ଇଣ୍ଡିଜ୍ ଗସ୍ତ ପୂର୍ବରୁ ଆଜି ସାମ୍ବାଦିକ ସମ୍ମିଳନୀ କରିବେ ବିରାଟ ! ଏହି ୫ଟି ପ୍ରଶ୍ନର କ’ଣ ଉତ୍ତର ରଖିବେ କୋହଲି ?
କନକ ବ୍ୟୁରୋ : ୱେଷ୍ଟଇଣ୍ଡିଜ ଗସ୍ତରେ ଯିବା ପୂର୍ବରୁ ଆଜି ସାମ୍ବାଦିକ ସମ୍ମିଳନୀରେ ସାମିଲ ହେବେ ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି । ବିସିସିଆଇ ଏନେଇ ସୂଚନା ଦେଇଥିବା ବେଳେ ଆଜି ମୁମ୍ବାଇରେ ସନ୍ଧ୍ୟା ୬ଟାରେ ପ୍ରେସ କନଫରେନ୍ସ ଅନୁଷ୍ଠିତ ହେବ । ଆସନ୍ତା ଅଗଷ୍ଟ ମାସ ୩ ତାରିଖରୁ ୱେଷ୍ଟଇଣ୍ଡିଜ୍ ଗସ୍ତରେ ଯିବ ଟିମ୍ ଇଣ୍ଡିଆ । ବିରାଟ ବ୍ରିଗେଡ୍ ୩ଟି ଟି-୨୦ ମ୍ୟାଚ୍ ବିଶିଷ୍ଟ ସିରିଜରୁ ଏହି ଗସ୍ତ ଆରମ୍ଭ କରିବ । ଯାହା ପୂର୍ବରୁ ଦୁଇଟି ମ୍ୟାଚ୍ ଆମେରିକାର ଫ୍ଲୋରିଡାରେ ଖେଳାଯିବ ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱକପ ସେମିଫାଇନାଲରେ ଟିମ୍ ଇଣ୍ଡିଆର ପରାଜୟ ପରେ ପ୍ରଥମ ଥର ପାଇଁ ଭାରତରେ ସାମ୍ବାଦିକ ସମ୍ମିଳନୀରେ ସାମିଲ ହେବେ ଅଧିନାୟକ ବିରାଟ କୋହଲି । ଆଉ ଏହି ସମୟରେ ବିରାଟଙ୍କୁ ଅନେକ ଜଟିଳ ପ୍ରଶ୍ନର ସାମ୍ନା କରିବାକୁ ପଡିପାରେ ।
୧.ବିଶ୍ୱକପ ମଧ୍ୟରେ ଜୁନ୍ ୨୩ ତାରିଖରେ ଅଚାନକ ଖବର ଆସିଥିଲା ଯେ, ୱେଷ୍ଟଇଣ୍ଡିଜ ଗସ୍ତରେ ଟି-୨୦ ଏବଂ ଦିନିକିଆ ସିରିଜରେ ବିସିସିଆଇକୁ ବିଶ୍ରାମ ମାଗିଛନ୍ତି କୋହଲି । କିନ୍ତୁ ସେମିଫାଇନାଲ ପରେ ୱେଷ୍ଟଇଣ୍ଡିଜ୍ ଗସ୍ତ ପାଇଁ ଯେତେବେଳେ ଦଳଘୋଷଣା ହୋଇଥିଲା, ସେତେବେଳେ ୩ଟି ଯାକ ଫର୍ମାଟରେ କୋହଲିଙ୍କୁ ଦଳର ମଙ୍ଗ ଧରାଇଥିଲେ ଚୟନକର୍ତ୍ତା । ତେବେ ଏ ବାବଦ ପ୍ରଶ୍ନର ମଧ୍ୟ ଆଜି କୋହଲିଙ୍କୁ ଉତ୍ତର ରଖିବାକୁ ପଡିପାରେ ।
୨.ସେହିପରି ବିଶ୍ୱକପ ସେମିଫାଇନାଲରେ ପରାଜୟ ପରେ ଅଧିନାୟକ ବିରାଟ କୋହଲି ଏବଂ ଉପଅଧିନାୟକ ରୋହିତ ଶର୍ମାଙ୍କ ମଧ୍ୟରେ ଫାଟ ସୃଷ୍ଟି ହୋଇଥିବାର ଖବର ସାମ୍ନା ଆସିଥିଲା । ତେଣୁ ଏ ବାବଦ ପ୍ରଶ୍ନର ମଧ୍ୟ କୋହଲିଙ୍କୁ ଉତ୍ତର ରଖିବାକୁ ହେବ ।
୩.ଆଉ ଏକ ବଡ କଥା ହେଉଛି, ଟିମ୍ ଇଣ୍ଡିଆ ପାଇଁ ନୂଆ କୋଚ୍ ଚୟନ ବେଳେ ଅଧିନାୟକ ବିରାଟ କୋହଲିଙ୍କ ମତ ଲୋଡା ଯିବନାହିଁ । ଏନେଇ ମଧ୍ୟ କୋହଲିଙ୍କ ପ୍ରତିକ୍ରିୟା ମଗାଯାଇପାରେ । କାରଣ ରବି ଶାସ୍ତ୍ରୀଙ୍କୁ ଯେତେବେଳେ କୋଚି ପାଇଁ ଚୟନ କରାଯାଉଥିଲା, ସେତେବେଳେ ଅଧିନାୟକ କୋହଲିଙ୍କ ମତ ଲୋଡାଯାଇଥିଲା ।
୪.ସେହିପରି ଦଳର ୪ ନମ୍ବର ବ୍ୟାଟିଂ କ୍ରମ ଦୁର୍ବଳତା ନେଇ ମଧ୍ୟ କୋହଲିଙ୍କୁ ଉତ୍ତର ରଖିବାକୁ ପଡିପାରେ ।
୫. ବିଶ୍ୱକପ ପରାଜୟ ପରେ ଜୋରଦାର ଚର୍ଚ୍ଚା ହୋଇଥିଲା ଯେ, ଧୋନୀଙ୍କୁ ତୁରନ୍ତ ସନ୍ୟାସ ନେବାରୁ ଅଟକାଇଥିଲେ କୋହଲି । ଆଉ କୁହାଯାଉଛି, ବିରାଟ ଚାହୁଁଛନ୍ତି ଆଗାମୀ ଟି-୨୦ ବିଶ୍ୱକପରେ ଦଳରେ ସାମିଲ ରୁହନ୍ତୁ ମାହି । ତେବେ ଏଭଳି କିଛି ରୋଚକ ପ୍ରଶ୍ନର ଆଜି କୋହଲିଙ୍କୁ ଉତ୍ତର ରଖିବାକୁ ହେବ ।