ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଦେଖାଦେଇଛି ପାନୀୟ ଜଳ ସମସ୍ୟା । ପାଣି ପାଇଁ ସଂଘର୍ଷ କରୁଛନ୍ତି ରୋଗୀ ଓ ରୋଗୀଙ୍କ ସମ୍ପର୍କୀୟ । ପାଣି ଟିକିଏ ପାଇଁ ବୋତଲ ଧରି ଡାକ୍ତରଖାନା ବାହାରକୁ ଯାଉଛନ୍ତି । ଡାକ୍ତରଖାନା ପରିସରରେ ଥିବା ଜଳ ଯୋଗାଣ ବ୍ୟବସ୍ଥା ଅଚଳ ହୋଇପଡିବା ପରେ ଡହ ଡହ ଖରାରେ ଡାକ୍ତରଖାନା ବାହାରେ ଥିବା ବୋରିଙ୍ଗ ଉପରେ ନିର୍ଭର କରୁଛନ୍ତି ରୋଗୀଙ୍କ ସମ୍ପର୍କୀୟ । ତେବେ ବିଡମ୍ବନା ହେଉଛି ଯେ, ସବୁ ଜାଣି ଚୁପ ବସିଛନ୍ତି ଡାକ୍ତରଖାନା କର୍ତୃପକ୍ଷ । ସମାଧାନର ବାଟ ବାହାର ନ କରି ଅନ୍ୟ ବିଭାଗ ଉପରେ ଦୋଷ ଲଦୁଛି ସ୍ୱାସ୍ଥ୍ୟ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ଜିଲ୍ଲା ମୁଖ୍ୟ ଚିକିତ୍ସାଳୟର ଗାଇନିକ, ପେଡିଆଟ୍ରିକ, ମେଡିସିନ, ଓର୍ଥୋପେଡିକ, ଏସ.ଏନ.ସି.ୟୁ, ଜେରିଆଟିକ ୱାର୍ଡ ପାଇଁ ରହିଛି ମାତ୍ର ଗୋଟିଏ ଥଣ୍ଡା ଜଳ ଯୋଗାଣ ମେସିନ । ତାହା ପୁଣି ମାସ ମାସ ଧରି ଅଚଳ ହୋଇ ପଡିରହିଛି । ତେଣୁ ଡହଡହ ଖରାରେ ପାଣି ପାଇଁ ଡାକ୍ତରଖାନା ଠାରୁ ବହୁ ଦୂରରେ ଥିବା ଏକ ନଳକୂଅ ଉପରେ ନିର୍ଭର କରୁଛନ୍ତି ରୋଗୀ ଓ ରୋଗୀଙ୍କ ସମ୍ପର୍କୀୟ ।
ଡାକ୍ତରଖାନା ପରିସରରେ ଥିବା ଦୁଇଟି ନଳକୂଅରୁ ଅଳ୍ପଅଳ୍ପ ପାଣି ବାହାରୁଥିବା ବେଳେ ତାହା ଗାଧୁଆ ଓ ସଫା କାମରେ ଲାଗୁଛି । ସେପଟେ ଡାକ୍ତରଖାନା ପ୍ରବେଶ ଦ୍ୱାରରେ ଏକ ଘରୋଇ ସଂସ୍ଥା ପାନୀୟ ଜଳ ଯୋଗାଣ ମେସିନ ବସାଇଛି । ସେଥିରୁ କେତେବେଳେ କେମିତି ପାଣି ବାହାରୁଥିବା ବେଳେ ତାହା ସମୁଦ୍ରକୁ ସଂଖେ ପରି ଲାଗୁଛି । ଡାକ୍ତରଖାନାରେ ପାଣି ସମସ୍ୟା ସମସ୍ତଙ୍କୁ ଚକିତ କରିଥିବା ବେଳେ ଜଳ ଯୋଗାଣ ପାଇଁ ବିକଳ୍ପ ବ୍ୟବସ୍ଥା କଥା ଚିନ୍ତା ନକରି ଜନସ୍ୱାସ୍ଥ୍ୟ ବିଭାଗ ଉପରେ ଦୋଷ ଲଦିଛନ୍ତି ଚିକିତ୍ସାଳୟ ଦାୟିତ୍ୱରେ ଥିବା ଏ.ଡି.ଏମ.ଓ । ତେବେ ଆଗକୁ ଖରା ଆହୁରି ବଢିବାକୁ ଥିବା ବେଳେ ରୋଗୀ ଓ ତାଙ୍କ ସମ୍ପର୍କୀୟମାନେ ଚିନ୍ତାରେ ପଡିଛନ୍ତି ।