ସଂଜୟ ସିଂଙ୍କ ଗିରଫକୁ ଜୋରଦାର ବିରୋଧ: ଦିଲ୍ଲୀ ରାସ୍ତାରେ ଆପର ଗର୍ଜନ । ଆନ୍ଦୋଳନ କଲେ, ସ୍ଲୋଗାନ ଦେଲେ

କନକ ବ୍ୟୁରୋ: ଦିଲ୍ଲୀ ରାସ୍ତାରେ ଗର୍ଜନ । ବିଜେପି ସରକାରଙ୍କ ବିରୋଧରେ ରଣହୁଙ୍କାର । ଶହ ଶହ ସଂଖ୍ୟକ ଆମ ଆଦମୀ ପାର୍ଟି ନେତା, କର୍ମୀ, ସମର୍ଥକ ଏକଜୁଟ ହୋଇ ଗୁରୁବାର ଆନ୍ଦୋଳନ କରିଛନ୍ତି । ବୁଧବାର ଜେରା, ଚଢାଉ ପରେ ରାଜ୍ୟସଭା ସାଂସଦ ସଂଜୟ ସିଂଙ୍କୁ ଗିରଫ କରିଥିଲା ପ୍ରବର୍ତନ ନିର୍ଦ୍ଦେଶାଳୟ । ଯାହାକୁ ନେଇ ତାତି ଉଠିଛି ଆମ ଆଦମୀ ପାର୍ଟି । ବିଜେପି ଓ ଆପ କାର୍ଯ୍ୟାଳୟ ନିକଟରେ କର୍ମୀଙ୍କ ପ୍ରଦର୍ଶନ ସମୟରେ ଦିଲ୍ଲୀ ପୁଲିସ ମୁହାଁମୁହିଁ ଘଟଣା ମଧ୍ୟ ସାମ୍ନାକୁ ଆସିଛି । ପ୍ରଦର୍ଶନକାରୀଙ୍କୁ ପୁଲିସ ଘୋଷାଡି ଘୋଷାଡି କିଛିଙ୍କୁ ହାଜତକୁ ନେଇ ପରେ ଛାଡି ଦେଇଛି ପୁଲିସ । ସେପଟେ ରାଜଘାଟ ଯାଇ ଦିଲ୍ଲୀ ଯେ ଆମ ଆଦମୀ ପାର୍ଟି ଶାସନ ମୁକ୍ତ ହେଉ ବୋଲି ପ୍ରାର୍ଥନା କରିଛନ୍ତି ବିଜେପି ନେତା ।

ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଚଳିତ ବର୍ଷ ଜାନୁୟାରୀ ମାସରେ ଇଡି ତାର ଚାର୍ଜସିଟରେ ସଂଜୟ ସିଂଙ୍କ ନାଁ ଯୋଡିଥିଲା । ସଂଜୟ ସିଂ ୮୨ଲକ୍ଷ ଟଙ୍କା ଲାଂଚ ନେଇଥିବା ଇଡି ଚାର୍ଜସିଟରେ ଉଲ୍ଲେଖ ଅଛି । ସଂଜୟ ସିଂଙ୍କ ଗିରଫକୁ କେବଳ ଆମ ଆଦମୀ ପାର୍ଟି ନୁହେଁ ଅନ୍ୟ ବିରୋଧୀ ଦଳ ନେତା ମଧ୍ୟ ସହଜରେ ହଜମ କରିପାରୁନାହାଁନ୍ତି । ବିଜେପି ୨୦୨୪ ନିର୍ବାଚନ ହାରୁଥିବା ଜାଣିବା ପରେ ହତାଶ ହୋଇ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା କହିଛି ଆମ ଆଦମୀ ପାର୍ଟି ।ସେପଟେ ବିଜେପି କହିଛି ଦୁର୍ନିତୀଖୋର ଆପ ସରକାରଙ୍କ ହାତରେ ରହିଛି ଦିଲ୍ଲୀ । ଏହାର କିଙ୍ଗପିନ ହେଉଛନ୍ତି କେଜ୍ରିୱାଲ ।

ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ସଂଜୟଙ୍କ ଘରେ ବୁଧବାର ସକାଳୁ ଇଡି ଚଢ଼ାଉ କରିଥିଲା । ଏହାସହ ୧୦ଘଂଟା ଧରି ସଂଜୟଙ୍କୁ ଜେରା କରିବା ପରେ ରାତିରେ ସଂଜୟଙ୍କୁ ଗିରଫ କରିଛି ପ୍ରବର୍ତନ ନିର୍ଦ୍ଦେଶାଳୟ । ସେପଟେ ଏକ ଶୁଣାଣୀରେ ବୁଧବାର ସୁପ୍ରିମକୋର୍ଟ କହିଥିଲେ ଇଡି ଯେ ମନମୁଖୀ ଓ ଏକତରଫା କାମ କରୁଛି ।ଯାହା ଆଦୌ ଗ୍ରହଣୀୟ ନୁହେଁ ।