କନକ ବ୍ୟୁରୋ : ବିଜେପି ଶୂନ୍ୟ ହେବ କି ପଶ୍ଚିମବଙ୍ଗ ? ଗତ ବିଧାନସଭା ନିର୍ବାଚନରେ ପଶ୍ଚିମବଙ୍ଗର ବିଜେପି ନେତାମାନେ ଧାଡିବାନ୍ଧି ମମତାଙ୍କ ହାତ ଧରୁଥିବା ଦେଖିବାକୁ ମିଳିଛି । ଜଣଙ୍କ ପରେ ଜଣେ ବିଧାୟକଙ୍କ ସମେତ ପଶ୍ଚିମବଙ୍ଗ ବିଜେପି ନେତାମାନେ ଏବେ ଟିଏମସି ମୁହାଁ ହୋଇଛନ୍ତି । ଏହି କ୍ରମରେ ଆଜି ବିଜେପି ନେତା ରାଜୀବ ବାନାର୍ଜୀ ଟିଏମସିରେ ଯୋଗ ଦେଇଛନ୍ତି । ସେ ତ୍ରୀପୁରାରେ ଅଭିଶେଷ ବାନାର୍ଜୀଙ୍କ ଦ୍ୱାରା ଆୟୋଜିତ ଏକ ସଭାରେ ଟିଏମସିରେ ଯୋଗ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଟିଏମସି ସରକାରରେ ମନ୍ତ୍ରୀଥିବା ରାଜୀବ ବାନାର୍ଜୀ ଦଳ ଛାଡି ବିଜେପିରେ ଯୋଗ ଦେଇଥିଲେ । ହେଲେ ମାସ କେଇଟା ସେଠାରେ ରହିବା ପରେ ପୁଣି ମମତାଙ୍କ କୋଳକୁ ଫେରିଛନ୍ତି । ଏହା ପୂର୍ବରୁ ବି ବିଜେପିର ଅନେକ ବିଧାୟକ, ସାଂସଦ ଓ ନେତା ବିଜେପିରୁ ମୋହଭଙ୍ଗ କରି ମମତାଙ୍କ ହାତ ଧରିଛନ୍ତି । କିଛିଦିନ ପୂର୍ବରୁ ପୂର୍ବତନ କେନ୍ଦ୍ରମନ୍ତ୍ରୀ ବାବୁଲ ସୁପ୍ରିୟୋ ବିଜେପି ଛାଡି ଟିଏମସିରେ ଯୋଗ ଦେଇଥିଲେ । ବିଧାନସଭା ନିର୍ବାଚନରେ ବିଜେପି ସରକାର ଗଠନ କରିବା ଭଳି ବହୁମତ ନପାଇବାରୁ ବିଜେପିର ଅନେକ ନେତା ଟିଏମସିରେ ଯୋଗ ଦେଉଛନ୍ତି ବୋଲି ରାଜନୈତିକ ବିଶେଷଜ୍ଞମାନେ ମତ ଦେଇଛନ୍ତି ।
କେବଳ ସେତିକି ନୁହେଁ ଟିଏମସିର ଅନେକ ବିଧାୟକ ଓ ନେତା ଯେଉଁମାନେ ନିର୍ବାଚନ ପୂର୍ବରୁ ଦଳଛାଡି ବିଜେପିରେ ଯୋଗଦେଇଥିଲେ ସେମାନେ ଏବେ ଦଳମୁହାଁ ହେଉଛନ୍ତି । ରାଜୀବଙ୍କ ପରେ ଏଭଳି ଅନେକ ବିଜେପି ନେତା ରହିଛନ୍ତି ଯେଉଁମାନେ ଖୁବଶୀଘ୍ର ଟିଏମସିରେ ଯୋଗଦେବା ନେଇ ଅନୁମାନ କରାଯାଇଛି । କେବଳ ବିଜେପି ନେତା ନୁହଁନ୍ତି କଂଗ୍ରେସ ନେତ୍ରୀ ସୁସ୍ମିତା ଦେବ ବି ଦଳ ଛାଡି ଟିଏମସିରେ ଯୋଗ ଦେଇଥିଲେ ଓ ପରେ ଟିଏମସି ତାଙ୍କୁ ରାଜ୍ୟସଭାକୁ ପଠାଇଛି ।