ଅପରେସନ୍ ସିନ୍ଦୂରର ସୁନ୍ଦରକାଣ୍ଡ ସହ କନେକ୍ସନ୍ … ପ୍ରତିରକ୍ଷାମନ୍ତ୍ରୀ କହିଲେ ଅପରେସନ୍ ପାଇଁ କେମିତି ପ୍ରଭୁ ହନୁମାନ ସାଜିଥିଲେ ପ୍ରେରଣା

ଭାରତୀୟ ସେନା ଅପରେସନ୍ ସିନ୍ଦୂର ମାଧ୍ୟମରେ ପାକିସ୍ତାନର ଆତଙ୍କବାଦୀ ଆଡ୍ଡା ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ପହଲଗାମରେ ପର୍ଯ୍ୟଟକଙ୍କ ଉପରେ ହୋଇଥିବା ଆକ୍ରମଣର ପ୍ରତିଶୋଧ ନେଇ ଭାରତୀୟ ସେନା ଅପରେସନ୍ ସିନ୍ଦୂର ଆରମ୍ଭ କରି ପାକିସ୍ତାନରେ ଥିବା ୯ ଟି ଆତଙ୍କବାଦୀ ଆଡ୍ଡାକୁ ଧ୍ୱଂସ କରି ଦେଇଛି । ଏହି କାର୍ଯ୍ୟାନୁଷ୍ଠାନରେ ଖୁସି ହୋଇ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ 'ଆମେ ପ୍ରଭୁ ହନୁମାନଙ୍କର ସେହି ଆଦର୍ଶକୁ ପାଳନ କରିଛୁ, ଯାହା ସେ ଅଶୋକ ବାଟିକା ଉଜାଡ଼ିବା ସମୟରେ କରିଥିଲେ ‘ଜିନ୍ ମୋହି ମାରା, ତିନ୍ ମୋହି ମାରେ ’ ଅର୍ଥାତ୍ ଆମେ କେବଳ ସେହିମାନଙ୍କୁ ମାରିଛୁ ଯେଉଁମାନେ ଆମ ନିରୀହ ଲୋକଙ୍କୁ ମାରିଛନ୍ତି । ରାଜନାଥ ସିଂ ରାମଚରିତମାନସର ଚୌପାଇକୁ ଆଧାର କରି ଭାରତର ଚିନ୍ତାଧାରାକୁ ସ୍ପଷ୍ଟ କରିଛନ୍ତି । ତେବେ ଆସନ୍ତୁ ବିସ୍ତୃତ ଭାବରେ ଜାଣିବା ସୁନ୍ଦରକାଣ୍ଡ ପଛର କାହାଣୀ । 

जिन्ह मोहि मारा ते मैं मारे। तेहि पर बाँधेउँ तनयँ तुम्हारे॥
मोहि न कछु बाँधे कइ लाजा। कीन्ह चहउँ निज प्रभु कर काजा॥

ଏହାର ଅର୍ଥ- ଯେଉଁମାନେ ମୋତେ ମାରିଲେ, ମୁଁ ସେମାନଙ୍କୁ ମଧ୍ୟ ମାରିଲି । ତୁମ ପୁତ୍ର ମୋତେ ବାନ୍ଧିଲା କିନ୍ତୁ ମୁଁ ବନ୍ଧା ହେବାରେ ଲଜ୍ଜିତ ନୁହେଁ । ମୁଁ ତ କେବଳ ମୋ ପ୍ରଭୁଙ୍କ କାର୍ଯ୍ୟ କରୁଛି । 

