ବରୁଣ ଓ ମାନେକାଙ୍କୁ ବଡ ଝଟକା । ବିଜେପିର ରାଷ୍ଟ୍ରୀୟ କାର୍ଯ୍ୟକାରିଣୀରୁ ବାଦ ପଡିଲେ ମା’- ପୁଅ ।

348

କନକ ବ୍ୟୁରୋ : ବିଜେପି ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟଙ୍କ ଘୋଷଣା କରିଛି । ଆଉ ଏହି ଘୋଷଣାରେ ଆଶ୍ଚର୍ଯ୍ୟଚକିତ କଲା ଭଳି ନିଷ୍ପତ୍ତି ନେଇଛି ବିଜେପି । ପିଲିଭିତରୁ ସାଂସଦ ଥିବା ବରୁଣ ଗାନ୍ଧୀଙ୍କୁ ବିଜେପି ରାଷ୍ଟ୍ରୀୟ କାର୍ଯ୍ୟକାରିଣୀରୁ ବାଦ୍ ଦିଆଯାଇଛି । ସେହିଭଳି ବିଜେପିର ବରିଷ୍ଠ ନେତ୍ରୀ ତଥା ବରୁଣଙ୍କ ମା’ ମାନେକା ଗାନ୍ଧୀଙ୍କୁ ମଧ୍ୟ ରାଷ୍ଟ୍ରୀୟ କାର୍ଯ୍ୟକାରିଣୀରୁ ବାଦ୍ ଦିଆଯାଇଛି । ଲଗାତାର ସରକାରଙ୍କ ବିଭିନ୍ନ ନୀତିକୁ ନେଇ ପ୍ରଶ୍ନ ଉଠାଇବା ବରୁଣଙ୍କୁ ମହଙ୍ଗା ପଡିଛି ବୋଲି କୁହାଯାଉଛି । ଅନ୍ୟପଟେ ଲଖିମପୁର ଘଟଣାରେ ସରକାରଙ୍କୁ ଟାର୍ଗେଟ କରିବା କାରଣରୁ ବରୁଣଙ୍କୁ ଏମିତି ଦଶା ଭୋଗିବାକୁ ପଡିଛି ବୋଲି ଚର୍ଚ୍ଚା ହେଉଛି ।

ଲଖିମପୁର ଘଟଣାକୁ ନେଇ ବରୁଣ ସିରିଜ ଟ୍ୱିଟ୍ କରିବା ସହ ସରକାରଙ୍କୁ ଟାର୍ଗେଟ କରି ଆସୁଛନ୍ତି । ଏପରିକି ଆଜି ମଧ୍ୟ ବରୁଣ ଏକ ଟ୍ୱିଟ୍ କରି ଲେଖିଛନ୍ତି, ବିରୋଧ କରୁଥିବା ଲୋକଙ୍କୁ ହତ୍ୟା କରି ସେମାନଙ୍କୁ ଚୁପ୍ କରାଯାଇ ପାରିବ ନାହିଁ । ନୀରିହ କୃଷକଙ୍କୁ ହତ୍ୟା କରିଥିବା ବ୍ୟକ୍ତିଙ୍କୁ ଉତ୍ତର ଦେବାକୁ ପଡିବ । ସରକାରଙ୍କ ପ୍ରତି ଚାଷୀଙ୍କ ମନରେ କିଛି ଖରାପ ବାର୍ତ୍ତା ଯାଉ ତାହା ପୂର୍ବରୁ ନ୍ୟାୟ ମିଳିବା ଆବଶ୍ୟକ ବୋଲି ବରୁଣ ଟ୍ୱିଟ୍ କରି କହିଥିଲେ ।

ଗୁରୁବାର ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା ଦଳର ରାଷ୍ଟ୍ରୀୟ କାର୍ଯ୍ୟକାରିଣୀଙ୍କ ସଦସ୍ୟଙ୍କ ତାଲିକା ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବରିଷ୍ଠ ନେତା ଲାଲକୃଷ୍ଣ ଆଡଭାନୀ, ମୁରଲୀ ମନୋହର ଯୋଶୀଙ୍କ ସମେତ ୮୦ ଜଣ ନେତାଙ୍କୁ ରାଷ୍ଟ୍ରୀୟ କାର୍ଯ୍ୟକାରିଣୀର ସଦସ୍ୟ ଭାବେ ମନୋନୀତ କରାଯାଇଛି । ବିଜେପିର ରାଷ୍ଟ୍ରୀୟ କାର୍ଯ୍ୟସମିତି ବିଭିନ୍ନ ମୁଦ୍ଦା ଉପରେ ଚର୍ଚ୍ଚା କରିବା ସହ ସଙ୍ଗଠନକୁ କିଭଳି ଶକ୍ତିଶାଳୀ କରାଯିବ ତାହା ନିର୍ଦ୍ଧାରଣ କରିଥାନ୍ତି । କୋଭିଡ କାରଣରୁ ଦୀର୍ଘ ସମୟ ହେବ ଦଳର ରାଷ୍ଟ୍ରୀୟ କାର୍ଯ୍ୟକାରିଣୀ ଆୟୋଜିତ ହୋଇନାହିଁ । ଆସନ୍ତା ନଭେମ୍ବର ୭ ତାରିଖରେ ବିଜେପିର ଆଗାମୀ କାର୍ଯ୍ୟକାରିଣୀ ବୈଠକ ବସିବ । ଜେ.ପି ନଡ୍ଡା ଦଳର ସଭାପତି ହେବା ପରେ ବିଜେପିର ଏହା ପ୍ରଥମ ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ହେବ ।