ଗଞ୍ଜାମରେ ଗାଇଡଲାଇନର ଖୋଲା ଉଲ୍ଲଙ୍ଘନ । ନାମାଙ୍କନ ଦାଖଲ ବେଳେ ଶୋଭାଯାତ୍ରାରେ ସାମିଲ ହେଲେ ଶହ ଶହ ଲୋକ
କନକ ବ୍ୟୁରୋ: ପଞ୍ଚାୟତ ନିର୍ବାଚନ ପାଇଁ ରାଜ୍ୟ ନିର୍ବାଚନ କମିଶନ ଗାଇଡଲାଇନ ଜାରି କରିଛନ୍ତି । କିନ୍ତୁ ଏହି ଗାଇଡଲାଇନର ଧଜିଆ ଉଡିଛି ଗଞ୍ଜାମରେ । ଗଞ୍ଜାମର ଦୁଇଟି ସ୍ଥାନରେ ପ୍ରାର୍ଥୀପତ୍ର ଦାଖଲ ବେଳେ ଶୋଭାଯାତ୍ରା ବାହାରିଛି । ବାଜା, ବାଣ ଓ ସ୍ଲୋଗାନରେ ଏମିତି ଲାଗୁଛି ଯେମିତି ନିୟମକୁ ଏମାନଙ୍କ ଖାତିର ନାହିଁ । ଏଥିରେ ସାମିଲ କର୍ମୀ, ସମର୍ଥକ ସାମାଜିକ ଦୂରତା ରକ୍ଷା କରିବା ତ ଦୂରର କଥା, ଅଧିକାଂଶ ଲୋକଙ୍କ ମୁହଁରେ ମାସ୍କ ବି ନଥିଲା ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟ ନିର୍ବାଚନ କମିଶନଙ୍କ ଗାଇଡଲାଇନର କେମିତି ଧଜିଆ ଉଡାଯାଇପାରେ, ବ୍ୟଙ୍ଗ କରାଯାଇପାରେ ତାର ଉଦାହରଣ ଆସିଛି ଗଞ୍ଜାମ ଜିଲ୍ଲାରୁ । ଗୋଟିଏ ଧରାକୋଟର ହୋଇଥିବାବେଳେ ଅନ୍ୟଟି ଆସକା ଖରିଆ ପଞ୍ଚାୟତରୁ । ଧରାକୋଟର ସମିତି ସଭ୍ୟ ପ୍ରାର୍ଥିନୀ ସୁଲକ୍ଷଣା ଗୀତାଞ୍ଜଳି ଦେବୀ ନିୟମ ଉଲ୍ଲଙ୍ଘନ କରି ହଜାର ହଜାର ସମର୍ଥକଙ୍କୁ ନେଇ, ବାଜା ବାଣ ଫୁଟାଇ ନାମାଙ୍କନ କରିବାକୁ ଯାଇଥିଲେ । ସେହି ସମୟର ଦୃଶ୍ୟ ଦେଖିଲେ ଲାଗୁଥିଲା ଯେମିତି କରୋନାର କୌଣସି ଭୟ ନାହିଁ ।
ସେହିପରି ଆସିକାର ଖରିଆ ପଞ୍ଚାୟତରେ ଦେଖିବାକୁ ମିଳିଛି ସମାନ ଦୃଶ୍ୟ । ଶହ ଶହ ସମର୍ଥକଙ୍କୁ ନେଇ ଶୋଭାଯାତ୍ରାରେ ଯାଇ ପ୍ରାର୍ଥୀପତ୍ର ଦାଖଲ କରିଛନ୍ତି ପ୍ରାର୍ଥୀ । ବାଜା ବଜାଇ ୫ ଶହରୁ ଅଧିକ କର୍ମୀଙ୍କ ସହ ଶୋଭାଯାତ୍ରାରେ ଯାଇ ନାମାଙ୍କନ ଦାଖଲ କରିଛନ୍ତି । ଖରିଆ ଗାଁର କାଳୀ ମନ୍ଦିରଠାରୁ ଏହି ଶୋଭାଯାତ୍ରା ବାହାରି ପଞ୍ଚାୟତ କାର୍ଯ୍ୟାଳୟ ଯାଏଁ ଯାଇଥିଲା । ଏଥିରେ ସାମିଲ କର୍ମୀ, ସମର୍ଥକ ସାମାଜିକ ଦୂରତା ରକ୍ଷା କରିବା ତ ଦୂରର କଥା, ଅଧିକାଂଶ ଲୋକଙ୍କ ମୁହଁରେ ମାସ୍କ ନଥିଲା ।
ରାଜ୍ୟରେ କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ନିର୍ବାଚନ କମିଶନ ନାମାଙ୍କନ ଦାଖଲ ବେଳେ ପ୍ରାର୍ଥୀଙ୍କ ସହ କେବଳ ଜଣେ ପ୍ରସ୍ତାବକ ଯିବା ପାଇଁ ଅନୁମତି ଦେଇଛନ୍ତି । ହେଲେ ଗଞ୍ଜାମ ଜିଲ୍ଲାରୁ ଆସିଥିବା ଏହି ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେବେ ଏନେଇ ପ୍ରଶ୍ନ ଉଠାଇଛନ୍ତି କଂଗ୍ରେସ ନେତା । ହେଲେ ପ୍ରଶ୍ନ ଉଠୁଛି ପ୍ରାର୍ଥୀମାନେ ଏତେ ବଡ ବଡ ଶୋଭଯାତ୍ରା କରୁଥିବାବେଳେ ସ୍ଥାନୀୟ ପୋଲିସ ଓ ପ୍ରଶାସନ କଣ କରୁଥିଲେ? ନିୟମ ଭାଙ୍ଗିଥିବା ପ୍ରାର୍ଥୀଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ଗ୍ରହଣ କରିବେ ରାଜ୍ୟ ନିର୍ବାଚନ କମିଶନ ।