ମହାଲିଙ୍ଗ କଲେଜରେ ଚାଲିଥିଲା ସେକ୍ସ ସ୍କାଣ୍ଡାଲ, ଦିଆଯାଉଥିଲା ଯୌନ ନିର୍ଯାତନା । ପଢନ୍ତୁ, ମମିତା ମେହେର ମୃତ୍ୟୁ ମାମଲାରେ କ’ଣ କହିଲେ ବିଜୟ ମହାପାତ୍ର?
କନକ ବ୍ୟୁରୋ: ମମିତା ମେହେର୍ ହତ୍ୟା ମାମଲାରେ ଦାଖଲ ହୋଇଥିବା କେସ୍ ଡାଏରୀ ଆଧାରରେରେ ସାମ୍ନାକୁ ଆସିଥିବା ତଥ୍ୟ ସାଂଘାତିକ ଦିଗ ସାମ୍ନାକୁ ଆଣିଛି । ଯାହା ପୋଲିସର ତଦନ୍ତ ପ୍ରକ୍ରିୟା ଉପରେ ପ୍ରଶ୍ନଚିହ୍ନ ସୃଷ୍ଟି କରିଛି । କେସ୍ ଡାଏରୀ ଅନୁସାରେ, ମହାଲିଙ୍ଗ କଲେଜ ଏବଂ ସ୍କୁଲରେ ଛାତ୍ରୀ ଓ ମହିଳା କର୍ମଚାରୀଙ୍କୁ ଦିଆଯାଉଥିଲା ଯୌନ ନିର୍ଯ୍ୟାତନା । ଆଉ ଏନେଇ ଯେତେବେଳେ ମମିତା ମେହେର୍ ତଥ୍ୟ ପ୍ରଘଟ କରିଦେବେ ବୋଲି କହିଲେ, ସେତେବେଳେ ଗୋବିନ୍ଦ ତାଙ୍କୁ ହତ୍ୟା କରିବାକୁ ମସୁଧା କରିଥିଲା । ପୂର୍ବରୁ ହତ୍ୟା ପଛରେ ପରକୀୟା ପ୍ରୀତି ହିଁ କାରଣ ବୋଲି କହୁଥିବା ପୋଲିସ ସେକ୍ସ ସ୍କାଣ୍ଡାଲର ଦିଗ ପ୍ରତି କାହିଁକି ଚୁପ୍ ରହିଥିଲା, ସେନେଇ ପ୍ରଶ୍ନ ଉଠିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ମମିତା ହତ୍ୟା ମାମଲାରେ ସାରାରାଜ୍ୟ ହୁଲୁସ୍ତୁଲ ହେଉଥିବାବେଳେ, ପୋଲିସର କେସ୍ ଡାଏରୀ ସମ୍ପୂର୍ଣ୍ଣ ମାମଲାର ମୋଡ ବଦଳାଇ ଦେଇଛି । କେସ ଡାଏରୀକୁ ଦେଖାଇ ପୁଲିସର ତଦନ୍ତ ପ୍ରକ୍ରିୟା ନେଇ ପ୍ରଶ୍ନ ଉଠାଇବା ସହ ବର୍ଷିଛନ୍ତି ବିଜେପି ନେତା ବିଜୟ ମହାପାତ୍ର । ମହାଲିଙ୍ଗ କଲେଜରେ ଚାଲିଥିବା ସେକ୍ସ ସ୍କାଣ୍ଡାଲ ନେଇ ପୁଲିସ କାହିିଁକି ତଦନ୍ତ କରୁନାହିଁ ସେ ନେଇ ପ୍ରଶ୍ନ କରିଛନ୍ତି ଓ ଜବାବ ମାଗିଛନ୍ତି ବିଜୟ । ଆଉ ବିଜେଡି କହିଛି, ତଦନ୍ତ ନେଇ ଉତ୍ତର ଦେବ ପୁଲିସ୍ ।
