କନକ ବ୍ୟୁରୋ: ଚୈତ୍ରମାସର ମୁଣ୍ଡଫଟା ଖରାରେ ଜଳିପୋଡି ଯାଉଛି ସୁନାର ଫସଲ । ଯେଉଁ ପନିପରିବାର ଚାଷୀ ପରିବାରର ପେଟ ପୋଶିଥାନ୍ତା, ସେହି ଫସଲକୁ ଦେଖି ଚାଷୀ ଆଖିରୁ ଲୁହ ଝରୁଛି । ତଅଁଳା ନଦୀ ଦିନେ ୨୨ ମଉଜା ଚାଷୀଙ୍କ ପାଇଁ ଲକ୍ଷ୍ମୀ ସାଆନ୍ତାଣି ପାଲଟିଥିଲା । ଏବେ କିନ୍ତୁ ଅଭିଶପ୍ତ ପାଲଟିଛି । ଶୁଖିଲା ନଦୀ ଏବେ ମେଣ୍ଡାଛେଳୀ ଗୋରୁଗାଈଙ୍କ ଚାରଣଭୁମି ପାଲଟିଛି । ନଦୀ ସୁଖିଲା ପଡିଥିବା ବେଳେ କେନାଲରେ ବି ଟୋପାଏ ପାଣି ନାହିଁ । ସେପଟେ ନଳକୂପରୁ ପାଣି ବାହାରୁନି । ତେଣୁ ଚାଷୀଙ୍କ ଆଶା ମଉଳି ଯାଇଛି, ସ୍ୱପ୍ନ ପୋଡି ଜଳିଯାଉଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କଟକ ନିଆଳି ବ୍ଲକ ସରାକୂଳ ଗାଁର ଚାଷୀ ହଜାର ହଜାର ଟଙ୍କା ଖର୍ଚ୍ଚ କରି ତଅଁଳା ନଦୀ ପଠାରେ ବିଭିନ୍ନ ପ୍ରକାର ପନିପରିବାର ଚାଷ କରିଛନ୍ତି । ବାଇଗଣ ,ପୋଟଳ ,ଲଙ୍କା, ପୋଇ, କୋବି ,ଟମାଟୋ ଠାରୁ ବିଭିନ୍ନ ଫସଲ କରିଛନ୍ତି । ହେଲେ ନଦୀ ନାଳ ଶୁଖିଲା ପଡିଥିବାରୁ ପାଣି ବିନା ଫସଲ ପୋଡି ପାଉଁଶ ହୋଇଯାଉଛି । ସେପଟେ ନିର୍ବାଚନ ସମୟରେ ସରକାରୀ କର୍ମଚାରୀଙ୍କ ଠାରୁ ଆରମ୍ଭ କରି ସ୍ଥାନୀୟ ନେତା, ସମସ୍ତ ନିର୍ବାଚନରେ ମାତିଥିବାରୁ ଚାଷୀଙ୍କ କଥା ଶୁଣିବାକୁ କେହି ନଥିବା ଅଭିଯୋଗ ହୋଇଛି ।
ତେବେ ଚାଷୀଙ୍କ କହିବା ଅନୁସାରେ, ତଅଁଳା ନଦୀ ସବୁ ପାଣି ଦେବୀ ନଦୀ ଚାଲିଯାଉଛି । ତେଣୁ ତୁରନ୍ତ ତଅଁଳା ନଦୀରେ ଚେକ ଡ୍ୟାମ ନିର୍ମାଣ କରିବାକୁ ବାରମ୍ବାର ଦାବି ହେଉଛି ।