କନକ ବ୍ୟୁରୋ : ଉତ୍ତରାଖଣ୍ଡରେ ଭାରତୀୟ ନୌସେନା ପକ୍ଷରୁ ଚାଲିଥିବା ‘ତ୍ରିଶୁଲ’ ଅଭିଯାନ ବେଳେ ଅଘଟଣ ଘଟିଛି । ନୌସେନାର ପର୍ବତାରୋହୀ ଯବାନ ମାନେ ଅଭିଯାନରେ ଯାଇଥିବା ବେଳେ ହିମସ୍କଳନ ହୋଇଥିଲା । ଏଥିରେ ୫ ଜଣ ଯବାନ ନିଖୋଜ ହୋଇଥିବା କଥା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଉତ୍ତରାଖଣ୍ଡର ତ୍ରିଶୁଲ ପର୍ବତର ଶିଖରରେ ପହଂଚିବାକୁ ଯାଇଥିବା ନୌସେନାର କିଛି ଯବାନ ସେଠାରେ ହିମସ୍କଳନ ହେବାରୁ ଅସୁବିଧାରେ ପଡିଥିଲେ । ଶୁକ୍ରବାର ସକାଳେ ଭାରତୀୟ ନୌସେନାର ୫ ଜଣ ଯବାନ ଓ ଜଣେ କୁଲି ନିଖୋଜ ହୋଇଥିବା ସୂଚନା ମିଳିଥିଲା ।
ଏଭଳି ସୂଚନା ପାଇବା ପରେ ନେହେରୁ ଇନଷ୍ଟିଚ୍ୟୁଟ୍ ଅଫ ମାଉଣ୍ଟେନିୟରିଂର ଏକ ଉଦ୍ଧାରକାରୀ ଦଳ ଓ ଏହାର ମୁଖ୍ୟ କର୍ଣ୍ଣେଲ ଅମିତ ବିଷ୍ଟଙ୍କ ନେତୃତ୍ୱରେ ନିଖୋଜଙ୍କ ସନ୍ଧାନରେ ହିମସ୍କଳନ ପ୍ରଭାବିତ ଅଞ୍ଚଳରେ ପହଂଚିଛନ୍ତି ।
ସେପଟେ କୁହାଯାଇଛି କି ଉଦ୍ଧାରକାରୀ ଦଳ ଯୋଶୀମଠ ନିକଟରେ ପହଂଚିବା ପରେ ପାଗ ଖରାପ ଥିବାରୁ ସେମାନେ ଆଗକୁ ଯାଇପାରି ନାହାଁନ୍ତି । ଏଣୁ ହେଲିକପ୍ଟର ସହାୟତାରେ ଭାରତୀୟ ସେନା, ବାୟୁସେନା ଓ ରାଜ୍ୟ ବିପର୍ଯ୍ୟୟ ପ୍ରଶମନ ବାହିନୀର ଏକ ମିଳିତ ଟିମ୍ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି ।
ତ୍ରିଶୁଲ ପର୍ବତ ହେଉଛି ଉତ୍ତରାଖଣ୍ଡର ବାଗେଶ୍ୱର ଜିଲ୍ଲାରେ ଅବସ୍ଥିତ ତିନୋଟି ହିମାଳୟ ଶିଖରର ଏକ ସମଷ୍ଟି । ଭାରତୀୟ ବାୟୁସେନା ସକାଳ ୧୧ ଟା ସମୟରେ ଯବାନ ନିଖୋଜ ଥିବା ନେଇ ଜାତୀୟ ଗଣମାଧ୍ୟମକୁ ସୂଚନା ଦେଇଥିଲା । ଏହାସହ ସେମାନଙ୍କୁ ଉଦ୍ଧାର କରିବାକୁ ବିଭାଗକୁ ସହାୟତା ମାଗିଥିଲା ।
ସୂଚନା ମୁତାବକ ଭାରତୀୟ ନୌସେନାର ପର୍ବତାରୋହୀଙ୍କ ଏକ ୨୦ ଜଣିଆ ଯିମ ୧୫ ଦିନ ପୂର୍ବେ ୭.୧୨୦ ମିଟର ମାଉଣ୍ଟ ତ୍ରିଶୁଲ ନାମରେ ଏକ ଅଭିଯାନ ଆରମ୍ଭ କରିଥିଲେ । ହେଲେ ଶୁକ୍ରବାର ସକାଳ ୫ ଟା ସମୟରେ ସେଠାରେ ଭୂସ୍କଳନ ହୋଇଥିଲା ।