୨୦୨୯ ସୁଦ୍ଧା ଭାରତ ତୃତୀୟ ଶ୍ରେଷ୍ଠ ଅର୍ଥବ୍ୟବସ୍ଥା! ବ୍ରିଟେନ ପରେ ଏହି ଦେଶକୁ ମାତ୍ ଦେବାର ରହିଛି ଯୋଜନା ...

କନକ ବ୍ୟୁରୋ: ଭାରତ, ୟୁନାଇଟେଡ୍ କିଙ୍ଗଡମ୍ ବା ୟୁକେକୁ ପଛରେ ପକାଇ ବିଶ୍ୱର ପଞ୍ଚମ ଶ୍ରେଷ୍ଠ ଅର୍ଥବ୍ୟବସ୍ଥା ପାଲଟିଛି । ଭାରତର ଅର୍ଥବ୍ୟବସ୍ଥା ବର୍ତ୍ତମାନ ୩.୫ ଲକ୍ଷ ଡଲାରର ହୋଇସାରିଛି । ବ୍ରିଟେନର ବର୍ତ୍ତମାନର ଅର୍ଥବ୍ୟବସ୍ଥା ୩.୨ ଲକ୍ଷ ଡଲାର ଥିବା ବେଳେ ଭାରତ ଏହାକୁ ଅତିକ୍ରମ କରିଛି । ଏହାକୁ ନେଇ ବିଭିନ୍ନ ଆଡୁ ଦେଶକୁ ଶୁଭେଚ୍ଛା ମିଳିବାରେ ଲାଗିଛି । ଦେଶର ଶୀର୍ଷ ବ୍ୟାଙ୍କର ଉଦୟ କୋଟକ ଭାରତର ପିଠି ଥାପୁଡେଇଥିବା ବେଳେ ଗୋଟିଏ ସତ ଆଡକୁ ମଧ୍ୟ ଧ୍ୟାନ ଟାଣିଛନ୍ତି ।

ଉଦୟ କୋଟକ ଶନିବାର ଟ୍ୱିଟ କରି ଲେଖିଛନ୍ତି, ‘ଦୁନିଆର ସବୁଠାରୁ ବଡ ଅର୍ଥବ୍ୟବସ୍ଥା ତାଲିକାରେ ଭାରତ ୫ମ ସ୍ଥାନରେ ପହଞ୍ଚିବା ତଥା ଆମର ଔପନିବେଶକ ଶାସକକୁ ପଛରେ ପକାଇବା ଗର୍ବର କଥା । ଭାରତର ୩.୫ ଲକ୍ଷ କୋଟି ଡଲାର ବନାମ ୟୁକେର ୩.୨ ଲକ୍ଷ ଡଲାର । ତେବେ ଜନସଂଖ୍ୟା ତୁଳନାରେ ଭାରତ ୧୪୦ ଅରବ ବନାମ ୟୁକେ ୬.୮ କୋଟି । ଆମର ପ୍ରତି ବ୍ୟକ୍ତିଙ୍କ ଜିଡିପି ୨.୫୦୦ ଡଲାର, ୟୁକେର ପ୍ରତି ବ୍ୟକ୍ତି ଜିଡିପି ୪୭,୦୦୦ ଡଲାର । ଆମକୁ ବହୁତ ଲମ୍ବା ରାସ୍ତା ଅତିକ୍ରମ କରିବାକୁ ପଡିବ, ଏଥିପାଇଁ ଆମକୁ ପ୍ରସ୍ତୁତ ହେବାକୁ ପଡିବ’

