ରୋଚକ ହେଉଛି ପଶ୍ଚିମବଙ୍ଗ ରାଜନୀତି । ବିଜେପି ଛାଡି ଘରବାହୁଡିବାକୁ ପୁଣି ମନବଳେଇଲେଣି ଟିଏମସି ଛାଡିଥିବା ନେତା ।

କନକ ବ୍ୟୁରୋ : ସରଗରମ ପଶ୍ଚିମବଙ୍ଗ ରାଜନୀତି । ଯେଉଁ ନେତା ନିର୍ବାଚନ ପୂର୍ବରୁ ଟିଏମସି ଛାଡ଼ି ବିଜେପିରେ ସାମିଲ ହୋଇଥିଲେ, ଏବେ ସେମାନେ ପୁଣି ଘର ବାହୁଡ଼ିବାକୁ ଚିନ୍ତା କରୁଥିବା କଥା ଚର୍ଚ୍ଚା ହେଉଛି । ଏହାରି ଭିତରେ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ମୁକୁଲ ରାୟ ମେ’ରେ ଫଳାଫଳ ଆସିବା ପର ଠାରୁ ଚୁପ୍ ଅଛନ୍ତି, ଏପରିକି ଶୁଣିବାକୁ ମିଳୁଛି ଯେ, ମୁକୁଲ ୟୁ-ଟର୍ଣ୍ଣ ନେଇପାରନ୍ତି ଓ ଟିଏମସିକୁ ଫେରିପାରନ୍ତି ।

ପୁଣି ଚର୍ଚ୍ଚାରେ ପଶ୍ଚିମବଙ୍ଗ ରାଜନୀତି । ସାଧାରଣ ନିର୍ବାଚନ ପୂର୍ବରୁ ପ୍ରତିଦିନ ଟିଏମସି ନେତା ଦଳ ଛାଡି ଗେରୁଆ ଦଳରେ ସାମିଲ ହେଉଥିଲେ । ଏପରିକି ମମତା ବାନାର୍ଜିଙ୍କ ଘନିଷ୍ଠ ସହଯୋଗୀ ଶୁଭେନ୍ଦୁ ଅଧିକାରୀ ମଧ୍ୟ ବିଜେପିରେ ଯୋଗ ଦେଇଥିଲେ ।  ଏହାପରେ ନିର୍ବାଚନ ଫଳାଫଳ ଆସିଲା ଏବଂ ବିଜେପି ନିରାଶ ହେବା ସହ କ୍ଷମତା ବଜାୟ ରଖିଲା ଟିଏମସି । ଏହାପରେ ଭାରତୀୟ ରାଜନୀତିରେ ସବୁବେଳେ ଯାହା ଦେଖିବାକୁ ମିଳେ ତାହା ହିଁ ଘଟୁଛି ଓ ଟିଏମସି ଛାଡିଥିବା ନେତା ପୁଣି ଥରେ ଦଳକୁ ଫେରିବାକୁ ମନ ବଳାଇଛନ୍ତି । ଯେଉଁ କେତେକ ହେଭିୱେଟଙ୍କୁ ନେଇ ଅଧିକ ଚର୍ଚ୍ଚା ତାରି ଭିତରେ ରହିଛି ମୁକୁଲ ରାୟଙ୍କ ନାଁ । ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ମୁକୁଲ ରାୟ ମେ ଦୁଇ ଫଳାଫଳ ଆସିବା ପରଠାରୁ ଚୁପ ଅଛନ୍ତି । ମୁକୁଲ ରାୟ ମଧ୍ୟ ୟୁ ଟର୍ଣ ନେଇପାରନ୍ତି ବୋଲି ଶୁଣିବାକୁ ମିଳୁଛି।