ରାମାୟଣରେ ରାବଣ ସୀତାଙ୍କୁ ହରଣ କରି ନେବା ପରେ ହନୁମାନ ତାଙ୍କୁ ଖୋଜିବା ପାଇଁ ଲଙ୍କା ଯାଇଥିଲେ । ଲଙ୍କାରେ ସେ ଦେବୀ ସୀତାଙ୍କୁ ବହୁତ ଖୋଜିଥିଲେ, କିନ୍ତୁ ସଫଳତା ମିଳିନଥିଲା । ଅଞ୍ଜନୀ ପୁତ୍ର ଥକି ହାରି ନିରାଶ ହୋଇଗଲେ । ସେତେବେଳେ ବିଭୀଷଣ ତାଙ୍କୁ ଦେବୀ ସୀତାଙ୍କ ବିଷୟରେ କହିଥିଲେ । ଏହା ପରେ ହନୁମାନ ଅଶୋକ ବାଟିକା ଯାଇ ଭଗବାନ ଶ୍ରୀରାମଙ୍କ ବାର୍ତ୍ତା ଦେବୀ ସୀତାଙ୍କୁ ଶୁଣାଇଥିଲେ । ଦେବୀ ସୀତାଙ୍କ ପାଖରେ ପ୍ରଭୁ ରାମଙ୍କ ବାର୍ତ୍ତା ପହଞ୍ଚାଇବା ପରେ ଯେତେବେଳେ ହନୁମାନଙ୍କୁ ଭୋକ ଲାଗିଲା, ସେତେବେଳେ ସେ ଅଶୋକ ବାଟିକାର ଫଳ ତୋଳି ଖାଇବାକୁ ଲାଗିଲେ । ଏତେ ବଡ଼ ବାନରକୁ ଦେଖି ଜଗୁଆଳିମାନେ ଏହାର ସୂଚନା ଲଙ୍କାପତିଙ୍କୁ ଦେଲେ । ରାବଣ ନିଜ ପୁତ୍ର ଅକ୍ଷୟ କୁମାରଙ୍କୁ ହନୁମାନଙ୍କୁ ବନ୍ଦୀ କରିବା ପାଇଁ ପଠାଇଲେ, କିନ୍ତୁ ହନୁମାନ ଅକ୍ଷୟ କୁମାରଙ୍କୁ ବଧ କରିଦେଲେ ।

ଏହା ପରେ ରାବଣର ସବୁଠାରୁ ପରାକ୍ରମୀ ପୁତ୍ର ମେଘନାଦ ହନୁମାନଙ୍କୁ ଧରିବା ପାଇଁ ଆସିଲେ ଏବଂ ବ୍ରହ୍ମାସ୍ତ୍ର ପ୍ରୟୋଗ କଲେ । ବରଦାନ ହେତୁ ବ୍ରହ୍ମାସ୍ତ୍ର ହନୁମାନଙ୍କର କୌଣସି କ୍ଷତି କରିପାରି ନଥାନ୍ତା, କିନ୍ତୁ ବ୍ରହ୍ମାଙ୍କ ଅସ୍ତ୍ର ହୋଇଥିବାରୁ ହନୁମାନ ସ୍ୱୟଂ ତାହାର ବନ୍ଧନରେ ବାନ୍ଧି ହୋଇଗଲେ । ଯେତେବେଳେ ହନୁମାନ ରାବଣଙ୍କ ଦରବାରରେ ପହଞ୍ଚିଲେ, ସେତେବେଳେ ଲଙ୍କାପତି ହନୁମାନଙ୍କୁ ପଚାରିଲେ ଯେ ତୁମେ ମୋ ପୁଅ ଅକ୍ଷୟ କୁମାର ଏବଂ ସୈନିକମାନଙ୍କୁ କାହିଁକି ମାରିଲ । ଏହା ଉପରେ ହନୁମାନ କହିଲେ, 'ଜିନ୍ ମୋହି ମାରା ତେ ମୈ ମାରେ' ଅର୍ଥାତ୍ ମୁଁ ସେହିମାନଙ୍କୁ ମାରିଛି, ଯେଉଁମାନେ ମୋତେ ମାରିଛନ୍ତି । ହନୁମାନ ରାବଣଙ୍କୁ କହିଲେ ଯେ ପ୍ରତ୍ୟେକ ବ୍ୟକ୍ତି ନିଜ ଶରୀରକୁ ବହୁତ ଭଲ ପାଆନ୍ତି । ଅସତ୍ ମାର୍ଗର ପଥୀକ ଲଙ୍କାପତିଙ୍କ ଅନୁଚର ମୋତେ ମାରିଲେ , ତେଣୁ ଯେଉଁମାନେ ମତେ ମାରିଲେ ମୁଁ ବି ସେମାନଙ୍କୁ ମାରିଲି । ଏଥିରେ ମୋର କୌଣସି ଅପରାଧ ନାହିଁ । ଏହା କେବଳ କ୍ରିୟାର ପ୍ରତିକ୍ରିୟା ମାତ୍ର ।