କନକ ବ୍ୟୁରୋ: ଗାଁକୁ ନାହିଁ ପାନୀୟ ଜଳ ଯୋଗାଣ ବ୍ୟବସ୍ଥା । ଗାଁରେ ଥିବା ନଳକୂପ ଅଚଳ ହେବା ପରେ ଗ୍ରାମବାସୀଙ୍କ ଭରସା ପାଲଟିଛି ନାଳ ଚୂଆ । ପିଲା ଛୁଆଙ୍କ ପାଇଁ ଘର ଠାରୁ ୧ କିଲୋମିଟର ଦୂରକୁ ଯାଇ କଂସା କଂସା କରି ପାଣି ସଂଗ୍ରହ କରୁଛନ୍ତି ମହିଳା । ଏହି ଦୃଶ୍ୟକୁ ଦେଖିଲେ ଜଳଜଳ ହୋଇ ଦେଖାଯାଉଛି ଗାଁରେ ଥିବା ଜଳ ସମସ୍ୟା । ଖରା ବଢୁଥିବା ବେଳେ ପିଇବା ପାଣି ପାଇଁ ଡହଳବିକଳ ହେଉଛନ୍ତି ଢେଙ୍କାନାଳ ଜିଲ୍ଲା କାମାକ୍ଷାନଗର ବ୍ଲକ ତୁମୁସିଙ୍ଗା ପଂଚାୟତ ରଘୁଆବୋଲ ଗାଁର ପ୍ରାୟ ୩୫ ପରିବାର । ପାଣି ମୁନ୍ଦାଏ ପାଇଁ ହଇରାଣ ହୋଇଥିବା ଗ୍ରାମବାସୀ ଚରମ ନିଷ୍ପତି ନେଇଛନ୍ତି । ଯଦି ଆଗାମୀ ଦିନରେ ଗାଁରେ ଜଳ ଯୋଗାଣ ବ୍ୟବସ୍ଥା ନକରାଯାଏ ତେବେ ଭୋଟ ବର୍ଜନ କରିବେ ବୋଲି ନିଷ୍ପତି ନେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗାଁରେ ଥିବା ୪ଟି ନଳକୂପ ମଧ୍ୟରୁ ୩ଟି ଅଚଳ ଆଉ ଯେଉଁ ଗୋଟିଏ ନଳକୂପ ଅଛି ସେଥିରୁ ମଧ୍ୟ ଠିକ ଭାବରେ ପାଣି ବାହାରୁ ନାହିଁ । ତେଣୁ ଗାଁର ଲୋକମାନେ ବାଧ୍ୟ ହୋଇ ଚୂଆ ପାଣି ଉପରେ ନିର୍ଭର କରୁଛନ୍ତି । ଏନେଇ ବାରମ୍ବାର ଅଭିଯୋଗ ପରେ ମଧ୍ୟ କେହି ଶୁଣୁନଥିବା କହିଛନ୍ତି ।
ଖରାଦିନ ଆରମ୍ଭରୁ ଏଭଳି ଅବସ୍ଥା । ଆଗକୁ ଖରା ବଢ଼ିବା ସହ ଲୋକଙ୍କ ଜଳ ଯନ୍ତ୍ରଣା ମଧ୍ୟ ଅସହ୍ୟ ହେବ । ତେଣୁ ବିଭାଗ ତରଫରୁ ଲୋକଙ୍କ ପାଇଁ ପାନୀୟ ଜଳ ବ୍ୟବସ୍ଥା କରିବାକୁ ସାଧାରଣରେ ଦାବି ହୋଇଛି ।