କନକ ବ୍ୟୁରୋ : ଚୋର ଯେତେ ଚାଲାକ୍ ହେଲେ ବି ପୋଲିସ ସବୁବେଳେ ଦୁଇପାଦ ଆଗରେ ଥାଏ । ସେହିଭଳି ଏକ ଘଟଣା ଘଟିଛି ବାରଣାସୀ ବିମାନବନ୍ଦରରେ । ଅତି ଚତୁରତାର ସହ ୪୫ ଲକ୍ଷ ଟଙ୍କାର ସୁନା ଚାଲାଣ ହେଉଥିବା ବେଳେ ଜବତ କରିଛି କଷ୍ଟମ ଅଧିକାରୀ ।
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁସାରେ, ୟୁଏଇରୁ ଫେରିଥିବା ଦୁଇ ଯାତ୍ରୀଙ୍କ ନିକଟରୁ ୪୫ଲକ୍ଷ ଟଙ୍କାର ସୁନା ଜବତ ହୋଇଛି । ଏହି ଦୁଇ ଯାତ୍ରୀ ଏପରି ଭାବରେ ସୁନାକୁ ନେଇଯାଉଥିଲେ, ତାହା ଦେଖିଲେ ଯେକେହିବି ଆଶ୍ଚର୍ଯ୍ୟ ଚକିତ ହୋଇଯିବେ । ଚନ୍ଦାପଣରୁ ମୁକ୍ତି ପାଇଁ ଯେଉଁ 'ୱିଗ୍' ବା ନକଲି ଚୁଟିର ବ୍ୟବହାର କରାଯାଏ । ସେହି 'ୱିଗ୍' ତଳେ ସୁନା ରଖି ଚାଲାଣ କରୁଥିଲେ ୟୁଏଇରୁ ଫେରିଥିବା ଦୁଇ ଯାତ୍ରୀ ।

Advertisment


କଷ୍ଟମ ଅଧିକାରୀଙ୍କ କହିବା ଅନୁସାରେ 'ୱିଗ୍' ତଳେ ଏକ ଥଳିରେ ୬୪୬ଗ୍ରାମର ସୁନା ଥିଲା । ଯାହାର ମୂଲ୍ୟ ୩୨.୯୭ ଲକ୍ଷ ଟଙ୍କା ହେବ । ସେହି ସମାନ ବିମାନରେ ଆଉ ଜଣେ ବ୍ୟକ୍ତିଙ୍କୁ ମଧ୍ୟ କଷ୍ଟମ ବିଭାଗ ଗିରଫ କରିଛି । ଯାହା ପାଖରୁ ୨୩୮.୨ଗ୍ରାମର ସୁନା ଜବତ ହୋଇଛି । ଏହାର ମୂଲ୍ୟ ୧୨.୧୪ ଲକ୍ଷ ବୋଲି ଅନୁମାନ କରାଯାଇଛି । ଗତ କିଛି ଦିନ ତଳେ ବିମାନବନ୍ଦରରୁ ଆଉ ୨ ସୁନା ତସ୍କରଙ୍କୁ ଗିରଫ କରାଯାଇଥିଲା । ଜଣେ ସିଗାରେଟରେ ସୁନା ତସ୍କରି କରୁଥିବା ବେଳେ ଅନ୍ୟ ଜଣେ ସୁନାର ପେଷ୍ଟ ନେଇ ଯାଉଥିଲା ।