୧୫ ଦିନରେ ଗଲାଣି ୧୫ ଜଣଙ୍କ ଜୀବନ । କିନ୍ତୁ କରୋନା ଟେଷ୍ଟ କରିବାକୁ ରାଜି ହଉନାହାନ୍ତି ଗ୍ରାମବାସୀ, ଓଲଟା ଯାଞ୍ଚ ଟିମକୁ ଦେଲେ ଧମକ ।
କନକ ବ୍ୟୁରୋ : କେବଳ ସହର ନୁହେଁ ଏବେ ଗାଁରେ ମଧ୍ୟ କାୟା ମେଲାଇ ଚାଲିଛି କରୋନା ଭୂତାଣୁ । ଆଉ ଏପରି ସ୍ଥିତିରେ ଗାଁ ଗୁଡିକରେ ଟେଷ୍ଟିଂ ବଢାଇବା ଉପରେ ଗୁରୁତ୍ୱ ଦିଆଯାଉଛି । କାରଣ ଦେଶର କେତେକ ଗାଁରୁ ଅଧିକ ସଂଖ୍ୟାରେ କରୋନାରେ ମୃତ୍ୟୁ ହେଉଥିବା ଖବର ଆସୁଛି । ଏହା ସତ୍ୱେ ମଧ୍ୟ କରୋନା ଟେଷ୍ଟ କରାଇବା ପାଇଁ ପ୍ରସ୍ତୁତ ନାହାନ୍ତି ଗାଁଲୋକେ । ଆଉ ଏହାରି ଭିତରେ ଉତ୍ତରପ୍ରଦେଶରୁ ଯେଉଁ ଖବର ଆସିଛି, ତାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ ।
Kanak News is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶର ବୁନ୍ଦେଲଖଣ୍ଡର ଏକ ଗାଁରେ ଯେତେବେଳେ, ସ୍ୱାସ୍ଥ୍ୟ ବିଭାଗର ଟିମ୍ ଯାଞ୍ଚ କରିବା ପାଇଁ ପହଞ୍ଚିଥିଲେ, ସେତେବେଳେ ଗାଁଲୋକେ ତାଙ୍କୁ ଘେରିବା ସହ ଗାଁରୁ ତଡିଦେଇଥିଲେ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ଗାଁରେ ଜ୍ୱର-ଥଣ୍ଡାରେ ପୀଡିତ ହୋଇ ଗତ ୧୫ ଦିନ ଭିତରେ ୧୫ଜଣ ଲୋକଙ୍କର ଜୀବନ ଗଲାଣି । ଏହା ପରେ ମଧ୍ୟ କରୋନା ଟେଷ୍ଟ କରାଇବା ପାଇଁ ରାଜି ହେଉନାହାନ୍ତି ଗ୍ରାମବାସୀ ।
କରୋନା ସଂକ୍ରମଣ ଦିନକୁ ଦିନ ଅଧିକ ଭୟଙ୍କର ହେଉଥିବା ବେଳେ, ସମସ୍ତଙ୍କୁ ଅଧିକ ସଚେତନ ହେବାର ଆବଶ୍ୟକତା ରହିଛି । କିନ୍ତୁ ଏପରି ମାନସିକତା ଚିନ୍ତା ବଢାଇବା ସ୍ୱାଭାବିକ । ଯଦି ଆପଣମାନଙ୍କ ପାଖରେ କରୋନାର କୌଣସି ବି ଲକ୍ଷଣ ଦେଖାଯାଉଛି, ତେବେ ସଙ୍ଗେ ସଙ୍ଗେ କରୋନା ପରୀକ୍ଷା କରାଇନେବା ଉଚିତ୍ ।