କନକ ବ୍ୟୁରୋ : ଋଷ ଏବଂ ୟୁକ୍ରେନ ମଧ୍ୟରେ ଗତ ତିନି ବର୍ଷ ଧରି ଯୁଦ୍ଧ ଜାରି ରହିଛି, ଦୁଇ ଦେଶକୁ ନେଇ ସାରା ବିଶ୍ବ ଚିନ୍ତିତ ଥିବା ବେଳେ ଏବେ ଭାରତର ଦୁଇ ପଡ଼ୋଶୀ ରାଷ୍ଟ୍ର ମଧ୍ୟରେ ଯୁଦ୍ଧ ଆରମ୍ଭ ହୋଇଯାଇଛି । ଥାଇଲ୍ୟାଣ୍ଡ ଏବଂ କାମ୍ବୋଡିଆ ଦୁଇ ଦେଶ ମଧ୍ୟରେ ଦଶନ୍ଧି ଧରି ଚାଲିଥିବା ସୀମା ବିବାଦ ଗୁରୁବାର ଦିନ ପ୍ରବଳ ହିଂସାର ରୂପ ନେଇଥିଲା, ଯେଉଁଥିରେ ଅତି କମରେ ୧୪ ଜଣ ପ୍ରାଣ ହରାଇଥିଲେ । ମୃତକଙ୍କ ମଧ୍ୟରୁ ଅଧିକାଂଶ ସାଧାରଣ ନାଗରିକ ଥିଲେ। ଜଣେ ଆଠ ବର୍ଷର ଶିଶୁର ମଧ୍ୟ ମୃତ୍ୟୁ ଘଟିଛି । ବରର୍ତ୍ତମାନ କିନ୍ତୁ ୪୦ରୁ ଅଧିକ ଲୋକଙ୍କ ଜୀବ ଯାଇଥିବା ନେଇ ସୂଚନା ରହିଛି ।

Advertisment

ଗୁରୁବାର ସକାଳ ପ୍ରାୟ ୮ଟା ବେଳେ ଥାଇଲ୍ୟାଣ୍ଡର ସୁରିନ ଏବଂ କାମ୍ବୋଡିଆର ଓଡାର ମିଞ୍ଚେ ପ୍ରଦେଶର ସୀମାରେ ଅବସ୍ଥିତ ପ୍ରାଚୀନ 'ତା ମୁଏନ୍ ଥମ୍ ମନ୍ଦିର' ଚାରିପାଖରେ ଗୁଳିଚାଳନା ଆରମ୍ଭ ହୋଇଥିଲା । ପ୍ରଥମେ ଛୋଟ ଅସ୍ତ୍ର, ତା'ପରେ ତୋପ ଏବଂ ରକେଟ୍ ଏବଂ ଶେଷରେ ଥାଇ ବାୟୁସେନା F-16 ଲଢ଼ୁଆ ବିମାନ ସହିତ ବୋମା ମାଡ଼ କରିଥିଲା । ଏହି ମୁହୂର୍ତ୍ତରେ ଦୁଇ ଦେଶ ମଧ୍ୟରେ ଦଶନ୍ଧି ଧରି ଚାଲିଥିବା ବିବାଦ ଉଗ୍ର ରୂପ ନେଇଛି । ସକାଳୁ ସକାଳୁ ହଠାତ୍ ବିସ୍ଫୋରଣ ଶୁଣାଗଲା । ଥାଇ ସେନା ଶୁକ୍ରବାର ଦିନ କହିଛି ଯେ କାମ୍ବୋଡିଆର ସେନା ଭାରୀ ଅସ୍ତ୍ରଶସ୍ତ୍ର, ତୋପ ଏବଂ କ୍ଷେପଣାସ୍ତ୍ର ଲଗାତାର ମାଡ଼ କରୁଛି ।

