ଚିନ୍ତାରେ ପଡିଛନ୍ତି ତରଭୁଜ ଚାଷୀ । ଶୁଖିଲା ପଡିଛି କେନାଲ, ଜଳାଭାବ ଯୋଗୁଁ ଚାଷ ନଷ୍ଟ
କନକ ବ୍ୟୁରୋ: ଚିନ୍ତାରେ ପଡିଛନ୍ତି ତରଭୁଜ ଚାଷୀ । ପାଣି ଅଭାବରୁ ଗଛ ଭଲ ଭାବରେ ବଢିପାରୁନଥିବା ବେଳେ ଗଛରେ ଲାଗିଲାଣି ରୋଗପୋକ । ନଦୀରୁ ପମ୍ପ ଦ୍ୱାରା ପାଣି ବୋହି ତରଭୁଜ ଚାଷ କରୁଥିବା ବେଳେ କେନାଲର ବ୍ୟବସ୍ଥା ନାହିଁ କି ଉଠା ଜଳସେଚନ ବ୍ୟବସ୍ଥା ନାହିଁ । ଯାହାପାଇଁ ଚାଷୀ ମାନେ ବହୁ ଅସୁବିଧା ଭୋଗୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜକନିକା ବ୍ଳକ କଟଣା ବଣିଆ ପଞ୍ଚାୟତର ବିଭିନ୍ନ ଅଞ୍ଚଳର ଚାଷୀମାନେ ଏହି ତରଭୁଜ ଚାଷ କରି ପରିବାର ଚଳାଇଥାନ୍ତି । ହେଲେ ପାଣି ସମସ୍ୟା ଯୋଗୁ ଏକର ଏକର ଚାଷ ଜମିରେ ଫସଲ ସବୁ ନଷ୍ଟ ହେବାରେ ଲାଗିଛି । କିଛି ବର୍ଷ ହେଲା କେନାଲ ପୋତି ହୋଇପଡିଥିବାରୁ ନଦୀରୁ ବି ଆସୁନି ପାଣି । କେନାଲ ଶୁଖିଲା ପଡିଥିବାରୁ ପାଣି ଅଭାବ ଆଉ ତା ସହ ରୋଗପୋକ ଲାଗି ଫସଲ ନଷ୍ଟ ହୋଇଗଲାଣି । ଯାହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ବଢିଚାଲିଛି ।
ଚଳିତଥର ଚାଷ ପରିମାଣ କମିଯାଇଥିବା ବେଳେ ୧୦ କେଜି ଜାଗାରେ ୨ କେଜି ଫଳିଛି ତରଭୁଜ । ଗଛରେ କାଳମାଣ୍ଡି ପୋକରୁ ନେଇ ଗୁଣ୍ଡିପୋକ ଓ ପାରା ପୋକ ଲାଗି ଫସଲ ଉଜୁଡି ଗଲାଣି । ଯାହାକିଛି ଅମଳ ହେଉଛି ବେପାରୀ ମଧ୍ୟ ଆସୁନାହାନ୍ତି । ବିଭିନ୍ନ ସ୍ଥାନରୁ ଧାର କରଜ କରି ଚାଷ କରିଥିବା ବେଳେ ଏବେ ଋଣ କିଭଳି ସୁଝିବେ ସେ ନେଇ ଚିନ୍ତା ବଢୁଛି । ପରିବାର କିଭଳି ଚଳିବ ବୋଲି ଚାଷୀ କହୁଥିବା ବେଳେ ଖୁବଶୀଘ୍ର ଉଠାଜଳସେଚନ ବ୍ୟବସ୍ଥା କରିବାକୁ ଦାବି ହୋଇଛି । ତେବେ ଚାଷ ଜମିକୁ ଆବଶ୍ୟକ ଭାବେ ଜଳ ଯୋଗାଇବା ସହ ଜଳସେଚନ ପାଇଁ ସମସ୍ତ ବ୍ୟବସ୍ଥା କରିବାକୁ ଦାବି କରିଛନ୍ତି ଚାଷୀମାନେ ।