ରାଜକନିକାରେ ଜୋରଦାର ହେଉଛି ଖରସ୍ରୋତା ଆନ୍ଦୋଳନ । ପ୍ରତିବାଦକାରୀଙ୍କ ସହ ଯୋଗ ଦେବାକୁ ଆସୁଛନ୍ତି ଜଳ ମାନବ ଡକ୍ଟର ରାଜେନ୍ଦ୍ର ସିଂ ।
କନକ ବ୍ୟୁରୋ : ଜୋରଦାର ହେବାକୁ ଯାଉଛି ଖରସ୍ରୋତା ବଞ୍ଚାଅ ଆନ୍ଦୋଳନ । କାରଣ ଏହି ଆନ୍ଦୋଳନରେ ଯୋଗ ଦେବାକୁ ଆସୁଛନ୍ତି ଜଳ ମାନବ ଡକ୍ଟର ରାଜେନ୍ଦ୍ର ସିଂ । ବିଶିଷ୍ଟ ସାମାଜିକ କର୍ମୀ ତଥା ଭାରତର ନଦୀ ଓ ଜଳ ସୁରକ୍ଷା ଆନ୍ଦୋଳନର ପ୍ରମୁଖ ଚେହେରା ଡକ୍ଟର ସିଂ ଯୋଗ ଦେଉଥିବାରୁ ଏହି ଆନ୍ଦୋଳନକୁ ବଳ ମିଳିପାରେ । ଏଥିପାଇଁ ଅଗଷ୍ଟ ୨୪ରେ ଅଚ୍ୟୁତପୁର ଚାଲ ଡାକରା ଦିଆଯାଇଛି । ସେହିପରି ଆନ୍ଦୋଳନରେ ସାମିଲ ହେବାପାଇଁ ଆଳି ଓ ରାଜକନିକା ଲୋକଙ୍କୁ ଆହ୍ୱାନ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡ଼ା ରାଜକନିକା ବ୍ଲକ ବରୁଣାଡ଼ିଆ ପଡ଼ିଆରେ ମେଗା ପାନୀୟ ଜଳ ପ୍ରକଳ୍ପ ନିର୍ମାଣ ହେଉଥିବା ବେଳେ ଏହାକୁ ବିରୋଧ କରିଆସୁଛନ୍ତି ସ୍ଥାନୀୟ ବାସିନ୍ଦା । ପ୍ରକଳ୍ପ କାମକୁ ବିରୋଧ କରି ଆନ୍ଦୋଳନ ବେଳେ ୧୨ ତାରିଖରେ ପ୍ରକଳ୍ପ ସ୍ଥାନରେ ବ୍ୟାପକ ଭଙ୍ଗାରୁଜା କରିଥିଲେ ଲୋକେ । ପୋଲିସ ଏହି ଘଟଣାରେ ୨୪ ଜଣଙ୍କୁ ଗିରଫ କରିଥିଲା । ତେଣୁ ବେଆଇନ ଗିରଫଦାରୀକୁ ପୋଲିସ ବନ୍ଦ କରୁ ବୋଲି ଦାବି ହେଉଛି ।
ଖରସ୍ରୋତାରୁ ଭଦ୍ରକ ଜିଲ୍ଲାର ଚାନ୍ଦବାଲି ଅଂଚଳକୁ ପାନୀୟ ଜଳ ଯୋଗାଇବା ପାଇଁ କରାଯାଉଥିବା ଏହି ପ୍ରକଳ୍ପକୁ ଗତବର୍ଷ ନଭେମ୍ବର ମାସରୁ ବିରୋଧ କରାଯାଉଛି । ଏବଂ ଏହା ବିରୋଧରେ ସ୍ଥାନୀୟ କଂଗ୍ରେସ, ବିଜେପି ଓ ବାମଦଳ ଗୁଡିକ ମିଶି ଯାଇଛନ୍ତି । ଲୋକଙ୍କ ଧାରଣା ହେଉଛି, ଖରସ୍ରୋତାରୁ ପାଣି ନେଲେ ନଦୀର ଜଳସ୍ତର କମିଯିବ, ଏବଂ ଲୁଣାପାଣି ଉଠି ଆସିବ । ଏହାଦ୍ୱାରା ଚାଷ ଜମିରେ ଲୁଣଚରି ଯିବ ଏବଂ ଭଲ ଚାଷ ହେବ ନାହିଁ ।