କଲେଜରେ ଚାଲିଥିଲା ସେକ୍ସ ସ୍କାଣ୍ଡାଲ । କଲେଜ ଛାତ୍ରୀ ଏବଂ ମହିଳା କର୍ମଚାରୀଙ୍କୁ ଦିଆଯାଉଥିଲା ଯୌନ ନିର୍ଯ୍ୟାତନା ଆଉ ଏହାର ଖଳନାୟକ ଥିଲା ନିଜେ ଗୋବିନ୍ଦ ସାହୁ । ହତ୍ୟାର ଶିକାର ହୋଇଥିବା ମମିତା ମେହେର୍ ଏହି ଅନୈତିକ କାର୍ଯ୍ୟର ବିରୋଧ କରିଥିଲେ । ନିଜ ଅପକର୍ମର କାଳେ ଖୁଲାସା ହୋଇଯିବ, ତେଣୁ ମମିତାଙ୍କୁ ରାସ୍ତାରୁ ହଟାଇଥିଲା ଗୋବିନ୍ଦ । ମମିତା ହତ୍ୟା ମାମଲାରେ ଦାଖଲ ହୋଇଥିଲା କେସ୍ ଡାଏରୀକୁ ଦେଖାଇ ସରକାରଙ୍କ ଉପରେ ବର୍ଷିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର । ବଙ୍ଗମୁଣ୍ଡା ଜେଏମଏଫସି କୋର୍ଟରେ ପୋଲିସ ଦାଖଲ କରିଥିବା ପ୍ରାଥମିକ ତଦନ୍ତ ରିପୋର୍ଟ ସାମ୍ନାକୁ ଆସିବା ପରେ ଅନେକ ପ୍ରଶ୍ନ ସୃଷ୍ଟି ହୋଇଛି ।
- କାହିଁକି ସେକ୍ସ ସ୍କାଣ୍ଡାଲ ବାବଦରେ ପୁଲିସ ଆଜିଯାଏଁ ଚୁପ୍ ରହିଥିଲା?
- ହତ୍ୟା ପାଇଁ ପରକୀୟା ପ୍ରୀତିକୁ କାରଣ ଦର୍ଶାଇ ଏହାକୁ ଲୁଚାଯାଇଥିଲା କି?
- ଡିଆଇଜି ଅଳ୍ପ ତଥ୍ୟ ଦେଇ ବେଶୀ ତଥ୍ୟ ଲୁଚାଇଥିଲେ କି?
- ଯୌନ ନିର୍ଯ୍ୟାତନାର ଶିକାର ଛାତ୍ରୀ, କର୍ମଚାରୀଙ୍କୁ ପଚରାଉଚୁରା କରିବ କି?
ଅନ୍ୟପଟେ ବିଜୟଙ୍କ ଅଭିଯୋଗକୁ ସମର୍ଥନ କରିଛନ୍ତି ପୂର୍ବତନ ପୋଲିସ ଡିଜି ସଂଜୀବ ମାରିକ । ହତ୍ୟାକାଣ୍ଡର ମୂଳ କାରଣ ସେକ୍ସ ସ୍କାଣ୍ଡାଲ ହୋଇଥିବା ବେଳେ ପୋଲିସ କାହିଁକି ସେ ଦିଗରେ ତଦନ୍ତ କରୁନାହିଁ ବୋଲି ପ୍ରଶ୍ନ କରିଛନ୍ତି । ଆଉ ଏପଟେ ତଦନ୍ତକୁ ନେଇ ଉଠିଥିବା ପ୍ରଶ୍ନର ଉତ୍ତର ପୋଲିସ ଦେବ ବୋଲି କହିଛନ୍ତି ବିଜେଡି ମୁଖପାତ୍ର ସସ୍ମିତ୍ ପାତ୍ର । ମମିତା ମାମଲାରେ ପୋଲିସ ଚାପଗ୍ରସ୍ତ ହୋଇ କାର୍ଯ୍ୟ କରୁଥିବା ମଧ୍ୟ ଅଭିଯୋଗ କରିଛନ୍ତି ବିଜୟ । ଏଫଆଇଆର ରୁଜୁୁ ଏବଂ କେସ୍ ଡାଏରୀ ଦାଖଲ ମଧ୍ୟରେ ଥିବା ସମୟର ଫରକକୁ ନେଇ ସେ ସନ୍ଦେହ ମଧ୍ୟ ପ୍ରକଟ କରିଛନ୍ତି ।