପଟ୍ ଅଂଚଳ ତଥା କଂଟେନମେଂଟ୍ ଅଂଚଳକୁ ବାଦ ଦେଇ ଅନ୍ୟ ସ୍ଥାନରେ ଗ୍ରାମିଣ ଅର୍ଥନୀତିକୁ ଆଖି ଆଗରେ ରକି କିଛି କଟକଣା ପ୍ରତ୍ୟାହାର କରାଯାଇପାରେ । କୃଷି ସମ୍ପର୍କିତ ପ୍ରାୟ ସମସ୍ତ କ୍ଷେତ୍ରକୁ ଅଣ-ହଟସ୍ପଟ୍ ଅଂଚଳରେ ସମ୍ପୂର୍ଣ୍ଣ ଭାବେ କଟକଣା ମୁକ୍ତ କରାଯିବାର ସମ୍ଭାବନା ଅଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ହଟସ୍ପଟ୍ ବା ଅଧିକ ପ୍ରଭାବିତ ଅଂଚଳରେ ଏଣିକି ପୁଲ ଟେଷ୍ଟ ବା କମ୍ ସମୟରେ ଅଧିକ ଲୋକଙ୍କ ପରୀକ୍ଷା କରାଯାଇ ପାରିବ । ବିଶେଷକରି ଭୁବନେଶ୍ୱରରେ ଚିହ୍ନଟ ହୋଇଥିବା ହଟସ୍ପଟ୍ ଅଂଚଳରେ ଏହି ପୁଲ ଟେଷ୍ଟ କରିବାକୁ ନିଷ୍ପତି ନେଇଛନ୍ତି ରାଜ୍ୟ ସରକାର । କରୋନା ନମୂନା ପରୀକ୍ଷା କିଟ୍ର ଅଭାବ, ବ୍ୟୟବହୁଳ ଓ ସମୟ ସାପେକ୍ଷ ପରୀକ୍ଷା ଭଳି ସମସ୍ୟାକୁ ଦୂର କରିବା ପାଇଁ ଭାରତ ଭଳି ଜନବହୁଳ ରାଷ୍ଟ୍ରରେ ପୁଲ ଟେଷ୍ଟିଂ ପାଇଁ ଆଡଭାଇଜରୀ ଜାରି କରିଛି ଇଣ୍ଡିଆନ୍ କାଉନସିଲ ଅଫ୍ ମେଡିକାଲ ରିସର୍ଚ୍ଚ ବା ଆଇସିଏମ୍ଆର୍ ।
ପୁଲ ଟେଷ୍ଟିଂ ହେଉଛି – ସର୍ବାଧିକ ପାଂଚ ଜଣଙ୍କ ସ୍ୱାବ ସଂଗ୍ରହ କରି ଏକାଠି କରାଯିବ । ଏହାକୁ ଏକକ ସାମ୍ପଲ ଭାବେ ନିଆଯାଇ ପରୀକ୍ଷା କରାଯିବ । ଯଦି ଏହା ନେଗେଟିଭ୍ ଆସେ, ତେବେ ସମସ୍ତ ୫ ଜଣ କରୋନା ନେଗେଟିଭ୍ ବୋଲି ଘୋଷଣା କରାଯିବ । ଯଦି ଏହି ନମୁନା ପଜିଟିଭ୍ ଆସେ, ତେବେ ୫ ଜଣଙ୍କ ଅଲଗା ଅଲଗା ପରୀକ୍ଷା କରାଯାଇ କାହାର ପଜିଟିଭ୍ ଅଛି ଚିହ୍ନଟ କରାଯିବ । ବିଶେଷ କରି ଯେଉଁ ଅଂଚଳର ସଂକ୍ରମଣ ହାର କମ୍ ରହିଛି, ସେଠାରେ ପୁଲ ଟେଷ୍ଟିଂ ପଦ୍ଧତି ଗ୍ରହଣ କରାଯିବ । ଫଳରେ କମ ସମୟରେ ଓ କମ୍ ଖର୍ଚ୍ଚ ବା କିଟ୍ ବ୍ୟବହାର କରି ଅଧିକ ଲୋକଙ୍କ ପରୀକ୍ଷା କରିବା ସମ୍ଭବ ହେବ । ଯେଉଁ ଅଂଚଳରେ ପଜିଟିଭ୍ ହାର ୫ ପ୍ରତିଶତରୁ ଅଧିକ ସେହି ଅଂଚଳରେ ପୁଲ ଟେଷ୍ଟିଂ ବା ନମୁନା ଏକାଠି କରି ପରୀକ୍ଷା କରାଯିବ ନାହିଁ ବୋଲି ଆଇସିଏମ୍ଆର୍ ସ୍ପଷ୍ଟ କରିଛି । ଓଡ଼ିଶାରେ ସଂକ୍ରମଣ ହାର ଏକ ପ୍ରତିଶତରୁ କମ୍ ଥିବାରୁ ପୁଲ ଟେଷ୍ଟିଂ ଫଳପ୍ରଦ ହେବ ବୋଲି ବିଚାର କରାଯାଉଛି ।