ବିଜେପି ବିରୋଧରେ ବିରୋଧୀଙ୍କୁ ଏକାଠି କରିବାକୁ କଂଗ୍ରେସ ଚଳାଇଛି ପ୍ରୟାସ, ସୋନିଆ ଗାନ୍ଧୀଙ୍କ ବୈଠକରେ ଯୋଗ ଦେବେ ମମତା ବାନାର୍ଜୀ
କନକ ବ୍ୟୁରୋ : ଆଗାମୀ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ବିରୋଧୀମାନଙ୍କୁ ଏକଜୁଟ କରିବାକୁ ପ୍ରୟାସ ଆରମ୍ଭ କରିଛି କଂଗ୍ରେସ । ଏହି କ୍ରମରେ ଅଗଷ୍ଟ ୨୦ ତାରିଖରେ ବିରୋଧୀଦଳ ନେତାଙ୍କୁ ନେଇ ସୋନିଆ ଗାନ୍ଧୀ ଏକ ବୈଠକ କରିବାକୁ ଯାଉଛନ୍ତି । ଏହି ବୈଠକରେ ସମାନ ବିଚାରଧାରା ଥିବା ଦଳର ନେତାମାନେ ଯୋଗଦେବେ । ଏହି ବୈଠକ ଭର୍ଚୁଆଲ ପ୍ଲାଟଫର୍ମରେ ହେବ । ଏହି ବୈଠକରେ ଅନ୍ୟମାନଙ୍କ ସହ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସାମିଲ ହେବେ । କହିରଖୁ କି ଏହି ବୈଠକରେ ମମତା ବାନାର୍ଜୀଙ୍କ ସହ ଅନେକ ବିରୋଧୀଦଳର ନେତା ବି ଯୋଗ ଦେବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିପୁଳ ଆସନରେ ବିଜୟଲାଭ କରି ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ହେବା ପରେ ଦିଲ୍ଲୀ ଗସ୍ତରେ ଯାଇ ସୋନିଆ ଗାନ୍ଧୀଙ୍କୁ ଭେଟିଥିଲେ ମମତା ବାନାର୍ଜୀ । ଏହି ଗସ୍ତବେଳେ ସେ କଂଗ୍ରେସର ବରିଷ୍ଠ ନେତା କମଲ ନାଥଙ୍କ ସହ ବିରୋଧୀଦଳର ଅନେକ ନେତାଙ୍କୁ ଭେଟିଥିଲେ । ଏହାପରେ ମମତା ବାନାର୍ଜୀଙ୍କ ପକ୍ଷରୁ ବିଜେପି ବିରୋଧରେ ଏକ ମେଣ୍ଟ ପ୍ରସ୍ତୁତ କରିବାକୁ ପ୍ରୟାସ ଆରମ୍ଭ ହୋଇଛି । ୨୦ ତାରିଖରେ ସୋନିଆ ଗାନ୍ଧୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ବୈଠକରେ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଯୋଗ ଦେବାକୁ ସହମତି ପ୍ରକାଶ କରିଛନ୍ତି । ଏହାପୂର୍ବରୁ କଂଗ୍ରେସର ବରିଷ୍ଠ ନେତା କପିଲ ଶିବଲ ବି ନଜ ବାସଭବନରେ କିଛି ବିରୋଧୀ ନେତାଙ୍କୁ ନେଇ ଏକ ବୈଠକ କରିଥିଲେ ।
ଅଗଷ୍ଟ ୨୦ ରେ ହେବାକୁ ଥିବା ବୈଠକରେ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ, ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ସମେତ ବାମଦଳ ଓ ଅନ୍ୟ ବିରୋଧୀଦଳର ନେତାମାନଙ୍କୁ ସୋନିଆ ଗାନ୍ଧୀଙ୍କ ତରଫରୁ ନିମନ୍ତ୍ରଣ କରାଯାଇଛି । ଅନୁମାନ କରାଯାଉଛି କି ଏହି ବୈଠକରେ ଆଗାମୀ ୨୦୨୪ ରେ ହେବାକୁ ଥିବା ଲୋକସଭା ନିର୍ବାଚନ ନେଇ ବିଶେଷ ଆଲୋଚନା ହୋଇପାରେ ।