କନକ ବ୍ୟୁରୋ : ବିଶିଷ୍ଟ ସଂଗୀତଜ୍ଞ ବାସୁଦେବ ରଥଙ୍କ ପରଲୋକ ଘଟିଛି । ଦୀର୍ଘଦିନ ଧରି ସେ ଅସୁସ୍ଥ ଥିଲେ । କଟକର ଏସସିବିରେ ଚିକିତ୍ସିତ ହେଉଥିବା ବେଳେ ତାଙ୍କର ପରିଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ୬୮ ବର୍ଷ ବୟସ ହୋଇଥିଲା । ତାଙ୍କର ମୃତ୍ୟୁ ସଂପର୍କରେ ପରିବାର ପକ୍ଷରୁ ସୂଚନା ଦିଆଯାଇଛି । ଓଡ଼ିଆ ଫିଲ୍ମ ଇଣ୍ଡଷ୍ଟ୍ରୀ ପାଇଁ ବାସୁଦେବ ରଥଙ୍କ ଅବଦାନ ଅତୁଳନୀୟ । ଅନେକ ସୁପରହିଟ୍ ଗୀତର ସେ ଥିଲେ ସ୍ରଷ୍ଟା । ସ୍ୱର୍ଗତ ବାସୁଦେବ ରଥ ୧୨ ହଜାର ଗୀତର କମ୍ପୋଜ କରିଥିଲେ । ୧୫୦ଟି ଓଡ଼ିଆ ଫିଲ୍ମ ଓ ୩୦୦ ଆଲବମରେ ସେ ସଂଗୀତ ନିର୍ଦ୍ଦେଶନା ଦେଇଥିଲେ । ମାନ୍ନା ଦେ’, ଆଶା ଭୋସଲେ, ମହେନ୍ଦ୍ର କପୂରଙ୍କ ଭଳି ବଲିଉଡର ପ୍ରସିଦ୍ଧ କଣ୍ଠଶିଳ୍ପୀଙ୍କ ସହ କାର୍ଯ୍ୟ କରିଥିଲେ ସ୍ୱର୍ଗତ ବାସୁଦେବ ରଥ ।
Kanak News is now on WhatsApp
Join and get latest news updates delivered to you via WhatsApp
ବାସୁଦେବ ରଥ ୧୯୭୫ରେ ମୁକ୍ତିଲାଭ କରିଥିବା ଓଡ଼ିଆ ଚଳଚ୍ଚିତ୍ର ‘ସାକ୍ଷୀ ଗୋପୀନାଥ’ରେ ପ୍ରଥମେ ସଂଗୀତ ନିର୍ଦ୍ଦେଶନା ଦେଇ କ୍ୟାରିୟର ଆରମ୍ଭ କରିଥିଲେ । ଏହା ପରେ ସେ ‘ସଉତୁଣୀ’, ଆରତୀ, ଚିହ୍ନାଅଚିହ୍ନା, କାବେରୀ, ପକା କମ୍ବଳ ପୋତଛତା, ଅନ୍ୟାୟ ସହିବି ନାହିଁ, ଦେଖ ଖବର ରଖ ନଜର ଫିଲ୍ମରେ ସଂଗୀତ ନିର୍ଦ୍ଦେଶନା ଦେଇଥିଲେ ।
ସେହିଭଳି ୨୦୧୧ରେ ମୁକ୍ତିଲାଭ କରିଥିବା ‘ତୁମେ ହିଁ ସାଥୀ ମୋର’ ଥିଲା ତାଙ୍କର ଶେଷ ଚଳଚ୍ଚିତ୍ର । ଶ୍ରେଷ୍ଠ ସଂଗୀତ ନିର୍ଦ୍ଦେଶକ ଭାବେ ସେ ରାଜ୍ୟ ଚଳଚ୍ଚିତ୍ର ପୁରସ୍କାର ଲାଭ କରିଥିଲେ । ତାଙ୍କର ସ୍ୱରାରୋପିତ କେତୋଟି ଲୋକପ୍ରିୟ ଗୀତ ହେଲା, ମା ତୁମେ ଜଗତର ସାହା ଭରସା (ଆରତୀ), ଝୁମକା ଟିକେ ତୁ ତ ହଲେଇ ଦେ (ଚିହ୍ନା ଅଚିହ୍ନା), ଆସିବ ବର ତୋର, ହୋଇବ ବାହାଘର (କାବେରୀ), ସତ କହି ପଛେ ପାଏ ଫାଶୀଟ୍ଟ (ପକା କମ୍ବଳ ପୋତ ଛତା), ତୁମେ ମୋ ରାଧା ତୁମୋ ମୋ ସୀତା (ସାକ୍ଷୀ ଗୋପୀନାଥ) । ତାଙ୍କ ବିୟୋଗରେ ଓଡ଼ିଆ ଚଳଚ୍ଚିତ୍ର ଜଗତରେ ଶୋକର ଛାୟା ଖେଳି ଯାଇଛି । ସ୍ୱର୍ଗତ ବାସୁଦେବ ରଥଙ୍କର ଅନ୍ତିମ ସଂସ୍କାର ସୋମବାର ହେବ ।