କନକ ବ୍ୟୁରୋ : ୨୦୧୯ ଲୋକସଭା ନିର୍ବାଚନର ୬ଷ୍ଠ ପର୍ଯ୍ୟାୟ ନିର୍ବାଚନ ପାଇଁ ଆରମ୍ଭ ହୋଇଛି ଭୋଟଗ୍ରହଣ । ସକାଳ ୭ଟାରୁ ବୁଥ୍ ଆଗରେ ଲମ୍ବା ଲାଇନରେ ରହି ନିଜର ମତଦାନ ସାବ୍ୟସ୍ତ କରୁଛନ୍ତି ଜନତା । ଏହି ପର୍ଯ୍ୟାୟରେ ମୋଟ ୯୭୯ ଜଣ ପ୍ରାର୍ଥୀ ନିଜର ଭାଗ୍ୟ ପରୀକ୍ଷା କରୁଛନ୍ତି । ମୋଟ ୧୦.୧୬ କୋଟି ମତଦାତା ଆଜି ନିଜର ନେତାଙ୍କୁ ବାଛିବେ । ଖାସକରି ଏହି ପର୍ଯ୍ୟାୟର ବିଜେପି ପାଇଁ ସବୁଠୁ ବଡ ଚ୍ୟାଲେଞ୍ଜ ଭାବେ ଉଭା ହୋଇଛି । ୨୦୧୪ରେ ବିଜେପି ଯେଉଁ ସଫଳତା ହାସଲ କରିଥିଲା ତାହା ବଜାୟ ରହୁଛି କି ନାହିଁ ତାହା ସବୁଠୁ ବଡ ପ୍ରଶ୍ନ ହୋଇ ଛିଡା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଉତ୍ତର ପ୍ରଦେଶର ଯେଉଁ ୧୪ଟି ଆସନରେ ଆସନ୍ତାକାଲି ଭୋଟ୍ ଗ୍ରହଣ ହେବ ସେଥିରୁ ୧୨ଟି ଆସନରେ ବିଜେପି ୨୦୧୪ରେ ବିଜୟୀ ହୋଇଥିଲା। ଆସନ୍ତାକାଲି ମଧ୍ୟପ୍ରଦେଶର ୮ ଆସନ, ହରିୟାଣାର ୧୦ ଆସନ, ଦିଲ୍ଲୀର ୭ ଆସନ, ଝାଡ଼ଖଣ୍ଡର ୪ ଏବଂ ପଶ୍ଚିମବଂଗର ୮ଟି ଆସନ ପାଇଁ ଭୋଟ୍ ଗ୍ରହଣ ହେବ। ଏହା ବ୍ୟତୀତ ପଶ୍ଚିମ ତ୍ରିପୁରା ଆସନ ପାଇଁ ପୁନଃ ଭୋଟ୍ ଗ୍ରହଣ ହେବ। ଷଷ୍ଠ ପର୍ଯ୍ୟାୟରେ ୩୪ଟି ରେଡ୍ ଆଲର୍ଟ ଆସନ ରହିଛି। ଏହି ଆସନଗୁଡ଼ିକରେ ୩ ଜଣରୁ ଅଧିକ ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି।
ଉତ୍ତର ପ୍ରଦେଶର ପୂର୍ବାଞ୍ଚଳର ସମସ୍ତ ୧୪ଟି ଆସନରେ ଜୋର୍ଦାର ମୁକାବିଲା ହେଉଛି। ଏବେ ଭୋଟ୍ ଗଣିତ ଏସ୍ପି-ବିଏସ୍ପି ମହାମେଣ୍ଟ ସପକ୍ଷରେ ଥିଲେ ମଧ୍ୟ କଂଗ୍ରେସ ଯଦି ବଡ଼ ଧରଣର ଭୋଟ୍ ବିଭାଜନ ଘଟାଇବାରେ ସକ୍ଷମ ହେବ ତା’ହେଲେ ମହାମେଣ୍ଟ ପାଇଁ ବିଜୟ ରାସ୍ତା ଏତେ ସହଜ ହେବନାହିଁ। କଂଗ୍ରେସ ପାଇଁ ମଧ୍ୟ ୟୁପି ପୂର୍ବାଞ୍ଚଳ ଯଥେଷ୍ଟ ଗୁରୁତ୍ବ ବହନ କରୁଛି। ପୂର୍ବାଞ୍ଚଳ ପ୍ରଭାରୀ ଦାୟିତ୍ବ କଂଗ୍ରେସ ସାଧାରଣ ସଂପାଦିକା ପ୍ରିୟଙ୍କା ଗାନ୍ଧୀଙ୍କ ଉପରେ ନ୍ୟସ୍ତ ଥିବା ବେଳେ ଏହି ଅଂଚଳରେ କଂଗ୍ରେସ ତା’ର ସବୁ ଶକ୍ତି ଖଟାଇଛି। ତେଣୁ କଂଗ୍ରେସର ଷ୍ଟାର୍ ପ୍ରଚାରକ ପ୍ରିୟଙ୍କାଙ୍କ ପାଇଁ ଏହା ସମ୍ମାନର ପ୍ରଶ୍ନ ହୋଇଛି।
ଷଷ୍ଠ ପର୍ଯ୍ୟାୟରେ ଯେଉଁ ଚର୍ଚ୍ଚିତ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ ହେବ ସେମାନଙ୍କ ମଧ୍ୟରେ କେନ୍ଦ୍ରମନ୍ତ୍ରୀ ମେନକା ଗାନ୍ଧୀ, କଂଗ୍ରେସ ନେତା ଦିଗ୍ବିଜୟ ସିଂହ, ଶୀଲା ଦିକ୍ଷୀତ, ସମାଜବାଦୀ ପାର୍ଟି ସୁପ୍ରିମୋ ଅଖିଳେଶ ଯାଦବ ପ୍ରମୁଖ ରହିଛନ୍ତି। ଦିଲ୍ଲୀରେ କଂଗ୍ରେସ ଏବଂ ଆପ୍ ମଧ୍ୟରେ ମେଣ୍ଟ ସମ୍ଭବ ହୋଇନଥିବାରୁ ଏବେ ଲଢ଼େଇ ବେଶ୍ ରୋଚକ ହୋଇଉଠିଛି। ଏଠାରେ ସମସ୍ତ ୭ ଆସନରେ ବିଜେପି, କଂଗ୍ରେସ ଏବଂ ଆପ୍ ମଧ୍ୟରେ ତ୍ରିକୋଣୀୟ ଲଢ଼େଇ ହେଉଛି। ୨୦୧୪ରେ ବିଜେପି ଦିଲ୍ଲୀର ସମସ୍ତ ୭ଟି ଆସନରେ ବିଜୟ ହାସଲ କରିଥିଲା। ପଡ଼ୋଶୀ ହରିୟାଣାର ୧୦ ଲୋକସଭା ଆସନ ମଧ୍ୟ ରବିବାର ଭୋଟ୍ ଗ୍ରହଣ ହେବ।