ନେତା ହୋ ! ବନ୍ଦ କର ନାଟକ… ରାସ୍ତା ହେବନି ତ ଭୋଟ୍ ଦେବୁନି… ଗାଁ ଲୋକଙ୍କ ଭୋଟ ବର୍ଜନ ନିଷ୍ପତ୍ତି
କନକ ବ୍ୟୁରୋ: ଫେରିଯାଅ ନେତା ଫେରିଯାଅ… ରାସ୍ତା କରିବ ତ ଭୋଟ ପାଇବ… ରାସ୍ତା ନାହିଁ ତ ଭୋଟ ନାହିଁ । ବନ୍ଦ କର ତମ ନିତିଦିନିଆ ନାଟକ, ଫେରାଇନିଅ ତମ ପୁଳାପୁଳା ପ୍ରତିଶ୍ରୁତି । ଭୋଟ ଆସିଲେ ଆସୁଛ, ଭୋଟ ସରିଲେ ଅନ୍ତର୍ଦ୍ଧ୍ୟାନ ହେଇଯାଉଛ । ଭଲ ଭଲ କଥା କହି, ବିକାଶ ସ୍ୱପ୍ନ ଦେଖାଇ ସବୁବେଳେ ଠକୁଛ । ଆଉ ନୁହେଁ ଏବେ ସମୟ ଆସିଛି ତମ ମୁଖା ଖୋଲିବାର, ସମୟ ଆସିଛି ତମକୁ ଆମ ଏକତା ଦେଖାଇବାର । କାନ ଖୋଲି ଶୁଣିନିଅ ନେତା, ଏଥର ଭୋଟ ମାଗିବାକୁ ଆସିବ ତ ରାସ୍ତା ସମସ୍ୟା ଦୂର କରି ଆସିବ । ଯଦି ନାହିଁ, ତାହାଲେ ଭୋଟ ନାହିଁ…
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ପଞ୍ଚାୟତ ନିର୍ବାଚନ ପାଇଁ ଗାଁଗଣ୍ଡା, ଗଳିକନ୍ଦିରେ ରାଜନୀତିର ରୁଟି ସେକା ଚାଲିଛି । କ୍ଷମତା ହାତେଇବାକୁ ରାତାରାତି ରଣନୀତି ପ୍ରସ୍ତୁତ ହେଉଛି । ନେତାଙ୍କ ଆଖିକୁ ନିଦ ଆସୁନାହିଁ । ଠିକ୍ ସେତେବେଳେ ଜନତା ନେତାଙ୍କୁ ସମସ୍ୟାର ପାଠ ପଢାଇ ଚେତାବନୀ ଦେଉଛନ୍ତି । ଆହ୍ୱାନ ଦେଉଛନ୍ତି ଆସ, ଆମ ସମସ୍ୟା ଦେଖ, ତାପରେ ମାଗିବ ଭୋଟ । ପଞ୍ଚାୟତ ଭୋଟର ଭିଡ ଭିତରେ ଏମିତି ଚିତ୍ର ଆସିଛି ବାଲେଶ୍ୱର ଜିଲ୍ଲା ସିମୁଳିଆ ବ୍ଲକ ବାଟି ପଞ୍ଚାୟତର ସୁଙ୍ଗୁଡା ପତିପୋଖରୀ ଆଦିବାସୀ ସାହିରୁ । ଚଳିତ ବର୍ଷ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ଗାଁ ଲୋକେ ।
ଆଦିବାସୀ ସାହିରେ ୩୦ରୁ ଅଧିକ ପରିବାର ବସବାସ କରୁଥିବା ବେଳେ ସରକାରଙ୍କ ମୌଳିକ ସୁବିଧାରୁ ବଞ୍ଚିତ ଗ୍ରାମବାସୀ । ଗାଁକୁ ଖଣ୍ଡେ ରାସ୍ତା ନଥିବାରୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ । ପାଇଖାନା, ଘର ତ ମିଳିବା ଦୂରର କଥା ରାସ୍ତାଟିଏ ହେଇପାରୁନଥିବାରୁ ଲୋକେ ଏଇ ହିଡରେ ଯାଆସ କରୁଛନ୍ତି । ଅନ୍ୟ ସମୟରେ ତ କଷ୍ଟେମଷ୍ଟେ ଯାଇହେଉଛି ହେଲେ ବର୍ଷା ଦିନେ ଏ ରାସ୍ତାରେ ଯିବା ମୁସକିଲ ହୋଇପଡୁଛି । ଗୁରୁତର ରୋଗୀଟିଏ ମେଡିକାଲ ଯିବାପାଇଁ ଗାଁକୁ ଆମ୍ବୁଲାନ୍ସ ଆସିପାରୁନି କି ଗର୍ଭବତୀଙ୍କୁ ହସ୍ପିଟାଲ ନେଉ ହେଉନି । ଏମିତି ସବୁ ଅଭିଯୋଗର ଲମ୍ବାଫର୍ଦ୍ଦ ଧରି ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ଗାଁ ଲୋକେ ।
ଗ୍ରାମବାସୀଙ୍କ ଅଭିଯୋଗ ସରକାର ସବୁ ସୁବିଧା କରୁଛନ୍ତି ହେଲେ ସ୍ଥାନୀୟ ନେତାଙ୍କ ଅବହେଳା, ମନମୁଖୀ କାରବାର ପାଇଁ ପ୍ରକୃତ ହିତାଧିକାରୀଙ୍କ ପାଖରେ ସଠିକ ସୁବିଧା ପହଞ୍ଚିପାରୁନି । ନେତାମାନେ ଖାଲି ନିର୍ବାଚନ ଆସିଲେ ଆମ ଗାଁକୁ ଆସନ୍ତି ପରେ ଭୁଲିଯାଆନ୍ତି । ମାତ୍ର ଏଥର ସେସବୁ ହେବାକୁ ଦେବୁନି ବୋଲି ଖୋଲା ଚେତାବନୀ ଦେଇଛନ୍ତି ଜନତା ।