ବୌଦ୍ଧ ସମ୍ପ୍ରଦାୟର ଧାର୍ମିକ ସ୍ଥଳକୁ ନେଇ ଥାଇଲ୍ୟାଣ୍ଡ ଏବଂ କାମ୍ବୋଡିଆ ମଧ୍ୟରେ ଯୁଦ୍ଧ ଏବେ ଭୟଙ୍କର ରୂପ ନେବାରେ ଲାଗିଛି। ଥାଇ ଅଧିକାରୀଙ୍କ କହିବା ଅନୁସାରେ, ଆକ୍ରମଣ ଯୋଗୁଁ ୧.୨୫ ଲକ୍ଷ ଲୋକ ବାସହରା ହୋଇଛନ୍ତି ।

ଭାରତ ପରାମର୍ଶଦାତା ଜାରି କରିଛି
ଥାଇଲ୍ୟାଣ୍ଡ-କମ୍ବୋଡିଆ ସୀମାରେ ଚାଲିଥିବା ବିବାଦକୁ ଦୃଷ୍ଟିରେ ରଖି, ଭାରତୀୟ ଦୂତାବାସ ଆଜି ନିଜ ନାଗରିକମାନଙ୍କ ପାଇଁ ଏକ ପରାମର୍ଶ ଜାରି କରିଛି । ଦୂତାବାସ ଭାରତୀୟ ପର୍ଯ୍ୟଟକମାନଙ୍କୁ ଥାଇଲ୍ୟାଣ୍ଡର ଉବୋନ୍ ରାତ୍ଚାଥାନି, ସୁରିନ୍, ସିସାକେଟ୍, ବୁରିରାମ, ସାକାଏଓ, ଚାଂଥାବୁରି ଏବଂ ତ୍ରାଟ୍ ପ୍ରଦେଶ ଯାତ୍ରା ନକରିବାକୁ ପରାମର୍ଶ ଦେଇଛି । ଦୂତାବାସ କହିଛି ଯେ ଯାତ୍ରା କରିବା ପୂର୍ବରୁ ଥାଇ କର୍ତ୍ତୃପକ୍ଷ ଏବଂ ଥାଇଲ୍ୟାଣ୍ଡର ପର୍ଯ୍ୟଟନ କର୍ତ୍ତୃପକ୍ଷଙ୍କ ଠାରୁ ସରକାରୀ ଅପଡେଟ୍ ଯାଞ୍ଚ କରିବା ଉଚିତ ।

ଯୁଦ୍ଧରେ କମ୍ବୋଡିଆଙ୍କ କ୍ଷୟକ୍ଷତି

କାମ୍ବୋଡିଆର ଅଧିକାରୀଙ୍କ କହିବା ଅନୁଯାୟୀ, କେବଳ ଗୁରୁବାର ଦିନ ହୋଇଥିବା ସଂଘର୍ଷରେ ଚାରି ଜଣ ସାଧାରଣ ନାଗରିକ ଆହତ ହୋଇଥିଲେ ଏବଂ ୪,୦୦୦ ରୁ ଅଧିକ ଗ୍ରାମବାସୀଙ୍କୁ ସେମାନଙ୍କ ଘର ଛାଡିବାକୁ ବାଧ୍ୟ କରାଯାଇଥିଲା । ଅଧିକାଂଶ ଟ୍ରାକ୍ଟର ଏବଂ ହାତ ତିଆରି ଗାଡ଼ିରେ ସେମାନଙ୍କର ସମ୍ପୂର୍ଣ୍ଣ ପରିବାର ଏବଂ ଜିନିଷପତ୍ର ସହିତ ପଳାଇ ଯାଇଥିଲେ 
ଯୁଦ୍ଧରେ ଥାଇଲ୍ୟାଣ୍ଡର କେତେ କ୍ଷତି ହୋଇଛି?

ଏହି ଆକ୍ରମଣ ଛଅଟି ସୀମାନ୍ତ ପ୍ରଦେଶରେ ହୋଇଥିଲା ଏବଂ ଏକ ହସ୍ପିଟାଲକୁ ମଧ୍ୟ ଟାର୍ଗେଟ କରାଯାଇଥିଲା । ଏଥିରେ ଜଣେ ସୈନିକ ଏବଂ ପିଲାମାନଙ୍କ ସମେତ ୧୩ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା, ଯେତେବେଳେ ୧୪ ଜଣ ସୈନିକ ଏବଂ ୩୨ ଜଣ ସାଧାରଣ ନାଗରିକ ଆହତ ହୋଇଥିଲେ ।