ନିଜ ହଜାଇ ଦେଲା ଲଘୁଚାପଜନିତ ବର୍ଷା : ୩ ଗାଁର ପ୍ରାୟ ୨୫୦ ପରିବାର ୩ ଦିନ ହେଲା ଜଳବନ୍ଦୀ
କନକ ବ୍ୟୁରୋ : ନିଜ ହଜାଇଦେଲା ଲଘୁଚାପଜନିତ ବର୍ଷା । ତିନି ଦିନର ପ୍ରବଳ ବର୍ଷା ଯୋଗୁଁ ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକରେ ଜଳବନ୍ଦୀ ସମସ୍ୟା ଦେଖା ଦେଇଛି । ଭୀଷଣ ବର୍ଷା ଯୋଗୁଁ ଜଳକାପଡିଆ, କପାସୁଡଦା ଓ ସାରକାତିଆ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି । ଏହି ୩ ଗାଁର ପ୍ରାୟ ୨୫୦ ପରିବାର ୩ ଦିନ ହେଲା ଜଳବନ୍ଦୀ ହୋଇ ରହିଛନ୍ତି । ଜଳ ନିଷ୍କାସନ ପଥ ପରିଷ୍କାର ନଥିବାରୁ ରାସ୍ତା ଉପରେ ୪ ଫୁଟ ଉଚ୍ଚ ପାଣି ଚାଲୁଛି । ଘରେ ବର୍ଷା ପାଣି ଲହଡି ମାରୁଛି । ଚାଷ ଜମିରେ ୫ ଫୁଟ ଉଚ୍ଚର ପାଣି ଜମି ରହିଛି । ଘରେ ପାଣି ପଶିଥିବାରୁ ଚୁଲି ଜଳୁନି ।
Kanak News is now on WhatsApp
Join and get latest news updates delivered to you via WhatsApp
ଲୋକେ ଶୁଖିଲା ଖାଦ୍ୟ ଖାଇ ଜୀବନ କାଟୁଛନ୍ତି । ହେଲେ ଗାଇଗୋରୁଙ୍କ ଅବସ୍ଥା ଅଧିକ ଶୋଚନୀୟ ହୋଇପଡିଛି । ନଡା ଚକଡା ସବୁ ପାଣିରେ ନଷ୍ଟ ହୋଇଯାଇଛି । ଘରେ ପାଣି ପଶିବା ପରେ ଜଳକାପଡିଆ ଓ କପାସୁଦା ଗାଁର ଲୋକେ ସ୍କୁଲରେ ଆଶ୍ରୟ ନେଇଛନ୍ତି । ସେପଟେ ସାରକତିଆ ଗାଁ ସ୍କୁଲରେ ମଧ୍ୟ ପାଣି ପଶିଥିବାରୁ ଦୁର୍ଦ୍ଦଶାରେ ଦିନ କାଟୁଛନ୍ତି ଗ୍ରାମବାସୀ । ୩ ଦିନ ହେଲା ପାଣି ଘେରରେ ବନ୍ଦୀ ହୋଇ ରହିଥିଲେ ମଧ୍ୟ ଲୋକଙ୍କ ପାଖରେ ସରକାରୀ ସାହାଯ୍ୟ ପହଞ୍ଚିପାରି ନାହିଁ । ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଲୋକେ ଦାବି କରିଛନ୍ତି ।