୩୬ ଲକ୍ଷ ଟଙ୍କାର ଠକେଇ କାହାଣୀ । ଯେବେ ଆମାଜନ ଆଉ ପ୍ଲିପକାର୍ଟକୁ ଚୂନ ଲଗାଇ ଠକିଥଲା ଜଣେ କମ୍ପ୍ୟୁଟର ମେକାନିକ ।
କନକ ବ୍ୟୁରୋ: ଆପଣ ପ୍ରତିଦିନ ଅନେକ ଠକଙ୍କ କଳା କାରନାମାର କାହାଣୀ ଶୁଣୁଥିବେ ଆଉ ଦେଖୁଥିବେ । ଲୋକଙ୍କୁ ଚୂନ ଲଗେଇ ଠକମାନେ ଲକ୍ଷ ଲକ୍ଷ ଟଙ୍କା ଲୁଟି ନେଉଥିବା କଥା ଏବେ ଗଣମାଧ୍ୟମର ଚର୍ଚ୍ଚାରେ । ହେଲେ ଦେଶର ଦୁଇଟି ବଡ ଇ-କର୍ମସ କମ୍ପାନି ଫ୍ଲିପକାର୍ଟ ଆଉ ଆମାଜନ ଦିନେ ଏମିତି ଜଣେ ଠକର ସାମ୍ନା କରିଥିଲା ବୋଲି ଆଜି ବି ଅନେକ ଲୋକଙ୍କୁ ଅଜଣା । ଜଣେ ସାମାନ୍ୟ କମ୍ପ୍ୟୁଟର ମେକାନିକ ଦେଶର ଏହି ଦୁଇଟି ବଡ ଇ-କର୍ମସ କମ୍ପାନିକୁ ୩୬ ଲକ୍ଷ ଟଙ୍କାର ଚୂନ ଲଗାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଭୀରା ରେଡ୍ଡି ହେଉଛି ସେଇ ନାଁ, ଯିଏ ଆମାଜନ ଆଉ ଫ୍ଲିପକାର୍ଟକୁ ଭୂଆଁ ବୁଲେଇ ତାକୁ ଠକିବାରେ ସଫଳ ହୋଇଥିଲା । ଲକ୍ଷେ କି ଦୁଇ ଲକ୍ଷ ନୁହେଁ ବରଂ ପାଖାପାଖି ୩୬ ଲକ୍ଷ ଟଙ୍କାରୁ ଅଧିକ ଟଙ୍କାର ଠକେଇ କରିଥିଲା ଏହି ଠକ । ନିଜ ଚାଲାକି ପଣକୁ ଦେଖାଇ ଏହି ଯୁବକ ଦୁଇ କମ୍ପାନିର ଦୁର୍ବଳତା ବାହାର କରିଥିଲା ଆଉ ତାଙ୍କୁ ଠକିବାରେ ଲାଗିପଡିଥିଲା ।
ଭୀରା ରେଡ୍ଡି ହାଇଦ୍ରାବାଦର ଜଣେ ୨୫ ବର୍ଷୀୟ ଯୁବକ । ଯିଏକି ବୃତିରେ ଜଣେ ସାମାନ୍ୟ କମ୍ପ୍ୟୁଟର ମେକାନିକ ଥିଲା । ହେଲେ ତା ସାତିର ଦିମାଗକୁ ଲଗାଇ ସେ ଆରମ୍ଭ କରିଥିଲା ଏକ ବଡ ଚାଲ୍ । ଭୀରା ରେଡି ଫ୍ଲିପକାର୍ଟ କମ୍ପାନିରୁ ଅନେକ ବିଦ୍ୟୁତ ଉପକରଣ ଅର୍ଡର କରିଥିଲା । ଆଉ ଅର୍ଡର ପାଇବା ପରେ ତା ଭିତରୁ ଅନେକ ମୂଲବାନ ଜିନିଷ କାଢି ତାକୁ ବିକ୍ରି କରିଦେଉଥିଲା । ପରେ ଫ୍ଲିପକାର୍ଟର ରିଟଣ୍ଣ ପଲିସି ଜରିଆରେ ସେ ଜିନିଷରେ ଖରାପ ଥିବା ଦେଖାଇ ଏହାକୁ ପୁଣି କମ୍ପାନିକୁ ରିଟଣ୍ଣ କରିଦେଉଥିଲା । ଯେଉଁଥିରେ ସେ ମାଲାମାଲ୍ ହେବା ସହିତ କମ୍ପାନିକୁ ଚୂନ ଲଗାଉଥିଲା । ତେବେ ଏଥିପାଇଁ ସେ ନିଜ ଚାଲାକି ପଣକୁ ହିଁ ବ୍ୟବହାର କରୁଥିଲା । ସେ ପାଖାପାଖି ୧୨୦ଟି ସିମକୁ ବ୍ୟବହାର କରି ଜିନିଷ ଅର୍ଡର କରୁଥିଲା । ଆଉ ପ୍ରତିଥର ଭୁଲ ଆଡ୍ରେସ ଦେଇ ଅର୍ଡର ପିକଅପ୍ କରୁଥିଲା । ତେଣୁ କମ୍ପାନି ଭୀରା ରେଡ୍ଡିର ଏହି ଠକାମିକୁ ଧରି ପାରୁନଥିଲା ।
ଫ୍ଲିପକାର୍ଟକୁ ପାଖାପାଖି ୨୦ ଲକ୍ଷ ଟଙ୍କାର ଚୂନ ଲଗାଇବା ପରେ ଭୀରା ରେଡ୍ଡି ଆମାଜନ ଆଡକୁ ନଜର ପକାଇଥିଲା । ଫ୍ଲିପକାର୍ଟକୁ ଠକିବା ଭଳି ଠିକ୍ ସେହି ଉପାୟରେ ସେ ଆମାଜନରୁ ଜିନିଷ ଅର୍ଡର କରିଥିଲା ଆଉ ତା ଭିତରୁ ବିଭିନ୍ନ ଯନ୍ତ୍ରକୁ କାଢି ତାକୁ ପୁଣି ରିଟଣ୍ଣ କରିଦେଉଥିଲା । ଏହିଭଳି ଭାବେ ସେ ଆମାଜନରୁୁ ପାଖାପାଖି ୧୬ ଲକ୍ଷରୁ ଅଧିକ ଟଙ୍କାର ଠକେଇ କରିଥିଲା ।
ଏ ଭିତରେ ଫ୍ଲିପକାର୍ଟ କମ୍ପାନି ତାର ବିଭିନ୍ନ ରିଟଣ୍ଣର କାରଣ ଖୋଜି ପାଇବା ପାଇଁ ଏକ ଡାଟାବେସ ପ୍ରସ୍ତୁତ କରିସାରିଥିଲା । ଯେଉଁଥିରେ କମ୍ପାନିକୁ କିଛି ଗଡବଡ ଥିଲାଭଲି ଲାଗିଥିଲା । ଏହା ପଛର ଗୁମର ଖୋଜିବା ପାଇଁ ଫ୍ଲିପକାର୍ଟ ଏକ ସ୍ପେଶାଲ ଟିମ୍ ଗଠନ କରିବା ସହିତ ପୋଲିସକୁ ବି ଏହାର ସୂଚନା ଦେଇଥିଲା । ଆଉ ତା ପରେ ସମସ୍ତଙ୍କ ସାମ୍ନାକୁ ଆସିଥିଲା ଭୀରା ରେଡ୍ଡିର ଏହି ଠକାମି । ପୋଲିସ ତାକୁ ଏହି ଘଟଣାରେ ଗିରଫ କରିବା ସହିତ ତା ପାଖରୁ ସେହି ୧୨୦ଟି ସିମକୁ ଜବତ କରିଥିଲା । ଆଉ ସେତେବେଳେ ପୋଲିସ ତା ପାଖରୁ ପାଖାପାଖି ୪୫ ଲକ୍ଷରୁ ଅଧିକ ଟଙ୍କା ଜବତ କରିଥିଲା । ଯାହାକୁ ସେ ବିଭିନ୍ନ କମ୍ପାନିକୁ ଚୂନ ଲଗାଇ ରୋଜଗାର କରିଥିଲା ।
ଭୀରା ରେଡ୍ଡି କେବଳ ଏକା ନୁହେଁ, ତା ପୂରା ପରିବାର ଏହି ଠକାମି କାମରେ ଲାଗିପଡିଥିଲା । ହେଲେ ପୋଲିସ କେବଳ ଏହି ଘଟଣାରେ ଭୀରା ରେଡ୍ଡି କୁ ହିଁ ଗିରଫ କରିପାରିଥିଲା । ଏବେ ବି ତା ପରିବାର ଏହି ଘଟଣାରେ ଫେରାର୍ ଥିବାବେଳେ ପୋଲିସ ତାଙ୍କୁ ଧରିବାରେ ସଫଳ ହୋଇନି ।