ଭାରତ ଚଳିତ ସପ୍ତାହରେ ୟୁକେକୁ ପଛରେ ପକାଇ ବିଶ୍ୱର ପଞ୍ଚମ ଶ୍ରେଷ୍ଠ ଅର୍ଥବ୍ୟବସ୍ଥାରେ ପରିଣତ ହୋଇଥିଲା । ବର୍ତ୍ତମାନଠାରୁ ଦଶ ବର୍ଷ ତଳକୁ ଯଦି ଫେରି ଦେଖିବା ଭାରତ ବିଶ୍ୱର ୧୧ ତମ ଅର୍ଥବ୍ୟବସ୍ଥା ଥିଲା । ସେତେବେଳେ ମଧ୍ୟ ୟୁକେ ୫ମ ସ୍ଥାନରେ ଥିଲା । ଭାରତୀୟ ଅର୍ଥବ୍ୟବସ୍ଥା ଅନେକ ସମୟ ଧରି ୟୁକେର ଅର୍ଥବ୍ୟବସ୍ଥା ସହ ତାଳଦେଇଚାଲୁଥିଲା । ଅପ୍ରେଲ-ଜୁନ ମାସରେ ରେକର୍ଡ ବିସ୍ତାର କାରଣରୁ ଦେଶର ଅର୍ଥନୀତି ୟୁକେ ପଛକୁ ଷଷ୍ଠ ସ୍ଥାନରେ ପହଞ୍ଚିଥିଲା । ବ୍ଲୁମବର୍ଗ ଆଇଏମଏଫର ଡାଟାବେସ ଏବଂ ଐତିହାସିକ ଏକ୍ସଚେଞ୍ଜ ହାର ଆଧାରରେ ଡାଟା ପ୍ରସ୍ତୁତ କରିଥିଲା ଯେଉଁଥିରେ ୟୁକେକୁ ଭାରତ ପଛରେ ପକାଇଦେଇଥିଲା ।

ସେହିଭଳି ଏସବିଆଇର ଅର୍ଥଶାସ୍ତ୍ରୀ କହିଛନ୍ତି ଭାରତ ଗତବର୍ଷ ଡିସେମ୍ବରରେ ହିଁ ୟୁକେକୁ ପଛରେ ପକାଇଦେଇଥିଲା । ବର୍ତ୍ତମାନ ଏହା ବିଶ୍ୱର ୫ମ ଶ୍ରେଷ୍ଠ ଅର୍ଥବ୍ୟବସ୍ଥା, ଏହା ବର୍ତ୍ତମାନ ହୋଇନାହିଁ । ନିକଟରେ ଏସବିଆଇର ଆଉ ଗୋଟିଏ ରିପୋର୍ଟରେ କୁହାଯାଇଛି ଭାରତ ୨୦୨୭ ସୁଦ୍ଧା ଜର୍ମାନୀ ଏବଂ ୨୦୨୯ ସୁଦ୍ଧା ଜାପାନକୁ ପଛରେ ପକାଇ ତୃତୀୟ ଶ୍ରେଷ୍ଠ ଅର୍ଥବ୍ୟବସ୍ଥାରେ ପରିଣତ ହେବ । ଭାରତ ବର୍ତ୍ତମାନ ଅର୍ଥବ୍ୟବସ୍ଥା ଦ୍ରୁତ ଗତିରେ ଆଗକୁ ବଢିବାରେ ଲାଗିଛି ।

ଭାରତ ଦ୍ୱାରା ୟୁକେର ସ୍ଥାନ ନେବା ପରେ ବର୍ତ୍ତମାନ ୫ ସର୍ବଶ୍ରେଷ୍ଠ ଅର୍ଥବ୍ୟବସ୍ଥାର ତାଲିକା କିଛି ଏହିଭଳି ରହିଛି । ଆମେରିକା (୨୩ ଲକ୍ଷ କୋଟି ଡଲାର), ଚୀନ(୧୪.୭୨ ଲକ୍ଷ କୋଟି ଡଲାର), ଜାପାନ(୫.୦୬ ଲକ୍ଷ କୋଟି ଡଲାର) ଜର୍ମାନୀ (୩.୮୫ ଲକ୍ଷ କୋଟି ଡଲାର) ଏବଂ ଭାରତ(୩.୫ ଲକ୍ଷ କୋଟି ଡଲାର) ।