ପାକିସ୍ତାନ ଓ ବାଂଲାଦେଶରେ ବଢ଼ୁଛି ଚୀନର ଦବଦବା : ଚିନ୍ତାଜନକ କହିଲେ ସିଡିଏସ୍

କନକ ବ୍ୟୁରୋ : ପାକିସ୍ତାନ ବର୍ଷ ବର୍ଷ ଧରି ଭାରତ ବିରୁଦ୍ଧରେ ଷଡ଼ଯନ୍ତ୍ର ରଚୁଛି ଏବଂ ଚୀନ୍ ମଧ୍ୟ ଏଥିରେ ଭୂମିକା ଗ୍ରହଣ କରିଛି । ପାକିସ୍ତାନ ଏବଂ ଚୀନ୍ ପରସ୍ପରକୁ ଭେଟିବା ଭାରତର ସୁରକ୍ଷା ପାଇଁ ବିପଦ ହୋଇପାରେ। ଏହି ପ୍ରସଙ୍ଗରେ ସେନା ମୁଖ୍ୟ ସିଡିଏସ୍ ଅନିଲ ଚୌହାନ ପ୍ରତିକ୍ରିୟା ରଖି କହିଛନ୍ତି, ପାକିସ୍ତାନ ଗତ ପାଞ୍ଚ ବର୍ଷ ମଧ୍ୟରେ ଚୀନ୍ ଠାରୁ ୭୦ ରୁ ୮୦ ପ୍ରତିଶତ ଅସ୍ତ୍ରଶସ୍ତ୍ର ଏବଂ ଉପକରଣ ପାଇଛି ।

କେବଳ ଏତିକି ନୁହେଁ ବାଂଲାଦେଶ ଏବଂ ପାକିସ୍ତାନରେ ଚୀନର ବଢ଼ୁଥିବା ଦବଦବା ଉପରେ ବି ସିଡିଏସ୍ ଚୌହାନ ପ୍ରତିକ୍ରିୟା ରଖିଛନ୍ତି । ରିପେର୍ଟ ଅନୁଯାୟୀ, ସେ କହିଛନ୍ତି, "ହିନ୍ଦ ମହାସାଗର କ୍ଷେତ୍ରର ଦେଶଗୁଡ଼ିକର ଆର୍ଥିକ ସଙ୍କଟ ସେମାନଙ୍କ ପାଇଁ ସମସ୍ୟା ସୃଷ୍ଟି କରିପାରେ । ଏହା ଯୋଗୁଁ ବାହ୍ୟ ଶକ୍ତିଗୁଡ଼ିକୁ ସେମାନଙ୍କର ପ୍ରଭାବ ବୃଦ୍ଧି କରିବାର ସୁଯୋଗ ମିଳିଛି । ଏହା ଭାରତକୁ ମଧ୍ୟ ପ୍ରଭାବିତ କରିପାରିବ ।"

ସିଡିଏସ୍ ଚୌହାନ କହିଛନ୍ତି, "ଦକ୍ଷିଣ ଏସିଆରେ ବାରମ୍ବାର ସରକାର ପରିବର୍ତ୍ତନ ସହିତ, ଭୂରାଜନୈତିକ ସମୀକରଣ ଏବଂ ଆଦର୍ଶ ଦୃଷ୍ଟିକୋଣ ମଧ୍ୟ ପରିବର୍ତ୍ତନ ହେଉଛି, ଯାହା ଆଉ ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ । ସେହିପରି ବ୍ୟକ୍ତିଗତ ଲାଭ ପାଇଁ ଚୀନ୍, ପାକିସ୍ତାନ ଏବଂ ବାଂଲାଦେଶ ନିକଟତର ହେଉଛନ୍ତି, ଯାହା ଭାରତର ସୁରକ୍ଷା ପାଇଁ ବିପଦ ସୃଷ୍ଟି କରିପାରେ । 

ଅପରେସନ ସିନ୍ଦୂର ସମୟରେ ଚୀନ୍-ପାକିସ୍ତାନ ବନ୍ଧୁତା ପଦାକୁ ଆସିଥିଲା
ପହଲଗାମରେ ଆତଙ୍କବାଦୀ ଆକ୍ରମଣ ପରେ , ଭାରତ ଅପରେସନ ସିନ୍ଦୂର ଆରମ୍ଭ କରିଥିଲା । ଏହି ସମୟରେ, ଭାରତୀୟ ସେନା ଶହେରୁ ଅଧିକ ଆତଙ୍କବାଦୀଙ୍କୁ ହତ୍ୟା କରିଥିଲା । ପାକିସ୍ତାନ ସେତେବେଳେ ଭାରତୀୟ ସହରଗୁଡ଼ିକ ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା । ଉପସେନା ମୁଖ୍ୟ ଲେଫ୍ଟନାଣ୍ଟ ଜେନେରାଲ ରାହୁଲ ଆର ସିଂ ଏହା ଉପରେ ପ୍ରତିକ୍ରିୟା ଦେଇଥିଲେ । ସେ କହିଥିଲେ ଯେ ପାକିସ୍ତାନକୁ ଚୀନରୁ ସାହାଯ୍ୟ ମିଳିଛି । ପାକିସ୍ତାନର ୭୦ ରୁ ୮୦ ପ୍ରତିଶତ ଅସ୍ତ୍ରଶସ୍ତ୍ର ଚୀନ୍ ଦେଇଛି ।