ବିବାଦରେ ମୟୂରଭଞ୍ଜ ଜିଲ୍ଲାପାଳ ଓ ଏସପି, ଟି-ସାର୍ଟରେ ନବୀନଙ୍କ ଫଟୋ : ଟ୍ୱିଟ୍ କରି ସାଂସଦ ଅପରାଜିତା ଷଡଙ୍ଗୀ କହିଲେ ଦୁର୍ଭାଗ୍ୟପୂର୍ଣ୍ଣ

କନକ ବ୍ୟୁରୋ : ବିବାଦରେ ମୟୂରଭଞ୍ଜ ଜିଲ୍ଲାପାଳ ଓ ଏସପି । ଗତକାଲି ଏକ ଆଦିବାସୀ ମାରାଥନ ଦୌଡ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ମନ୍ତ୍ରୀ ସୁଦାମ ମାରାଣ୍ଡି ଏବଂ ଅନ୍ୟମାନେ ଯୋଗ ଦେଇଥିଲେ । ଯେଉଁଥିରେ ଜିଲ୍ଲାପାଳ ଏବଂ ଏସପି ମଧ୍ୟ ମଞ୍ଚରେ ଉପସ୍ଥିତ ଥିବା ଦେଖିବାକୁ ମିଳିିଛି । ହେଲେ ଉଭୟ ସରକାରୀ ବାବୁଙ୍କ ଟି-ସାର୍ଟରେ ମୁଖ୍ୟମନ୍ତ୍ରୀଙ୍କ ଫଟୋ ଥିବାକୁ ନେଇ ବିବାଦ ଦେଖାଦେଇଛି । ସାଂସଦ ଅପରାଜିତା ଷଡଙ୍ଗୀ ଏହାକୁ ନେଇ ଏକ ରିପୋଷ୍ଟ ଟ୍ୱିଟ୍ କରିଛନ୍ତି ।

ପ୍ରଥମେ ଜଣେ ଟ୍ୱିଟ୍ କରିଥିଲେ ଯେଉଁଥିରେ ଜିଲ୍ଲପାଳ ଏବଂ ଏସପି ନବୀନଙ୍କ ଫଟୋ ଥିବା ଟି-ସାର୍ଟ ପିନ୍ଧିଥିବା ଫୋଟା ଜାରି କରିଥିଲେ । ଏହାପରେ ଅପରାଜିତା ସଂପୃକ୍ତ ବ୍ୟକ୍ତିର ଟ୍ୱିଟକୁ ରିପୋଷ୍ଟ କରି କହିଛନ୍ତି ଏହା ଦୁର୍ଭାଗ୍ୟଜନକ । ସରକାରୀ ଅଧିକାରୀ ନିୟମ ଉଲ୍ଲଙ୍ଘନ କରୁଛନ୍ତି ବୋଲି ସେ କହିଛନ୍ତି । ନବୀନ ପଟ୍ଟନାୟକ ରାଜ୍ୟର ମୁଖ୍ୟମନ୍ତୀ ସହିତ ଶାସକ ଦଳ ବିଜେଡିର ସୁପ୍ରିମୋ ଅଟନ୍ତି ।

ଏପରି ସ୍ଥିତିରେ ସରକାରୀ ଅଧିକାରୀ କେଉଁ ଆଧାରରେ ନବୀନଙ୍କ ଫଟୋ ଥିବା ଟି-ସାର୍ଟ ପିନ୍ଧିଲେ ତାହା ଏବେ ପ୍ରଶ୍ନବାଚୀ । ଜିଲ୍ଲା ପ୍ରଶାସନର ସବୋର୍ଚ୍ଚ ଅଧିକାରୀ ହେଉଛନ୍ତି ଜିଲ୍ଲାପାଳ ବିନୀତ ଭରଦ୍ୱାଜ । ୨୦୧୨ ବ୍ୟାଚର ଏହି ଆଇଏଏସ ଅଧିକାରୀ ଦୀର୍ଘ ସାଢ଼େ ୫ ବର୍ଷ ହେବ ମୟୂରଭଞ୍ଜର ଜିଲ୍ଲାପାଳ ଅଛନ୍ତି । ୨୦୧୮ ଏପ୍ରିଲ ୨୬ ତାରିଖରେ ଜିଲ୍ଲାପାଳ ଭାବେ ଯୋଗ ଦେଇଥିଲେ ବିନୀତ ଭରଦ୍ୱାଜ ।