ଦେବଭୂମିରେ ପ୍ରକୃତିର ତାଣ୍ଡବ : ଉତ୍ତରାଖଣ୍ଡରେ ଲଗାଣ ବର୍ଷା ଯୋଗୁଁ ଗଲାଣି ୪୦ରୁ ଅଧିକ ଜୀବନ
ଆକାଶ ମାର୍ଗରୁ ଜାରି ରହିଛି ଉଦ୍ଧାର କାର୍ଯ୍ୟ; କୁମାଉଁ ଅଂଚଳ ସବୁଠୁ ଅଧିକ ପ୍ରଭାବିତ
କନକ ବ୍ୟୁରୋ : ଉତ୍ତରାଖଣ୍ଡରେ ଲଗାତାର ୩ ଦିନ ଧରି ଲଗାଣ ବର୍ଷା, ବାଦଲଫଟା ବର୍ଷା ଏବଂ ବିଭିନ୍ନ ଅଞ୍ଚଳରେ ବନ୍ୟା ଯୋଗୁଁ ଅତି କମ୍ରେ ୪୦ରୁ ଅଧିକ ଜଣଙ୍କ ମୃତ୍ୟୁ ଘଟିଛି । ନୈନିତାଲ୍ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । ଭୂସ୍ଖଳନ ଯୋଗୁଁ ନୈନିତାଲ୍କୁ ସଂଯୋଗ ହୋଇଥିବା ୩ଟି ରାସ୍ତା ବନ୍ଦ ହୋଇଯାଇଥିବାରୁ ନୈନିତାଲ ସହ କୌଣସି ସଡ଼କ ଯୋଗାଯୋଗ ନାହିଁ । ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ଆକାଶ ମାର୍ଗରୁ ବର୍ଷା ପ୍ରଭାବିତ ଅଞ୍ଚଳଗୁଡ଼ିକର ସ୍ଥିତି ସମୀକ୍ଷା କରିଛନ୍ତି । ପ୍ରବଳ ବର୍ଷା, ଭୂସ୍ଖଳନ ଏବଂ ବନ୍ୟା ଯୋଗୁଁ ଉତ୍ତରାଖଣ୍ଡରେ ମୃତ୍ୟୁ ସଂଖ୍ୟ ବୃଦ୍ଧି ପାଇଛି। ମୁଖ୍ୟମନ୍ତ୍ରୀ ମୃତକଙ୍କ ପରିବାର ସଦସ୍ୟଙ୍କ ପାଇଁ ୪ ଲକ୍ଷ ଟଙ୍କା କ୍ଷତିପୂରଣ ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଯେଉଁମାନେ ବର୍ଷା ଏବଂ ବନ୍ୟା ଯୋଗୁଁ ଘର ହରାଇଦେଇଛନ୍ତି ସେମାନଙ୍କ ପାଇଁ ୧.୯ ଲକ୍ଷ ଟଙ୍କାର କ୍ଷତିପୂରଣ ଘୋଷଣା ହୋଇଛି । ବନ୍ୟା ପ୍ରଭାବିତ ଅଞ୍ଚଳରୁ ଲୋକଙ୍କୁ ଖାଲି କରିବାପାଇଁ ଏନ୍ଡିଆରଏଫ୍ର ୧୫ଟି ଟିମ୍ ମୁତୟନ ହୋଇଛନ୍ତି । ଉଧମ ସିଂହ ନଗର ଜିଲ୍ଲାରେ ୬ ଏନ୍ଡିଆରଏଫ୍ ଟିମ୍ ମୁତୟନ ହୋଇଥିବାବେଳେ ଉତ୍ତରକାଶୀ ଏବଂ ଚାମୋଲିରେ ୨ଟି ଲେଖାଏଁ ଟିମ୍ ଏବଂ ଡେରାଡୁନ, ପିଥୋରଗଡ଼ ଏବଂ ହରିଦ୍ବାରରେ ଗୋଟିଏ ଲେଖାଏଁ ଟିମ୍ ମୁତୟନ ହୋଇଛି । ଉଦ୍ଧାର କାର୍ଯ୍ୟ ଆଜି ବ୍ୟାପକ ହୋଇଛି ଏବଂ ଉଦ୍ଧମ ସିଂହ ନଗର ଜିଲ୍ଲା ଏବଂ ଅନ୍ୟ ବନ୍ୟା ପ୍ରଭାବିତ ଅଞ୍ଚଳରୁ ଏଯାବତ୍ ୩୦୦ରୁ ଅଧିକ ଲୋକଙ୍କୁ ଖାଲି କରାଯାଇଛି । ରିଲିଫ୍ ଏବଂ ଉଦ୍ଧାର କାର୍ଯ୍ୟ ପାଇଁ ତୁରନ୍ତ ସେନାର ୩ଟି ହେଲିକପ୍ଟର ମୁତୟନ କରାଯାଇଛି । ଲୋକେ ଭୟଭୀତ ନହୋଇ ପରିସ୍ଥିତିର ମୁକାବିଲା ପାଇଁ ମୁଖ୍ୟମନ୍ତ୍ରୀ କହିଛନ୍ତି ।
ଉତ୍ତରପ୍ରଦେଶ ଏବଂ ଦିଲ୍ଲୀର ପ୍ରାୟ ୧୫୦ ଜଣ ପର୍ଯ୍ୟଟକ ରାମନଗର ଅଞ୍ଚଳର ‘ଲେମନ ଟ୍ରି’ ରିସୋର୍ଟରେ ଫସି ଯାଇଛନ୍ତି । କୋସୀ ନଦୀରେ ଜଳସ୍ତର ବଢ଼ିଥିବାରୁ ଉକ୍ତ ରି ସୋର୍ଟ ଜଳମଗ୍ନ ହୋଇଯାଇଛି । ସ୍ଥାନୀୟ ପୁଲିସ ରିସୋର୍ଟରୁ ପର୍ଯ୍ୟଟକମାନଙ୍କୁ ଉଦ୍ଧାର କରିଛି । ନୈନିତାଲର ନୈନି ହ୍ରଦ ଜଳ ବିପଦସଙ୍କେତ ଟପିଯାଇଛି ଏବଂ ହ୍ରଦ ଜଳ ରାସ୍ତା ଆଡ଼କୁ ମାଡ଼ି ଯାଇଛି । ଅନେକ ସ୍ଥାନରେ ଘରଦ୍ବାର ଭାଙ୍ଗି ଯାଇଛି । ଉତ୍ତରାଖଣ୍ଡ ରାଜ୍ୟ ବିପର୍ଯ୍ୟୟ ପରିଚାଳନା ସଚିବଙ୍କ ସୂଚନା ଅନୁଯାୟୀ ଗତ ୨୪ ଘଣ୍ଟାରେ ଉତ୍ତରାଖଣ୍ଡ ୨୦୦ ମିମି ବର୍ଷା ହୋଇଛି । ଚମ୍ପାୱତର ଚଲ୍ତି ନଦୀ ଉପରେ ଥିବା ଏକ ନିର୍ମାଣାଧୀନ ବ୍ରିଜ୍ ଧୋଇଯାଇଛି ।