ବିଜେଡି-ବିଜେପି ମେଣ୍ଟ ଘୋଷଣାକୁ ସମସ୍ତଙ୍କ ଅପେକ୍ଷା । ୧୨ରେ ଆସୁଛନ୍ତି ଅମିତ ଶାହା ଓ ନଡ୍ଡା । ନବୀନଙ୍କ ସହ ମିଶି କରିପାରନ୍ତି ଘୋଷଣା
କନକ ବ୍ୟୁରୋ : ଦିନକ ଭିତରେ ବଦଳି ଯାଇଛି ରାଜ୍ୟ ରାଜନୀତି । ପ୍ରାୟ ଏକମାସ ଧରି ବିଜେଡି-ବିଜେପି ମେଣ୍ଟ ଚର୍ଚ୍ଚା ରାଜନୀତିକୁ ସରଗରମ କରି ରଖିଥିଲା । ଗତକାଲି ନବୀନ ନିବାସରେ ବିଜେଡିର ବୈଠକ ଏବଂ ଦିଲ୍ଲୀରେ ବିଜେପିର ବୈଠକ ପରେ ମେଣ୍ଟକୁ ନେଇ ଯେଉଁ ଛକାପଞ୍ଝା ଚାଲିଥିଲା, ତାହା ନିର୍ଣ୍ଣାୟକ ସ୍ଥିତିରେ ପହଁଚି ଯାଇଛି । ଅର୍ଥାତ ରାଜ୍ୟରେ ଶାସକ ଓ ମୁଖ୍ୟ ବିରୋଧୀ ଦଳ ଏକାଠି ୨୦୨୪ ନିର୍ବାଚନ ଲଢ଼ିବା ନେଇ ଏକପ୍ରକାର ନିଶ୍ଚିତ ହୋଇଛି । କେବଳ ଅପେକ୍ଷା, କେବେ ହେବ ବିଧିବଦ୍ଧ ଘୋଷଣା? କୁହାଯାଉଛି, ଆସନ୍ତା ୧୨ ତାରିଖରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓଡ଼ିଶା ଆସିପାରନ୍ତି । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସହ ଏକାଠି ମେଣ୍ଟ ସଂପର୍କରେ ଘୋଷଣା କରିପାରନ୍ତି
Kanak News is now on WhatsApp
Join and get latest news updates delivered to you via WhatsApp
ତେବେ ମେଣ୍ଟ ଯେ ଚୂଡ଼ାନ୍ତ ହୋଇସାରିଛି, ଏକଥା ସ୍ପଷ୍ଟ ଭାବେ କହୁନାହାନ୍ତି ବିଜେଡି ଓ ବିଜେପି ନେତା । ଯାହା ପରୋକ୍ଷରେ ଇସାରା ଦେଉଛନ୍ତି । ରାଷ୍ଟ୍ରୀୟ ହିତ କଥା କହୁଛି ବିଜେପି, ରାଜ୍ୟ ସ୍ୱାର୍ଥ ପାଇଁ ସବୁକିଛି କରାଯିବ କହି ନିରବ ରହୁଛନ୍ତି ବିଜେଡି ନେତା ।
ବିଜେଡି-ବିଜେପି ମେଣ୍ଟ ଚର୍ଚ୍ଚା ଭିତରେ ଚଳଚଞ୍ଚଳ ହୋଇଛି ରାଜ୍ୟ କଂଗ୍ରେସ ଶିବିର । ରାଜ୍ୟ ସ୍ୱାର୍ଥରେ ନୁହେଁ, ନିଜ ସ୍ୱାର୍ଥ ପାଇଁ ବିଜେପି ସହ ବିଜେଡି ମେଣ୍ଟ କରୁଥିବା ନେଇ ପ୍ରେସମିଟ୍ କରି କହିଛନ୍ତି ପିସିସି ସଭାପତି । ମେଣ୍ଟ ହେଲେ ନିର୍ବାଚନରେ କୌଣସି ଫରକ ପଡ଼ିବନି, କଂଗ୍ରେସର ୯ରୁ ୯୦ ମିଶନ ସଫଳ ହେବ ବୋଲି ସେ ଦମ୍ଭୋକ୍ତି ପ୍ରକାଶ କରିଛନ୍ତି । ଅନେକ ବିଜେପି ଓ ବିଜେଡି ନେତା କଂଗ୍ରେସ ସଂପର୍କରେ ଥିବା କହିଛନ୍ତି ଶରତ ପଟ୍ଟନାୟକ ।
ବିଜେପିର ରାଜ୍ୟ ନିର୍ବାଚନ ପ୍ରଭାରୀ ବିଜୟ ପାଲ ସିଂହ ତୋମାରଙ୍କ ନେତୃତ୍ୱରେ ଆଜି ତାଙ୍କ ଦିଲ୍ଲୀ ବାସଭବନରେ ବୈଠକ ହୋଇଛି । ରାଜ୍ୟ ବିଜେପି ନେତାଙ୍କୁ ଦିଲ୍ଲୀ ନଛାଡିବା ପାଇଁ ଶୀର୍ଷ ନେତୃତ୍ୱଙ୍କ ନିର୍ଦ୍ଦେଶ ରହିଥିବା ସୂଚନା ମିଳିଛି । ମେଣ୍ଟର ରୂପରେଖ କ’ଣ ହେବ, ଏହି ବୈଠକରେ ଆଲୋଚନା ହୋଇଥିବା କୁହାଯାଉଛି । ଏପଟେ ବିଜେଡି ଶିବିରରେ ମଧ୍ୟ ଚୂଡ଼ାନ୍ତ ରୂପରେଖ ପାଇଁ ଚାଲିଛି ଅଙ୍କକଷା