ମସଲା ତିଆରି କରି ସ୍ୱାବଲମ୍ବୀ ହେଲେ ଗାଁ ମହିଳା । ହଳଦୀ, ଜିରା, ଲଙ୍କା ଓ ଧଣିଆ ଗୁଣ୍ଡ କରି କରୁଛନ୍ତି ପ୍ୟାକେଟିଂ
କନକ ବ୍ୟୁରୋ : ବିଭିନ୍ନ ପ୍ରକାରର ମସଲା ତିଆରି କରି ସ୍ୱାବଲମ୍ବୀ ହୋଇଛନ୍ତି ଗ୍ରାମାଂଚଳର ମହିଳା । ବିନା ତାଲିମରେ ଗାଁ ମହିଳା ମାନେ ପ୍ରସ୍ତୁତ କରୁଛନ୍ତି ମସଲା । ଆଉ ଏହାକୁ ବଜାରରେ ବିକ୍ରି କରି ରୋଜଗାରକ୍ଷମ ହୋଇଛନ୍ତି । ଏହି ରୋଜଗାର ଅନ୍ୟ ମହିଳା ମାନଙ୍କ ପାଇଁ ପ୍ରେରଣା ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ଭୋଗରାଇ ବ୍ଲକ କମର୍ଦା ଅଂଚଳର ମହିଳା ମାନେ ଘର କାମ ପରେ ବିଭିନ୍ନ ପ୍ରକାରର ମସଲା ପ୍ରସ୍ତୁତ କରୁଛନ୍ତି । ବଜାରରୁ ଗୋଟା ହଳଦୀ, ଲଙ୍କା, ଧଣିଆ, ଜିରା କିଣି ମେସିନରେ ଗୁଣ୍ଡ କରୁଛନ୍ତି । ବିଭିନ୍ନ ସାଇଜର ପ୍ୟାକେଟିଂ କରି ବଜାରରେ ବିକ୍ରି କରୁଛନ୍ତି । ସେହିପରି ଚାଉଳ ଭଜା, ଛତୁଆ, ବଡ଼ି ଭଳି ବିଭିନ୍ନ ପ୍ରକାରର ଖାଇବା ସାମଗ୍ରୀ ପ୍ରସ୍ତୁତ କରୁଛନ୍ତି । ଏହାକୁ ସ୍ଥାନୀୟ ବଜାରରେ ବିକ୍ରି କରିବା ସହ ହୋଲସେଲ ରେଟ୍ରେ ଦୋକାନ ଗୁଡ଼ିକରେ ବିକ୍ରି କରି ସ୍ୱାବଲମ୍ବୀ ହୋଇଛନ୍ତି ।
୨୦୨୧ରେ ଗାଁର ୩୮ରୁ ଅଧିକ ମହିଳା ମିଶି ଦଶଭୁଜା ଆଂଚଳିକ ସଂଗଠନ କରିଥିଲେ । ପ୍ରଥମେ ଏକ ଲକ୍ଷ ଟଙ୍କାର ରୁଣ ନେଇ ଗ୍ରାଇଣ୍ଡିଙ୍ଗ ମେସିନ୍ କିଣି ଆରମ୍ଭ କରିଥିଲେ ଏହି ବ୍ୟବସାୟ । ୨ ବର୍ଷ ଭିତରେ ବ୍ୟବସାୟରେ ବେଶ ଉନ୍ନତି ହୋଇଥିବା ବେଳେ ଖୁସି ପ୍ରକାଶ କରିଛନ୍ତି ମହିଳା ।
ମହିଳାଙ୍କ ହାତ ତିଆରି ସାମଗ୍ରୀ କିଣିବା ପାଇଁ ଗ୍ରାହକଙ୍କ ଭିତରେ ଆଗ୍ରହ ବଢୁଛି । ବଜାରରେ ଏହି ସବୁ ସାମଗ୍ରୀର ଚାହିଦା ରହିଥିବା ବେଳେ ଉପକୃତ ହେଉଛନ୍ତି ଏସଏଚଜି ମହିଳା । ଘର କାମ ସହ ଏହି କାମ କରିବା ଦ୍ୱାରା ସେମାନେ ମାସକୁ ୪ରୁ ୫ ହଜାର ଟଙ୍କା ରୋଜଗାର କରିପାରୁଛନ୍ତି । ସେମାନଙ୍କ ଆର୍ଥିକ ସ୍ଥିତିରେ ଉନ୍ନତି ଆଣିପାରୁଛନ୍ତି ।