କନକ ବ୍ୟୁରୋ : ଭାରତରେ ଓମିକ୍ରନ କାୟା ବିସ୍ତାର କରୁଥିବା ବେଳେ ବିଭିନ୍ନ ରାଜ୍ୟ ପକ୍ଷରୁ କରୋନା କଟକଣାକୁ କଡାକଡି କରାଯାଇଛି । କେଉଁଠି ରାତ୍ରୀକାଳୀନ କର୍ଫ୍ୟୁ ଆରମ୍ଭ ହୋଇଛି ତ ପୁଣି କେଉଁଠି ଅଧିକ ଭିଡ଼ ଯେପରି ନହୁଏ ସେଥିପ୍ରତି ଦୃଷ୍ଟି ଦିଆଯାଇଛି । ଯେହେତୁ ଓମିକ୍ରନ ଅତି ଦ୍ରୁତ ବେଗରେ ସଂକ୍ରମିତ କରୁଛି ତେଣୁ ସାମାଜିକ ଦୂରତା ଉପରେ ଅଧିକ ଗୁରୁତ୍ୱ ଦିଆଯାଉଛି । କିନ୍ତୁ ଏହି କଟକଣା ଯେପରି କେବଳ ସାଧାରଣ ଲୋକଙ୍କ ପାଇଁ ଉଦ୍ଦିଷ୍ଟ । କାରଣ ବିଭିନ୍ନ ରାଜନୈତିକ ସଭାରେ ଏବେ ବି ହଜାର ହଜାର ସଂଖ୍ୟାରେ ଲୋକେ ଏକାଠି ହେଉଛନ୍ତି । କିନ୍ତୁ ଏଥିପ୍ରତି ଯେପରି କାହାର ନିଘା ନାହିଁ । ଆଉ ଏହି କରୋନା କଟକଣାର ଖୋଲାଖୋଲି ଉଲ୍ଲଂଘନ ଉତ୍ତରପ୍ରଦେଶରେ ଦେଖିବାକୁ ମିଳୁଛି । ଯାହାକୁ ନେଇ ପ୍ରଶ୍ନ ଉଠାଇଛନ୍ତି ବିଜେପି ସାଂସଦ ବରୁଣ ଗାନ୍ଧୀ ।

Advertisment

ଟ୍ୱିଟ୍ କରି ବରୁଣ କହିଛନ୍ତି, ଓମିକ୍ରନର ମୁକାବିଲା ପାଇଁ ରାତିରେ କର୍ଫ୍ୟୁ ଲଗାଇବା ଓ ଦିନରେ ହଜାର ହଜାର ଲୋକଙ୍କୁ ଏକାଠି କରି ରାଲି କରିବା । ଏହାର ବାସ୍ତବ ଅର୍ଥ କଣ ବୁଝାପଡୁନି । ଉତ୍ତରପ୍ରଦେଶର ସ୍ୱାସ୍ଥ୍ୟ ବ୍ୟବସ୍ଥାକୁ ଦୃଷ୍ଟିରେ ରଖି ନିଷ୍ପତ୍ତି ନେବାକୁ ପଡିବ କି ଆମର ପ୍ରାଥମିକତା କଣ? ଭୟାବହ ଓମିକ୍ରନର ମୁକାବିଲା କରିବା ନା ନିର୍ବାଚନ ରାଲିରେ ଶକ୍ତି ପ୍ରଦର୍ଶନ କରିବା ।

ଦେଶରେ ଓମିକ୍ରନ ସଂକ୍ରମଣ ମାମଲା ବଢିବା ପରେ ଉତ୍ତରପ୍ରଦେଶରେ ଶନିବାର ରାତି ଠାରୁ ନାଇଟ କର୍ଫ୍ୟୁ କଟକଣା ଲାଗୁ କରାଯାଇଛି । ରାତି ୧୧ଟାରୁ ସକାଳ ୫ଟା ଯାଏଁ ଲୋକଙ୍କୁ ବିନା କାରଣରେ ବାହାରେ ବୁଲିବା ଉପରେ କଟକଣା ଲାଗିଛି । ଏହାବାଦ୍ ବାହାଘର, ବ୍ରତଘର ଭଳି ଉତ୍ସବରେ ଅତିଥିଙ୍କ ସଂଖ୍ୟାକୁ ୨୦୦ ଭିତରେ ସୀମିତ ରଖିବାକୁ କୁହାଯାଇଛି । କିନ୍ତୁ ଅନ୍ୟପଟେ ସକାଳ ହେବା କ୍ଷଣି ରାଜନୈତିକ ଦଳ ଗୁଡିକ ହଜାର ହଜାର ଲୋକଙ୍କୁ ନେଇ ରାଲି, ସଭା କରୁଛନ୍ତି । ପ୍ରଶାସନ କାର୍ଯ୍ୟାନୁଷ୍ଠାନ ନେବା ବଦଳରେ ସୁରକ୍ଷା ଦେଉଛି । ସାଧାରଣ ଲୋକ ଯେଉଁଠି କୋଭିଡ ନିୟମ ଉଲ୍ଲଂଘନ କଲେ ଜରିମାନା ଗଣୁଛି ସେତେବେଳେ ରାଜନୈତିକ ଦଳ ଉପରେ କାର୍ଯ୍ୟାନୁଷ୍ଠାନ ନେବାକୁ ପ୍ରଶାସନ କାହିଁକି ପଛଘୁଞ୍ଚା ଦେଉଛି ବୋଲି ପ୍ରଶ୍ନ କରିଛନ୍ତି ଲୋକେ । ଆଉ ଏଥିରେ ସ୍ୱର ମିଳାଇଛନ୍ତି ବିଜେପି ସାଂସଦ ବରୁଣ ଗାନ୍ଧୀ । ଆଉ ଏଭଳି କହି ଯୋଗୀ ସରକାରଙ୍କୁ ପରୋକ୍ଷରେ ଟାର୍ଗେଟ କରିଛନ୍ତି ବରୁଣ ।

ବିଜେପି ଓ ଯୋଗୀ ସରକାରକୁ ଟାର୍ଗେଟ କରିବା ବରୁଣଙ୍କ ପାଇଁ ପ୍ରଥମ ନୁହେଁ । ଏହାପୂର୍ବରୁ ଅନେକ ପ୍ରସଙ୍ଗରେ ଦଳକୁ ଅଡୁଆରେ ପକାଇଛନ୍ତି ବରୁଣ । ଆଉ ଏସବୁ ଭିତରେ କେନ୍ଦ୍ରମନ୍ତ୍ରୀ ଅର୍ଜୁନ ମେଘୱାଲ ସଂକେତ ଦେଇଛନ୍ତି ଯେ, ଖୁବଶୀଘ୍ର ବରୁଣଙ୍କ ଉପରେ କାର୍ଯ୍ୟାନୁଷ୍ଠାନ ନେଇପାରେ ଦଳ ।