ଅଭିନେତା ବିଜୟ ମହାନ୍ତିଙ୍କ ଘରବାହୁଡ଼ା: ଆମ୍ବୁଲାନ୍ସ ଯୋଗେ ହାଇଦ୍ରାବାଦରୁ ଫେରୁଛନ୍ତି ଓଡିଶା; ଝିଅ ପାଖକୁ ଯାଇଥିବା ବେଳେ ହୋଇପଡିଥିଲେ ଅସୁସ୍ଥ
ଆସନ୍ତକାଲି ଫେରିବେ ଭୁବନେଶ୍ୱର
କନକ ବ୍ୟୁରୋ: ଓଡିଶା ଫେରୁଛନ୍ତି ଭେଟେରାନ୍ ଅଭିନେତା ବିଜୟ ମହାନ୍ତି । ଦୀର୍ଘ ଦିନ ଧରି ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିବା ଏହି ବରିଷ୍ଠ ଅଭିନେତା ଆସନ୍ତାକାଲି ଭୁବନେଶ୍ୱରରେ ପହଁଚିବେ । ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀଙ୍କ ସହଯୋଗ ଏବଂ ଅଭିନେତା ଅଖିଳ ପଟ୍ଟନାୟକଙ୍କ ଉଦ୍ୟମରେ ଜରିଆରେ ଏକ ସ୍ୱତନ୍ତ୍ର ଆମ୍ବୁଲାନ୍ସ ଯୋଗେ ଭୁବନେଶ୍ୱର ଆସୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଆ ସିନେମା ଜଗତର ପ୍ରଖ୍ୟାତ ଅଭିନେତା ବିଜୟ ମହାନ୍ତିଙ୍କ ଏହି ଚିତ୍ର ହୁଏତ ଲକ୍ଷାଧିକ ସିନେ ପ୍ରଶଂସକଙ୍କୁ ବିବ୍ରତ କରୁଥିବ କିନ୍ତୁ ବିଜୟ ମହାନ୍ତି ସ୍ୱାସ୍ଥ୍ୟବସ୍ଥା ଏବେ ଭଲ ଅଛି । ହାଇଦ୍ରାବାଦରେ ରହୁଥିବା ଝିଅପାଖକୁ ଯାଇ ଅଚାନକ୍ ଅସୁସ୍ଥ ହୋଇପଡ଼ିଥିବା ବିଜୟ ମହାନ୍ତି ଏକ ସ୍ୱତନ୍ତ୍ର ଆମ୍ବୁଲାନ୍ସ ଯୋଗେ ଓଡ଼ିଶା ଫେରୁଛନ୍ତି ।ହାଇଦ୍ରାବାଦର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେବା ପରେ ସେ ଭୁବନେଶ୍ୱର ଫେରି ଆସିବାକୁ ନିଷ୍ପତି ନେଇଛନ୍ତି । ନିଜ ଜନ୍ମମାଟିରେ ସେ ଅଧିକ ଆଶ୍ୱସ୍ତ ଅନୁଭବ କରିବେ, ସେଇ ଲକ୍ଷ୍ୟ ନେଇ ଭୁବନେଶ୍ୱର ଫେରୁଛନ୍ତି ବିଜୟ ।
ବିଜୟ ମହାନ୍ତିଙ୍କୁ ଭୁବନେଶ୍ୱର ଆଣିବା ଦିଗରେ ଗୁରୁତ୍ୱପୂର୍ଣ୍ଣ ଭୂମିକା ନେଇଛନ୍ତି ଅଭିନେତା ଅଖିଳ ପଟ୍ଟନାୟକ । ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀଙ୍କ ସହଯୋଗ କ୍ରମେ ଏକ ଡାକ୍ତରୀ ଟିମ୍ ହାଇଦ୍ରାବାଦ ଯାଇ ବିଜୟଙ୍କୁ ଭୁବନେଶ୍ୱର ଆଣୁଛନ୍ତି । ପ୍ରାୟ ୨୦ ଘଂଟାର ଲମ୍ବା ଯାତ୍ରା ଥିବାରୁ ଆବଶ୍ୟକ ସ୍ଥଳେ ତାଙ୍କୁ ବିଶାଖାପାଟଣା କିମ୍ବା ଆଖପାଖ ହସ୍ପିଟାଲରେ ବିଶ୍ରାମ ପାଇଁ ମଧ୍ୟ ରଖିବାର ବନ୍ଦୋବସ୍ତ କରାଯାଇଛି । ବିଜୟଙ୍କୁ ଏୟାର ଆମ୍ବୁଲାନ୍ସରେ ଆଣିବା ପାଇଁ ପ୍ରଥମେ ବିଚାର କରାଯାଉଥିଲା । ତେବେ ଏହା ଅଧିକ ବ୍ୟୟ ବହୁଳ ଥିବାରୁ ଏକ ସ୍ୱତନ୍ତ୍ର ଆମ୍ବୁଲାନ୍ସରେ ଭୁବନେଶ୍ୱର ଆଣିବାକୁ ନିଷ୍ପତି ହୋଇଥିଲା । ବିଜୟ ମହାନ୍ତି ରବିବାର ୧୦ଟାରୁ ୧୧ଟା ଭିତରେ ଭୁବନେଶ୍ୱର ପହଂଚିବେ ।