ଆମ ମୌଜାରୁ ପ୍ରାର୍ଥୀ ନଦେଲେ ଭୋଟ ଦେବୁନି: ଏମିତି ଚେତାବନୀ ଦେଲେ ୧୯ ଖଣ୍ଡ ମୌଜାର ଭୋଟର
କନକ ବ୍ୟୁରୋ: ନେତୃତ୍ୱ ନେବାର ସୁଯୋଗରୁ ବଞ୍ଚିତ କରିବା ନେଇ ଜିଲ୍ଲାର ଉପାନ୍ତ ୧୯ ଖଣ୍ଡ ମୌଜା ଅଂଚଳରେ ତେଳୁଛି ଅସନ୍ତୋଷ । ପୁଣିଥରେ ଦେଖା ଦେଇଛି ଉପେକ୍ଷା ବିରୋଧରେ ସ୍ୱର । ଏଯାଏଁ ୧୯ ଖଣ୍ଡ ମୌଜାରୁ କେବେ ବି ଜିଲ୍ଲା ପରିଷଦ ପ୍ରାର୍ଥୀ ହେବା ଲାଗି କୌଣସି ରାଜନୈତିକ ଦଳ ସୁଯୋଗ ଦେଇ ନାହାନ୍ତି । ଏଥର ରାଜନୈତିକ ଦଳ ଗୁଡ଼ିକ ୧୯ ଖଣ୍ଡ ମୌଜାରୁ ପ୍ରାର୍ଥୀ ନଦେଲେ ମହଙ୍ଗା ପଡ଼ିବ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।
Kanak News is now on WhatsApp
Join and get latest news updates delivered to you via WhatsApp
ବହୁତ ସହିଲୁ, ଆଉ ନୁହେଁ ବୋଲି ରାଜନୈତିକ ଦଳ ଗୁଡ଼ିକୁ ଚେତାବନୀ ଦେଇ ବିଭିନ୍ନ ଛକ ମାନଙ୍କରେ କାନ୍ଥବାଡ଼ରେ ପୋଷ୍ଟର ମରା ଯାଇଥିବା ଘଟଣା ସମଗ୍ର ଅଂଚଳରେ ରାଜନୈତିକ ଚର୍ଚ୍ଚାକୁ ସରଗରମ କରିଛି । ଏଭଳି ପୋଷ୍ଟର ଲାଗିଛି ଓଡିଶା ଦ୍ୱିତୀୟ ବୃହତମ ବ୍ଲକ ଲଖନପୁର ବ୍ଲକ ୧୯ ଖଣ୍ଡ ମୌଜାରେ । ଛତିଶଗଡ ସୀମାକୁ ଲାଗି ରହିଛି ଏହି ୧୯ ଖଣ୍ଡ ମୌଜା ।କଣ୍ଢେଇକେଲା, ରେମତା, ଚାରପାଲି ଏବଂ ପିଥଣ୍ଡାଭଳି ୪ ଟି ପଂଚାୟତକୁ ମିଶାଇ ୧୯ ଖଣ୍ଡ ମୌଜା ଗଠିତ ହୋଇଛି ।
ଏହି ଅଂଚଳରୁ ବିଗତ ଦିନରେ କାହାରିକୁ ଜିଲ୍ଲା ପରିଷଦରେ ପ୍ରତିନିଧତ୍ୱ କରିବା ଲାଗି କୌଣସି ଦଳ ସୁଯୋଗ ଦେଇ ନାହାନ୍ତି । ଲଖନପୁର ବ୍ଲକ ଜୋନ ୧ ଜିଲ୍ଲା ପରିଷଦ ଗଠନ ହେବାଠାରୁ ଏଯାଏଁ ଏ ଅଂଚଳରୁ ଜଣେ ହେଲେ ପ୍ରାର୍ଥୀ ହୋଇ ନାହାନ୍ତି ।ଯାହାକୁ ନେଇ ଏଥର ସ୍ଥାନୀୟ ଲୋକଙ୍କ ଭିତରେ ଦେଖା ଦେଇଛି ଅସନ୍ତୋଷ । କୌଣସି ନିର୍ଦ୍ଦିଷ୍ଟ ଦଳ ନୁହେଁ ବରଂ ସମସ୍ତ ପ୍ରମୁଖ ରାଜନୈତିକ ଦଳ ଗୁଡ଼ିକୁ ଟାର୍ଗେଟ କରି ଏବେ ପୋଷ୍ଟର ବାଜି ଆରମ୍ଭ ହୋଇଛି ।
୧୯ ଖଣ୍ଡ ମୌଜାରୁ କାହାକୁ ପ୍ରାର୍ଥୀ କରାଯାଇ ନଥିବା ବେଳେ ସେଠାକାର ଦାବି, ସ୍ୱର, କେବେ ପ୍ରଶାସନ ପାଖରେ ପହଂଚୁ ନାହିଁ ବୋଲି ସ୍ଥାନୀୟ ଲୋକେ କହିଛନ୍ତି । ଫଳରେ ଏ ୧୯ ଖଣ୍ଡ ଅଂଚଳରୁ ପ୍ରାର୍ôଥ ଦେବା ପାଇଁ ବିଭିନ୍ନ ଛକ ନିକଟରେ ଏହି ଅଜଣା ପୋଷ୍ଟର ଲାଗିଥିବା ବେଳେ ରାଜନୈତିକ ଦଳ ପାଇଁ ଚିନ୍ତାର କାରଣ ପାଲଟିଲାଣି । କାରଣ ୧୯ ଖଣ୍ଡ ମୌଜାରୁ ପ୍ରାର୍ଥୀ ନଦେଲେ ଅଂଚଳବାସୀ ଭୋଟବର୍ଜନ କରିବେ ବୋଲି ଚେତାବନୀ ଦେଇଛନ୍ତି ।