ରାଜନୀତିରେ ବିଜୁଳି ସାଜୁଛି ମୁଖ୍ୟ ମୁଦ୍ଦା । ୧୦୦ ୟୁନିଟ୍ ପର୍ଯ୍ୟନ୍ତ ବିଜୁଳି ବିଲ୍ ଛାଡ କରିବାକୁ ଘୋଷଣା କଲେ ଉତ୍ତରାଖଣ୍ଡ ଶକ୍ତିମନ୍ତ୍ରୀ
କନକ ବ୍ୟୁରୋ : ଉତ୍ତରାଖଣ୍ଡ ଶକ୍ତିମନ୍ତ୍ରୀ ହରକ୍ ସିଂ ରାୱତ ଶକ୍ତି ବିଭାଗର ପ୍ରଥମ ବୈଠକରେ ବଡ ଘୋଷଣା କରିଛନ୍ତି । ତାଙ୍କ ଘୋଷଣା ମୁତାବକ ଉତ୍ତରାଖଣ୍ଡ ରାଜ୍ୟର ପ୍ରତ୍ୟେକ ଘରୋଇ ବିଜୁଳି ଉପଭୋକ୍ତାଙ୍କୁ ୧୦୦ ୟୁନିଟ୍ ବିଜୁଳି ବ୍ୟବହାର ଉପରେ କୌଣସି ବିଲ୍ ଦେବାକୁ ପଡିବ ନାହିଁ । କେବଳ ସେତିକି ନୁହେଁ ମାସିକ ୨୦୦ ୟୁନିଟ୍ ପର୍ଯ୍ୟନ୍ତ ବିଜୁଳି ବ୍ୟବହାର କରୁଥିବା ଲୋକଙ୍କୁ ୫୦ ପ୍ରତିଶତ ଅର୍ଥାତ ଅଧା ବିଲ୍ ଦେବାକୁ ପଡିବ । ହରକ୍ ସିଂ ରାୱତ ତାଙ୍କ ପ୍ରଥମ ବୈଠକରେ ଏଭଳି ବଡ ଘୋଷଣା କରିବା ସହ ଏହି ପ୍ରସ୍ତାବକୁ ଖୁବ୍ ଶୀଘ୍ର କ୍ୟାବିନେଟରେ ଉପସ୍ଥାପନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ଫାର୍ମ, ହର୍ଟିକଲଚର, ଏଗ୍ରିକଲଚର, ସେକ୍ଟରର ବ୍ୟବସାୟୀକ ଉପଭୋକ୍ତାଙ୍କୁ ବି ଘରୋଇ ଶ୍ରେଣୀରେ ସାମିଲ କରିବା କଥା କହିଛନ୍ତି । ଜୁଲାଇ ୭ ତାରିଖରେ ହରକସିଂ ରାୱତଙ୍କ ଅଧ୍ୟକ୍ଷତାରେ ବସିଥିବା ଶକ୍ତି ବିଭାଗର ପ୍ରଥମ ବୈଠକରେ ଏଭଳି ଘୋଷଣା କରିଛନ୍ତି । ଏହାସହ ଶକ୍ତି ବିଭାଗର ଅଧିକାରୀଙ୍କ ଏହି ବିଷୟରେ ପ୍ରସ୍ତାବ ପ୍ରସ୍ତୁତ କରିବାକୁ ହରକ୍ ସିଂ ନିର୍ଦ୍ଦେଶ ଦେଇଛନ୍ତି ।
କହିରଖୁ କି ଦିଲ୍ଲୀ ଭଳି ଉତ୍ତରାଖଣ୍ଡରେ ଘରୋଇ ଉପଭୋକ୍ତାଙ୍କୁ ମାଗଣା ବିଜୁଳି ଯୋଗାଇ ଦେବାକୁ ଆମ୍ ଆଦମୀ ପାର୍ଟି ଦାବି କରିଥିଲା । ଏନେଇ ବି ଅନେକବାର ଆମ୍ ଆଦମୀ ପକ୍ଷରୁ ବିଜୁଳି ବିଭାଗ କାର୍ଯ୍ୟାଳୟ ଓ ରାଜରାସ୍ତାରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଏହାସହ ଉତ୍ତରାଖଣ୍ଡରେ ଆପ୍ ର ସରକାର ଆସିଲେ ଦିଲ୍ଲୀଭଳି ଘରୋଇ ଉପଭୋକ୍ତାଙ୍କୁ ମାଗଣାରେ ବିଜୁଳି ଦେବାକୁ ଘୋଷଣା କରିଥିଲା ଆପ୍ । ହେଲେ ଆଉ କିଛିମାସ ପରେ ଉତ୍ତରାଖଣ୍ଡରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ଶକ୍ତିମନ୍ତ୍ରୀଙ୍କ ଏଭଳି ଘୋଷଣା ମାଷ୍ଟର ଷ୍ଟ୍ରୋକ ଠାରୁ କୌଣସି ଗୁୂଣରେ କମ୍ ନୁହେଁ ।