ଥାଇଲାଣ୍ଡ ରାଜଧାନୀରେ ଗୁଳି ବର୍ଷା, ନିଜକୁ ଗୁଳିକଲା ଗୁଳିକାଣ୍ଡ ଘଟାଇଥିବା ଯୁବକ

କନକ ବ୍ୟୁରୋ : ଥାଇଲାଣ୍ଡର ରାଜଧାନୀ ବ୍ୟାଙ୍କକରେ ଏକ ଭୟଙ୍କର ଗୁଳିକାଣ୍ଡ ଘଟିଛି । ଏହି ଗୁଳିକାଣ୍ଡରେ ଛଅ ଜଣଙ୍କର ମୃତ୍ୟୁ ହୋଇଛି । ଏହି ଆକ୍ରମଣ ସହରର ଅର୍ ଟୋର୍ କୋର୍ ମାର୍କେଟ୍‌ରେ ଘଟିଥିଲା, ଯାହା ବ୍ୟାଙ୍କକର ପ୍ରସିଦ୍ଧ ମାର୍କେଟ୍ ନିକଟରେ ରହିଛି, ଏବଂ ସାଧାରଣତଃ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କ ଭିଡ଼ ରହିଥାଏ ଏହି ସ୍ଥାନରେ । ମୃତକଙ୍କ ମଧ୍ୟରେ ଚାରି ଜଣ ସୁରକ୍ଷା କର୍ମୀ, ଜଣେ ମହିଳା ଏବଂ ଆକ୍ରମଣକାରୀ ମଧ୍ୟ ସାମିଲ ରହିଛି, ଯିଏ ଗୁଳିକାଣ୍ଡ ଘଟାଇଥିଲା ସେ ନିଜେ ନିଜକୁ ଗୁଳି କରିଛି । ବ୍ୟାଙ୍କକର ହସ୍ପିଟାଲଗୁଡ଼ିକର ତଦାରଖ କରୁଥିବା ଏରାୱାନ୍ ଜରୁରୀକାଳୀନ ମେଡିକାଲ୍ ସେଣ୍ଟରରୁ ଏହି ସୂଚନା ସାମ୍ନାକୁ ଆସିଛି ।

କଣ ଥିଲା ଉଦ୍ଦେଶ୍ୟ? 
ଘଟଣା ଘଟିଥିବା ଜିଲ୍ଲା ଡେପୁଟି ପୁଲିସ ମୁଖ୍ୟ କହିଛନ୍ତି, ଏହାକୁ ଏପର୍ଯ୍ୟନ୍ତ ଏକ ଗଣ ଗୁଳିକାଣ୍ଡ ଭାବରେ ବିଚାରକୁ ନିଆଯାଇଛି । "ପୁଲିସ ଆକ୍ରମଣକାରୀଙ୍କୁ ଚିହ୍ନଟ କରିବା ଏବଂ ଆକ୍ରମଣ ପଛର କାରଣ ଜାଣିବା ପାଇଁ ତଦନ୍ତ କରାଯାଉଛି," । ସେ ଏହା ମଧ୍ୟ କହିଛନ୍ତି ଯେ କର୍ତ୍ତୃପକ୍ଷ ତଦନ୍ତ କରୁଛନ୍ତି ଯେ ଏହି ଗୁଳିକାଣ୍ଡର ଥାଇଲାଣ୍ଡ ଏବଂ କାମ୍ବୋଡିଆ ମଧ୍ୟରେ ଚାଲିଥିବା ସୀମା ବିବାଦ ସହିତ କୌଣସି ସମ୍ଭାବ୍ୟ ସମ୍ପର୍କ ଅଛି କି ନାହିଁ ।

ଥାଇଲାଣ୍ଡରେ ବୃଦ୍ଧି ପାଉଛି ହିଂସା 
ଥାଇଲାଣ୍ଡରେ ଏପରି ଗୁଳିକାଣ୍ଡ ନୂଆ ନୁହେଁ । ସେଠାରେ ବନ୍ଧୁକ କିଣିବା ସହଜ, ଯାହା ଫଳରେ ଏପରି ଘଟଣା ଘଟୁଛି। ପୁଲିସ ଅଞ୍ଚଳକୁ ଘେରାବନ୍ଦୀ କରି ତଦନ୍ତ ଆରମ୍ଭ କରିଛି । ମୃତକଙ୍କ ମୃତଦେହ ପୋଷ୍ଟମର୍ଟମ ପାଇଁ ପଠାଯାଇଛି ଏବଂ ଘଟଣା ସହିତ ଜଡିତ ସମସ୍ତ ତଥ୍ୟର ତଦନ୍ତ କରାଯାଉଛି ।

ଥାଇଲାଣ୍ଡ ଏବଂ କାମ୍ବୋଡିଆ ମଧ୍ୟରେ କାହିଁକି ରହିଛି ବିବାଦ?
ଥାଇଲାଣ୍ଡ ଏବଂ କାମ୍ବୋଡିଆ ମଧ୍ୟରେ ସୀମା ବିବାଦ ବର୍ଷ ବର୍ଷ ପୁରୁଣା, ଯାହାର କେନ୍ଦ୍ରସ୍ଥଳ ହେଉଛି ପ୍ରିୟାହ ଭିହାର ମନ୍ଦିର ଅଞ୍ଚଳ । ୧୯୬୨ ମସିହାରେ ଅନ୍ତର୍ଜାତୀୟ ନ୍ୟାୟାଳୟ କାମ୍ବୋଡିଆ ସପକ୍ଷରେ ରାୟ ଦେବା ପରେ ମଧ୍ୟ ଏହି ବିବାଦ ସମ୍ପୂର୍ଣ୍ଣ ସମାଧାନ ହୋଇପାରି ନାହିଁ । ଉଭୟ ଦେଶର ସେନା ସମୟ ସମୟରେ ଏହି ଅଞ୍ଚଳରେ ମୁହାଁମୁହିଁ ହୋଇଛନ୍ତି, ଯେଉଁଥିରେ ସଂଘର୍ଷ ଏବଂ ଗୁଳିବିନିମୟ ଭଳି ଘଟଣା ଘଟିଛି ।