କରୋନା ଲକଡାଉନରେ କିଭଳି ମଜୁରୀ ହରାଇଛନ୍ତି ଶ୍ରମିକ ଓ ଚାକିରିଆ: ଆସିଲା ସାଂଘାତିକ ରିପୋର୍ଟ; ମାର୍ଚ୍ଚ ୨୫ରୁ ମେ ୩ ଭିତରେ ୩୩ ହଜାର ୮ ଶହ କୋଟି ଟଙ୍କାର ହରାଇଛନ୍ତି ମଜୁରି
ଗ୍ରାମାଂଚଳ ଅପେକ୍ଷା ଅଧିକ ପ୍ରଭାବିତ ହୋଇଛି ସହରାଂଚ
କନକ ବ୍ୟୁରୋ: କରୋନା ସଂକ୍ରମଣ ରୋକିବାକୁ ସାରାଦେଶେରେ ଲକଡାଉନ୍ ଫଳରେ ଶ୍ରମିକ ଓ ଚାକିରିଆ ଗୋଷ୍ଠୀ କିଭଳି ମଜୁରି ହରାଇଛନ୍ତି ତାକୁନେଇ ଚମକାଇ ଦେଲାଭଳି ରିପୋର୍ଟ ପ୍ରକାଶ ପାଇଛି । ଏକ ଅଧ୍ୟୟନ ଅନୁସାରେ ଦେଶରେ ମାର୍ଚ୍ଚ ୨୫ରୁ ମେ’ ୩ ତାରିଖ ମଧ୍ୟରେ ଦୁଇଟି ପର୍ଯ୍ୟାୟରେ ଲାଗୁ ହୋଇଥିବା ଲକଡାଉନ୍ କଟକଣା ଫଳରେ ୩୩ ହଜାର ୮୦୦ କୋଟି ଟଙ୍କାର ମଜୁରି ହରାଇଛନ୍ତି ଲୋକେ । ଇନ୍ଦିରା ଗାନ୍ଧୀ ଇନଷ୍ଟିଚ୍ୟୁଟ ଅଫ ଡେଭଲପମେଂଟ ରିସର୍ଚ୍ଚ ପକ୍ଷରୁ ଏହି ରିପୋର୍ଟ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହି ରିପୋର୍ଟରେ କୁହାଯାଇଛି ଦେଶରେ ମାର୍ଚ୍ଚ ୨୫ରୁ ଏପ୍ରିଲ ୧୪ ମଧ୍ୟରେ ପ୍ରଥମ ପର୍ଯ୍ୟାୟ ଲକଡାଉନ ଫଳରେ ୧୧ କୋଟି ୬୦ ଲକ୍ଷ ଲୋକ ରୋଜଗାର ଉପରେ ସଂକଟ ଆସିଛି । ଅର୍ଥାତ ଏମାନେ ମଜୁରି ହରାଇଛନ୍ତି । ଯାହା ମଧ୍ୟରେ କେବଳ ୧୦ କୋଟି ୪୦ ଲକ୍ଷ ଲୋକ ଅଣସଂଗଠିତ କ୍ଷେତ୍ରର ।
ସେହିପରି ଏପ୍ରିଲ ୧୪ରୁ ମେ’ ୩ ମଧ୍ୟରେ ଦ୍ୱିତୀୟ ପର୍ଯ୍ୟାୟ ଲକଡାଉନ ଫଳରେ ୭ କୋଟି ୯୦ ଲକ୍ଷ ଲୋକଙ୍କ ରୋଜଗାର ଉପରେ ସଂକଟ ପଡିଛି ଓ ଏମାନେ ମଜୁରି ହରାଇଛନ୍ତି । ସେହିପରି ଅନୁମାନ କରାଯାଇଛି କାମଧନ୍ଦା ହରାଇଥିବା ଏହି ଲୋକମାନେ ଯଦି ୬ ମାସ ଯାଏଁ ରୋଜଗାର ହରାଇ ଘରେ ବସନ୍ତି ତେବେ ମୋଟ୍ ୨ ଲକ୍ଷ କୋଟି ଟଙ୍କାର ମଜୁରି ହରାଇବେ । ଯାହା ୨୦୨୦-୨୧ ଆର୍ଥିକ ବର୍ଷରେ ମୋଦି ସରକାର ମହାତ୍ମ ଗାନ୍ଧୀ ନରେଗା ଆଇନରେ ବଜେଟ୍ ଅନୁଦାନର ପ୍ରାୟ ୩ ଗୁଣା ହେବ ବୋଲି କୁହାଯାଇଛି ।
ଅଧ୍ୟୟନରେ କୁହାଯାଇଛି କରୋନା ସଂକ୍ରମଣର ମାମଲା ଅଧିକ ରହିଥିବା ଦେଶର ୫ଟି ରାଜ୍ୟରେ ଶ୍ରମିକ ଓ ଚାକିରିଆ ଗୋଷ୍ଠୀଙ୍କ ରୋଜଗାର ପ୍ରତି ଅଧିକ ବିପଦ ସୃଷ୍ଟି ହୋଇଛି । ଯାହା ପ୍ରାୟ ୪୦ ପ୍ରତିଶତ ହେବ ।
ଗ୍ରାମାଂଚଳ ଅପେକ୍ଷା ସହରାଂଚଳରେ ଲୋକଙ୍କ ରୋଜଗାର ପ୍ରତି ଅଧିକ ବିପଦ ସୃଷ୍ଟି ହୋଇଥିବାରୁ ସେମାନେ ଅଧିକ ମଜୁରି ହରାଇଥିବା ଏହି ଅଧ୍ୟୟନରେ କୁହାଯାଇଛି । ଇମ୍ପାକ୍ଟ ଅଫ କୋଭିଡ-୧୯ ପାଣ୍ଡେମିକ ଅନ ଲେବର ସପ୍ଲାଏ ଆଣ୍ଡ ଗ୍ରସ ଭାଲ୍ୟୁ ଆଡେଡ୍ ଇନ ଇଣ୍ଡିଆ ନାମରେ ଏହି ସର୍ଭେ ରିପୋର୍ଟ ପ୍ରକାଶ ପାଇଛି ।