ବୀରେନ୍ଦ୍ର ସେହୱାଗଙ୍କ ବଡ ଭବିଷ୍ୟବାଣୀ । କହିଲେ, କେଉଁ ୨ଟି ଟିମ୍ ଖେଳିବେ ଫାଇନାଲ ଓ କିଏ ଜିତିବ ଟି-୨୦ ବିଶ୍ୱକପ ଟ୍ରଫି?
କନକ ବ୍ୟୁରୋ : ଟି-୨୦ ବିଶ୍ୱକପକୁ ନେଇ ପୂର୍ବତନ ଭାରତୀୟ କ୍ରିକେଟର ବୀରେନ୍ଦ୍ର ସେହୱାଗଙ୍କ ବଡ ଭବିଷ୍ୟବାଣୀ । ସବୁବେଳେ ମ୍ୟାଚକୁ ନେଇ ରୋକଠୋକ କହୁଥିବା ସେହୱାଗ ଚଳିତ ବିଶ୍ୱକପରେ ଯେଉଁ ଟିମକୁ ଟାଇଟଲ ଫେଭରିଟ ବୋଲି କହିଛନ୍ତି ସେହି ଟିମ୍ ଏବେ ଦମଦାର ଫର୍ମରେ ରହିଛି । ଟି-୨୦ ବିଶ୍ୱକପର ପ୍ରତିଟି ମ୍ୟାଚ୍ ଉପରେ ନଜର ରଖିଛନ୍ତି ସେହୱାଗ । ଆଉ ସବୁଠୁ ବଡ କଥା ହେଲା, ମ୍ୟାଚ୍ ପୂର୍ବରୁ ଓ ମ୍ୟାଚ ପରେ ଏହାର ପୋଷ୍ଟମର୍ଟମ କରନ୍ତି ନଜଫଗଡର ନୱାବ । ତେବେ ସୁପର-୧୨ ପର୍ଯ୍ୟାୟରେ ଆଉ ଅଳ୍ପ କେତୋଟି ମ୍ୟାଚ୍ ବାକିଥିବା ବେଳେ ସେମିଫାଇନାଲ ଚିତ୍ର ଏଯାବତ ସ୍ପଷ୍ଟ ହୋଇନାହିଁ । କିନ୍ତୁ ସୁପର-୧୨ ପର୍ଯ୍ୟାୟ ଶେଷ ହେବା ପୂର୍ବରୁ କେଉଁ ଟିମ୍ ସେମିଫାଇନାଲ ଖେଳିବ ଓ କିଏ ଚାମ୍ପିୟନ ହେବ ତାହାକୁ ନେଇ ବଡ ଭବିଷ୍ୟବାଣୀ କରିଛନ୍ତି ସେହୱାଗ ।
Kanak News is now on WhatsApp
Join and get latest news updates delivered to you via WhatsApp
ସୋସିଆଲ ମିଡ଼ିଆରେ ନିଜର ସ୍ୱତନ୍ତ୍ର କାର୍ଯ୍ୟକ୍ରମ ବୀରୁଗିରିରେ କ୍ରିକେଟ ପ୍ରଂଶସକଙ୍କ ପ୍ରଶ୍ନର ଉତ୍ତର କିଛି ଏମିତି ରଖିଛନ୍ତି ସେହୱାଗ । ସେ କହିଛନ୍ତି, ମୋତେ ଲାଗୁଛି ପାକିସ୍ତାନ ଓ ଇଂଲଣ୍ଡ ଟାଇଟଲ ପାଇଁ ମୁହାଁମୁହିଁ ହେବେ । ଆଉ ଫାଇନାଲ ମୁକାବିଲାରେ ପାକିସ୍ତାନକୁ ମାତ୍ ଦେଇ ଟି-୨୦ ଚାମ୍ପିୟନ ହୋଇପାର ଇଂଲଣ୍ଡ ।
ସେହୱାଗଙ୍କ ଏଭଳି ଆକଳନକୁ ନେଇ ଆଶ୍ଚର୍ଯ୍ୟ ହେବାର ଆବଶ୍ୟକତା ମଧ୍ୟ ନାହିଁ । କାରଣ ଚଳିତ ଟି-୨୦ ବିଶ୍ୱକପରେ ଦମଦାର ଫର୍ମରେ ରହିଛି ଇଂଲଣ୍ଡ ଟିମ୍ । ବ୍ୟାଟିଂ, ବୋଲିଂ ଓ ଫିଲ୍ଡି ପ୍ରତିଟି କ୍ଷେତ୍ରରେ ଇଂଲଣ୍ଡ ଖେଳାଳୀଙ୍କୁ ଭିନ୍ନ ଅବତାରରେ ଦେଖିବାକୁ ମିଳୁଛି । ଖାସକରି ଚଳିତ ବିଶ୍ୱକପରେ ବଟଲର ଚମକ୍ରାର ଫର୍ମରେ ରହିଛନ୍ତି । ଯାହାର ଫଳାଫଳ ପଏଣ୍ଟ ଟେବୁଲରେ ଦେଖିବାକୁ ମିଳିଛି । ଗ୍ରୁପ ପର୍ଯ୍ୟାୟରେ ଏବେ ସୁଦ୍ଧା ଇଂଲଣ୍ଡ ୪ଟିରୁ ୪ଟି ମ୍ୟାଚରେ ବିଜୟୀ ହେବା ସହ ଗ୍ରୁପର ଶୀର୍ଷରେ ରହିଛି । ଆଉ ଏହାସହ ସେମିଫାଇନାଲ ଟିକେଟ ହାତେଇଛି । ତେଣୁ ଇଂଲଣ୍ଡ ଟିମକୁ ଟାଇଟଲ ରେସରେ ଆଗରେ ରଖିଛନ୍ତି ସେହୱାଗ ।
ଅନ୍ୟପଟେ ଟି-୨୦ ବିଶ୍ୱକପର ସୁପର-୧୨ ପର୍ଯ୍ୟାୟ ମ୍ୟାଚ୍ ଆରମ୍ଭ ହେବା ପୂର୍ବରୁ ଟାଇଟଲ ରେସରେ ଇଂଲଣ୍ଡକୁ ଆଗରେ ରଖିଥିଲେ ପୂର୍ବତନ ଅଷ୍ଟ୍ରେଲୀୟ ବୋଲର ସେନ ୱାନ୍ । ଆଉ ୱାର୍ଣ୍ଣଙ୍କ ଏହି ଆକଳନକୁ ଏଯାଏଁ ସଠିକ ପ୍ରମାଣିତ କରିଆସିଛି ଇଂଲଣ୍ଡ । ଅନ୍ୟପଟେ ସେମିଫାଇନାଲ ଟିକେଟ ପାଇଁ ଏବେ ବି ଆଶା ବାନ୍ଧି ବସିଛି ଟିମ୍ ଇଣ୍ଡିଆ । ନ୍ୟୁଜିଲାଣ୍ଡ ପରାଜିତ ହେଲେ ଟିମ୍ ଇଣ୍ଡିଆ ପାଇଁ ସେମିଫାଇନାଲ ରାସ୍ତା ଖୋଲିଯିବ । ତେଣୁ ଏବେ ନ୍ୟୁଜିଲାଣ୍ଡ ଓ ଆଫଗାନିସ୍ତାନ ମ୍ୟାଚ୍ ଉପରେ ଟିମ୍ ଇଣ୍ଡିଆର ନଜର ରହିବ ।