କୋଭିଡ଼ ଆକ୍ରାନ୍ତ ହୋଇ ହସ୍ପିଟାଲରେ ଚିକିତ୍ସିତ ହେଉଥିବା ମୁକୁଲ ରାୟଙ୍କ ପତ୍ନୀଙ୍କ ସ୍ୱାସ୍ଥ୍ୟବସ୍ଥା ବୁଝିବା ପାଇଁ ଜୁନ ୨ରେ ମମତା ବାନାର୍ଜୀଙ୍କ ପୁତୁରା ଅଭିଷେକ ହସ୍ପିଟାଲରେ ପହଞ୍ଚିଥିଲେ । ଯାହା ମୁକୁଲ ରାୟଙ୍କ ଦଳ ଛାଡିବା ଚର୍ଚ୍ଚାରେ ଘିଅ ଢାଳିବା ଭଳି କାମ କରିଛି । ସେପଟେ ପଶ୍ଚିମବଙ୍ଗ ବିଜେପି ମୁଖ୍ୟ ଦିଲ୍ଲୀପ ଘୋଷ ବି ଡାକ୍ତରଖାନା ପହଞ୍ଚିଥିବା ବେଳେ ପ୍ରଧାନମନ୍ତ୍ରୀ ମୋଦୀ ମଧ୍ୟ ତାଙ୍କ ସ୍ୱାସ୍ଥ୍ୟ ସମ୍ପର୍କରେ ପଚାରି ବୁଝିଥିଲେ । ୨୦୧୭ରେ ଟିଏମସି ଛାଡି ବିଜେପିରେ ସାମିଲ ହୋଇଥିବା ମୁକୁଲ ରାୟ ଏକଦା ମମତା ବାନାର୍ଜୀଙ୍କ ସବୁଠୁ ନିକଟତର ସହଯୋଗୀ ହୋଇ ରହିଥିଲେ ।

ନିର୍ବାଚନ ପୂର୍ବରୁ  ୩୩ଜଣ ଟିଏମସି ବିଧାୟକ ବିଜେପିରେ ସାମିଲ ହୋଇଥିଲେ। ଏବେ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁସାରେ ୩୦ରୁ ଅଧିକ ବିଧାୟକ ପୁଣି ଥରେ ଘର ବାହୁଡ଼ିବା ପାଇଁ ଇଚ୍ଛା ପ୍ରକାଶ କରିଛନ୍ତି । ଏପରିକି ମେ ୨ରେ ଫଳ ପ୍ରକାଶ ପାଇବା ପରେ ନେତାମାନେ ଖୋଲାଖୋଲି ଭାବେ ଟିଏମସିକୁ ଫେରିବା ନେଇ ମତ ଦେଇଛନ୍ତି । ନେତା ଦଳ ଛାଡିବା ପ୍ରସଙ୍ଗକୁ ନେଇ ସରଗରମ ହୋଇଛି ବଙ୍ଗ ରାଜନୀତି। ତେବେ ବିଜେପି ଏଭଳି ଚର୍ଚ୍ଚାକୁ ଅସ୍ବୀକାର କରିଥିବା ବେଳେ ଅପରପକ୍ଷରେ ନେତାଙ୍କ ଘର ବାହୁଡା ନେଇ ଟିଏମସିର ଶୀର୍ଷ ନେତୃତ୍ୱ ନିଷ୍ପତି ନେବ ବୋଲି ଦଳ କହିଛି।

ସୋନାଲି ଗୁହା ଓ ସାରଳା ମୁର୍ମୁ ପରି ନେତା ମଧ୍ୟ ପୁଣି ଟିଏମସି ଫେରିବାକୁ ମନ ବଳାଇ ସାରିଛନ୍ତି । ଏପରିକି ଭୁଲ ହୋଇଯାଇଛି ଏବଂ ସେ ମମତାଙ୍କ ନିକଟରେ କ୍ଷମା ପ୍ରାର୍ଥନା କରୁଥିବା କହିଛନ୍ତି ସାରଳା ମୁର୍ମୁ । ସେହିପରି ବିଧାନସଭାର ପୂର୍ବତନ ଡେପୁଟି ସ୍ପିକର ସୋନାଲୀ ଗୁହା ମଧ୍ୟ ଟିଏମସି ଛାଡ଼ିଥିବାରୁ ଭୁଲ ମାଗିବା ସହ ବିଜେପିରେ ସେ ଅଣନିଶ୍ବାସୀ ହୋଇପଡିଥିଲେ ଏବଂ ଦିଦି ଯେବେ ଡାକିବେ ସେ ପୁଣି ଟିଏମସିରେ ସାମିଲ ହେବେ ବୋଲି କହିଛନ୍ତି ।