ରାଜ୍ୟଗୋଷ୍ଠୀ କ୍ରୀଡା ୨୦୧୮ର ପ୍ରଥମ ଦିନରେ ଭାରତ ପାଇଁ ସ୍ୱର୍ଣ୍ଣ ପଦକ ହାସଲ କରିଛନ୍ତି ମହିଳା ଭାରତ୍ତୋଳନକାରୀ ମୀରାବାଇ ଚାନୁ । ୪୮ କେଜି ବର୍ଗରେ ଚାନୁ ଏହି ପଦକ ହାସଲ କରିଛନ୍ତି । ଯେଉଁଥିରେ ଏହି ଖେଳାଳୀ ୧୯୬ କିଲୋର ଓଜନ ଉଠାଇ ନିଜ ରେକର୍ଡ ଭାଙ୍ଗିଛନ୍ତି । ତାଙ୍କର ପୂର୍ବ ରେକର୍ଡ ୧୯୪ କେଜି ଓଜନର ଥିଲା ଯାହାକି ୨୩ବର୍ଷୀୟ ଏହି ଭାରତ୍ତୋଳନକାରୀ ୨୦୧୬ ନଭେମ୍ବରରେ ବିଶ୍ୱ ଚାମ୍ପିୟନସିପରେ କରିଥିଲେ ।
Advertisment
publive-imageଚଳିତ ରାଜ୍ୟଗୋଷ୍ଠୀ କ୍ରୀଡାରେ ନିଜର ସେହି ୬ମିନିଟର ପ୍ରଦର୍ଶନରେ ମୀରାବାଇ ଚାନୁ ୬ଥର ଏହି ଓଜନ ଉଠାଇଥିଲେ ଏବଂ ୬ଟି ରେକର୍ଡ ଭାଙ୍ଗିଲେ ।  ଭାରତ ତରଫରୁ କର୍ଣ୍ଣମ ମଲ୍ଲେଶ୍ୱରୀ ୧୯୯୫ ମସିହାରେ ବିଶ୍ୱ ଚାମ୍ପିୟନସିପ ଜିତିଥିଲେ । ଆଉ ଏହା ପରେ ଦୀର୍ଘ ସମୟ ବ୍ୟବଧାନରେ ମୀରାବାଇ ଚାନୁ ୨୦୧୬ ମସିହାରେ ବିଶ୍ୱ ଚାମ୍ପିୟନ ହୋଇଥିଲେ । ସେଠାରେ ୪୮ କିଲୋ ବର୍ଗରେ ତାଙ୍କର ପୂର୍ବ ରେକର୍ଡ ୧୭୫ କିଲୋ ଥିଲା ।
ଏହି ରେକର୍ଡ ପରେ ଚଳିତ ବର୍ଷ ରାଜ୍ୟଗୋଷ୍ଠୀ କ୍ରୀଡାରେ ସ୍ୱର୍ଣ୍ଣପଦକ ହାସଲ କରି ମୀରାବାଇ ଚାନୁ ୨୦୨୨ରେ ହେବାକୁ ଥିବା ଟୋକିଓ ଅଲମ୍ପିକ୍ସରେ ପଦକ ହାତେଇବା ଆଶାକୁ ମଜବୁତ କରିଛନ୍ତି । ୨୦୦୭ ମସିହାରେ ଭାରତ୍ତୋଳନର ଆରମ୍ଭ କରିଥିବା ମଣିପୁରର ଏହି ଖେଳାଳୀଙ୍କୁ ଏହି ବର୍ଷ ପଦ୍ମଶ୍ରୀ ଉପାଧି ଦିଆଯାଇଛି । ଗତ ବର୍ଷ ମଣିପୁରର ମୁଖ୍ୟମନ୍ତ୍ରୀ ବିଶ୍ୱ ଚାମ୍ପିୟନସିପରେ ସ୍ୱର୍ଣ୍ଣପଦକ ହାସଲ କରିବାରୁ ମୀରାବାଇ ଚାନୁଙ୍କୁ ୨୦ଲକ୍ଷ ଟଙ୍କାର ପୁରସ୍କାର ଦେଇଥିଲେ ।
ଭାରତ୍ତୋଳନରେ ଖେଳାଳୀଙ୍କୁ ଦୁଇଟି ପର୍ଯ୍ୟାୟରେ ଓଜନ ଉଠାଇବାକୁ ପଡିଥାଏ । ପ୍ରଥମ ପର୍ଯ୍ୟାୟକୁ ସ୍ନେଚ ଓ ଦ୍ୱିତୀୟ ପର୍ଯ୍ୟାୟକୁ କ୍ଲିନ ଏଣ୍ଡ ଜର୍କ କୁହାଯାଏ । ପ୍ରଥମ ପର୍ଯ୍ୟାୟରେ ଓଜନକୁ ତଳୁ ଉଠାଇ ସିଧାସଳଖ ମୁଣ୍ଡ ଉପରକୁ ଅଣାଯାଇଥାଏ । ଏବଂ ଦ୍ୱିତୀୟ ପର୍ଯ୍ୟାୟରେ ଓଜନକୁ ତଳୁ ଉଠାଇବା ପରେ କାନ୍ଧ ପାଖରେ ରଖିବାକୁ ପଡେ ଓ ଏହା ପରେ ମୁଣ୍ଡ ଉପରକୁ ଅଣାଯାଇଥାଏ ।