ଦିଲ୍ଲୀ ସରକାରଙ୍କ ବଡ ଘୋଷଣା । ବିନା ପଞ୍ଜିକରଣରେ ଟିକା ନେଇ ପାରିବେ ୪୫ ବର୍ଷରୁ ଉର୍ଦ୍ଧ ବୟସ୍କ ଲୋକ । ସରକାରୀ ସ୍କୁଲ ହେବ ଟିକାକରଣ କେନ୍ଦ୍ର
କନକ ବ୍ୟୁରୋ : କରୋନା ଭୂତାଣୁ ସଂକ୍ରମଣର ଦ୍ୱିତୀୟ ଲହରି ମଧ୍ୟରେ ଦିଲ୍ଲୀରେ ଜାରି ରହିଛି ଟିକାକରଣ । ଟିକାକରଣ ପ୍ରକ୍ରିୟାକୁ ଆହୁରି ସରଳ କରିବାକୁ ଦିଲ୍ଲୀ ସରକାର ଏକ ବଡ ଘୋଷଣା କରିଛନ୍ତି । ଏବେ ଦିଲ୍ଲୀରେ ୪୫ ବର୍ଷରୁ ଅଧିକ ବୟସ୍କ ଲୋକଙ୍କୁ ଟିକା ନେବା ପାଇଁ ଆଉ ଅନଲାଇନ୍ ପଞ୍ଜିକରଣର ଆବଶ୍ୟକତା ପଡିବ ନାହିଁ । ଅର୍ଥାତ ଟିକା ନେବାକୁ ହେଲେ ସିଧା ଟିକାକରଣ କେନ୍ଦ୍ରକୁ ଯାଇ ସେଠାରେ ପଞ୍ଜିକରଣ କରିବା ପରେ ଟିକା ନେଇପାରିବେ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିଶୋଦିଆଙ୍କ କହିବା ମୁତାବକ ଏକ ବୈଠକରେ ନିଷ୍ପତ୍ତି ନିଆଯାଇଛି କି, ମେଡିକାଲ ନିକଟରୁ ଟିକାକରଣ କେନ୍ଦ୍ରକୁ ଉଠାଇ ଆଣି ସରକାରୀ ସ୍କୁଲରେ ଟିକା ଦିଆଯିବ । ଦିଲ୍ଲୀରେ ମେ ୩ ତାରିଖରୁ ସରକାରୀ ସ୍କୁଲ ମାନଙ୍କରେ ୧୮ ରୁ ୪୪ ବର୍ଷ ବୟସ୍କ ଲୋକଙ୍କୁ ଟିକା ଦିଆ ହେଉଛି । ଏହାଦ୍ୱାରା ଅଧିକ ଲୋକ ସହଜରେ ଟିକା ନେଇପାରୁଥିବାରୁ ଏବେ ୪୫ ବର୍ଷରୁ ଅଧିକ ବୟସ୍କଙ୍କ ପାଇଁ ମଧ୍ୟ ସରକାରୀ ସ୍କୁଲରେ ଟିକାକରଣ କେନ୍ଦ୍ର ଖୋଲିବାକୁ ନିଷ୍ପତ୍ତି ନିଆଯାଇଛି ।
ଏହାସହ ଦିଲ୍ଲୀରେ ଖୁବଶୀଘ୍ର ଟିକାକରଣ କେନ୍ଦ୍ର ବୃଦ୍ଧି କରିବାକୁ ସିଶୋଦିଆ କହିଛନ୍ତି । ଦିଲ୍ଲୀରେ ପ୍ରତି କୋଣ ଅନୁକୋଣରେ ଟିକାକରଣ କେନ୍ଦ୍ର ଖୋଲାଯିବ । ଯାହାଦ୍ୱାରା ସହଜରେ କମ ସମୟ ମଧ୍ୟରେ ଅଧିକ ଲୋକ ଟିକା ନେଇପାରିବେ । ଦୈନିକ ୩ ଲକ୍ଷ ଲୋକଙ୍କୁ ଟିକା ଦେବାକୁ ପ୍ରସ୍ତୁତି ଚାଲିଥିବା କଥା ସେ କହିଛନ୍ତି ।
ମନିଷ ସିଶୋଦିଆଙ୍କ କହିବା ମୁତାବକ ଦିଲ୍ଲୀରେ ୪୫ ବର୍ଷରୁ ଅଧିକ ବୟସ୍କ ୫୭ ଲକ୍ଷ ଲୋକ ଥିବା ବେଳେ ସେମାନଙ୍କ ମଧ୍ୟରୁ ଏପର୍ଯ୍ୟନ୍ତ ୨୨ ଲକ୍ଷ ଲୋକଙ୍କୁ ଟିକା ଦିଆ ସରିଛି । ଏହାସହ ସେ କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି କି ଦିଲ୍ଲୀକୁ ଆବଶ୍ୟକ ପଡୁଥିବା ଟିକା ଖୁବଶୀଘ୍ର ପ୍ରଦାନ କରାଯାଉ । ଫଳରେ ସମସ୍ତ ଦିଲ୍ଲୀବାସୀଙ୍କୁ ଟିକା ଦିଆଯାଇ ପାରିବ ।